Qyrǵyzstannyń burynǵy prezıdenti Almazbek Atambaevty ulttyq qaýipsizdik jónindegi memlekettik komıtettiń tergeý ızolıatorynan Bishkektegi №1 tergeý ızolıatoryna aýystyrdy. Buǵan qarsylyq retinde eks-prezıdent ashtyq jarııalady. Bul týraly 24.kg saıty habarlady. 

Almazbek Atambaevtyń qorǵaýshysy Zamır Jooshevtyń aıtýynsha, burynǵy prezıdentti jertólede ustap otyr, buryn ólim jazasyna kesilgender sol jerge qamalatyn.

Atambaevtyń densaýlyǵy nashar ekeni, ókpesi qabynǵany, júregi aýyratyny habarlandy.

– Sońǵy kezderi ol kamerada eshkim bolmaǵan, ol jaqqa endi ǵana jylý júıesin qosty, qubyr júıesi istemeıdi, kamera esikteri únemi ashyq turady. Almazbek Atambaev ashtyq jarııalady, – deıdi Jooshev.

Burynǵy prezıdent Almazbek Atambaev Bishkektegi alańda tártipsizdik uıymdastyrdy degen kúdikpen 10 qazanda ustalǵan edi. Ol ózge de burynǵy sheneýniktermen birge 6 qazanǵa qaraǵan túni demonstranttar talabymen bosatylǵan bolatyn.

Onyń ústinen 2019 jyly Koı-Tashtaǵy oqıǵaǵa baılanysty "Adam óltirý", "Adamdardy kepildikke alý", "Jappaı tártipsizdik", "Buzaqylyq", "Bılik ókiline kúsh qoldaný" baptary boıynsha qylmystyq ister qozǵalǵan. Atambaev pen ózge de aıyptalýshylar aıyptardy joqqa shyǵarady.

2020 jyly jazda Bishkek aýdandyq soty qylmystyq top jetekshisi Azız Batýkaevty zańsyz bosatý isine qatysy bar dep aıyptalǵan Atambaevty 11 jyl 2 aıǵa bas bostandyǵynan aıyrǵan edi. Sot onyń múlkin tárkilep, memlekettik nagradalary men ataqtarynan aıyrǵan. Keıinirek Bishkek qalalyq soty úkimdi ózgerissiz qaldyrdy. Koı-Tashtaǵy oqıǵa boıynsha sot ázirge sheshim qabyldamady.

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir