16 Qyrkúıek, 2020 Áleýmet

"Úırenip júr". Sport ortalyǵy dırektorynyń qazaqsha túsinbegenine pikir bildirildi (vıdeo)

Vıdeodan skrınshot

Nur-Sultan qalasyndaǵy brıfıngterdiń birinde spıker memlekettik tilde qoıylǵan suraqty orys tiline aýdarǵannan keıin ǵana túsingeni beınelengen vıdeo áleýmettik jelide qyzý talqylanyp jatyr. Vıdeodaǵy adamnyń Dene shynyqtyrý jáne sport boıynsha respýblıkalyq oqý-ádistemelik jáne taldaý ortalyǵy respýblıkalyq memlekettik qazynalyq kásipornynyń dırektory Abzal Myhybaev ekeni belgili boldy. Al vıdeo ortalyq kommýnıkasııalar qyzmetinde "Qazaqstandaǵy buqaralyq sportty damytý" taqyrybymen 15 qyrkúıekte ótken brıfıngte túsirilgen. Qamshy tilshisi oqý-ádistemelik ortalyqqa habarlasyp, oqıǵaǵa baılanysty túsinik alýǵa tyrysty.

Dene shynyqtyrý jáne sport boıynsha respýblıkalyq oqý-ádistemelik jáne taldaý ortalyǵynyń saıty tolyqtaı orys tilinde júrgiziledi. Til aýystyratyn tusta qazaq tilin tańdaý batyrmasy joq.

Ortalyqtyń Facebook jáne Instagram jelilerindegi aqparattyń basym kópshiligi orys tilinde jarııalanǵan.

Qamshy tilshisiniń qońyraýyna dırektordyń orynbasary Nurbolat Beksultanov jaýap berip, ortalyq basshysy Abzal Myhybaev jınalysta bolǵandyqtan, telefon tutqasyna jaqyndaı almaıtynyn jetkizdi.

Nurbolat Beksultanov ortalyq dırektorynyń memlekettik tilge shorqaq ekenin jasyrmady. Alaıda onyń sózinshe, Abzal Myhybaev qazaqsha sóıleı almaǵanymen, túsinedi. Tek tikeleı efırdegi brıfıngke alǵash ret shyqqandyqtan abdyrap, oıyn jınaqtaı almaı qalǵan.

 

– Abzal Tuńǵataruly prınsıpti túrde qazaqsha sóılemeıtin adam emes. Tek ósken ortasy orys tildi bolǵandyqtan, oıyn qazaqsha jetkizýge qınalady. Biraq tyrysady. Qazir úırenip júr. Jumysta barlyǵymyzǵa qazaqsha sóıleýimizdi, sol arqyly tildi tezirek meńgerýge kómektesýimizdi suraıdy, – dedi Nurbolat Beksultanov.

 

Dırektor orynbasary ortalyqtyń áleýmettik jelidegi paraqshalarynda memlekettik tildegi aqparattyń azdyǵyn keıbir bólimderde ózge ult ókilderi isteıtinin, olardyń aqparatty orys tilinde beretinin aıtyp, ony aýdarýǵa aýdarmashy joqtyǵymen túsindirdi.

– Áleýmettik jelilerdegi paraqshalarǵa jarııalanatyn aqparat túrli bólimderden kelip túsedi. Olardyń arasynda qazaqsha da, oryssha da bar. Oryssha aqparat beretin bólimderde negizinen ózge ult ókilderi isteıdi. Al oryssha aqparatty qazaqshaǵa, qazaqshany orysshaǵa aýdaratyn aýdarmashy bizde joq. Keıde jeke aýdarmashylarǵa júginip jatamyz. Biraq únemi júginýdiń múmkindigi bola bermeıdi. Al saıttyń qazaq tilindegi nusqasy bar. Tek qazir jetildirilý ústinde. Keıbir qate aýdarylǵan sózderdi durystap, jýyq aralyqta qaıta iske qosamyz. Sol kezde saıt qos tilde birdeı aqparat taratatyn bolady, – dedi ol.

Qamshy tilshisi "ortalyqta negizinin jumys barysynda qaı tilge basymdyq beriledi" dep suraǵanynda Nurbolat Beksultanov mekemede jumys tiliniń qazaq tili ekenin aıtty.

Onyń sózinshe, ortalyq pen mınıstrlik arasyndaǵy hat almasý tek qana qazaq tilinde júredi. Is qaǵazdardyń barlyǵy qazaq tilinde. "Bizden buıryqty oryssha shyǵarý suralsa, bere almaımyz. О́ıtkeni buıryqtyń oryssha nusqasy joq, jasalmaǵan" degen ol ortalyqta memlekettik tilge shorqaq qyzmetkerlermen qatar, oryssha shala biletin mamandar da bar ekenin atap ótti.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir