Elordada «Shapaǵat» bazarynda karantın talaptarynyń buzylǵany anyqtaldy

 

Mobıldi top Nur-Sultannyń barlyq aýdandarynda qurylǵan, onyń quramynda ákimdik, jergilikti polısııa qyzmeti jáne Taýarlar men kórsetiletin qyzmetter sapasyn baqylaý basqarmasynyń ókilderi halyq kóp jınalatyn oryndarǵa turaqty túrde tekserý júrigizip turady.

Baıqońyr aýdany taýarlar men kórsetiletin qyzmetter sapasyn baqylaý basqarmasynyń bólim basshysy Asyl Seralynyń aıtýynsha, jabyq bazarlardyń jumysyna birneshe talap qoıylady. Qalanyń bas sanıtar dárigeriniń qaýlysymen, jabyq azyq-túlik jáne ózge de bazarlar jumys kúnderi saǵat 10:00-17:00 aralyǵynda ǵana jumys isteýi tıis.

Demalys kúnderi bul bazarlar jabylyp, tek taza aýadaǵy jármeńkelerdiń jumysyna ruqsat berilgen. Saýda oıyn-saýyq ortalyqtary da kúndelikti 10:00-22:00 aralyǵynda jumys istep, demalys kúnderi jabylýy tıis.

«Jabyq bazarlardyń kireberisinde dene qyzýyn ólsheıtin qyzmetker turýy qajet, olar dene qyzýy joǵary adamdy kirgizbeýi kerek. Sol jerde kelýshilerge qoljetimdi sanıtaızer turýy qajet, mundaı sanıtaızerler árbir 50 metr saıyn ornatylýy kerek. Árbir 2-3 saǵat saıyn arnaıy eritindimen tazalanýy tıis. Satýshylar maska, qolǵap tárizdi qorǵanys quraldaryn paıdalanýy qajet. О́zi men kelýshiler úshin antıseptık qoıýy qajet. Ár klıentten keıin qolyn óńdep, ár 2 saǵat saıyn jumys ornyn dezınfeksııalyq eritindimen tazalaýy tıis. Kelýshiler de maska taǵyp, áleýmettik ara qashyqtyq saqtaýǵa mindetti», - dep túsindirdi Asyl Seraly QazAqparat tilshisine bergen suhbatynda.

Ákimshilik quqyq buzý týraly kodekstiń 425-babyna sáıkes, sanıtarlyq-epıdemıologııalyq zańnama talaptary men gıgıenalyq normatıvterdi buzǵany úshin jeke tulǵalarǵa – 30 AEK, shaǵyn kásipkerlik sýbektilerine – 230 AEK, orta kásipkerlik sýbektilerine – 310 AEK, iri kásipkerlik sýbektilerine –1600 AEK mólsherinde aıyppul kózdelgen.

Spıkerdiń aıtýynsha, qazirgi ýaqytta Nur-Sultan qalasy boıynsha karantın rejımin saqtamaǵan (Maska taqpaý, qashyqtyq saqtamaý, halyqtyń kóp jınalýy jáne t.b.) jeke jáne zańdy tulǵalarǵa 414 aıyppul salynǵan.

«Shapaǵat» bazary boıynsha da tekserýshiler birneshe olqylyqty anyqtady.

«Áleýmettik qashyqtyq saqtaý úshin edenge belgiler syzylmaǵan. Satýshylar men kelýshiler maska taǵý rejımin buzyp otyr. Bir kireberiste terometrııa júrgizilip jatqan joq. Sanıtaızerler de 50 metr saıyn ornatylyp, halyqqa qoljetimdi bolýy tıis. Bazardyń bir zalynda sanıtaızer kórinbedi. Bul olqylyqtar boıynsha Ákimshilik quqyqbuzýshylyqtar týraly kodekstiń 425-babyna sáıkes shara qabyldaımyz», - dedi Asyl Seraly.

«Satýshylarǵa aıyppul salyna ma?» degen suraqqa basqarma ókili birinshi kezekte bazar ákimshiligi jaýapqa tartylatynyn aıtty.

«Munda bazar ákimshiligi barlyq jaǵdaıdy baqylaýy qajet. Kireberistegi, zal ishindegi kúzet qyzmeti eskertý jasap, halyqtyń toptasýyna jol bermeýi kerek. Qajet bolsa, satýshylarmen barlyq talapty saqtaý boıynsha ınstrýktaj ótkizýi kerek», - dep túsindirdi A. Seraly.

О́z kezeginde bazar ákimshiligi aıtylǵan eskertýlermen kelispeıtinin, barlyq talapty saqtaýǵa tyrysyp jatqanyn jetkizdi.

«Barlyq kelýshilerdi tekserip, maskamen ǵana kirgizip jatyrmyz. Keı adamdardyń maskasynyń ıegine túsip ketken, biraq biz ár adamnyń maskasyn túzep júre almaımyz ǵoı. Kireberisterde dezınfeksııalyq kilemsheler ornatylǵan. Ár 2 saǵat saıyn óńdeý jumystaryn júrgizemiz. Tekserýshiler 2-qabatqa kóterilgen joq, onda býtıkter jumys isteıdi. Ár býtıktiń aldynda sanıtaızer tur, 2-3 adamnan artyq qyzmet kórsetpeımiz degen habarlama ilingen. Edenge salynǵan belgiler adam kóp júrgendikten, óship ketedi. Bul syndy eskeremiz. Sanıtaızerler de ornynda tur. Jalpy sholý jasaǵandyqtan, tekserýshiler kórmeı qalýy da múmkin. Talap etilgen barlyq qaǵıdany saqtaýǵa tyrysyp jatyrmyz. Iá, keıde adam tolýy múmkin, biraq ol úshin aıyppul salý qajet dep eseptemeımin. Eskertý berse de, sol olqylyqtardy túzeter edik», - deıdi «Shapaǵat» bazarynyń ákimshisi Sáýle Ydyrysova.

Sonymen birge, ákimshi bazardyń karantınde qandaı shyǵynǵa ushyraǵanyn aıtyp berdi.

«Ár senbi-jeksenbi saıyn bazarymyz jabylady. Jalǵa alýshylarymyz bir jarym aı boıy úıinde otyrdy. Bul aralyq úshin olardan arendalyq tólem alǵan joqpyz. Bizde de osyndaı shyǵyndar bar», - deıdi Sáýle Ydyrysova.

Aıta keteıik, 1 qyrkúıekte Nur-Sultan qalasynyń bas memlekettik sanıtar dárigeri A. Shaǵaltaevanyń karantın sharalaryn kezeń-kezeńmen jeńildetý týraly jańa qaýlysy jarııalandy.