Tergeý ızolıatorynda qaıtys bolǵan qoǵam belsendisi Dýlat Aǵadildiń anasy Gúlbarash Jolmuhambetova Qamshy portalyna ulyna arnap beriletin as ótetin 8 tamyz jaqyndaǵan saıyn belsendilerdi ustaý, qamaý jıilegenin habarlady.

Onyń sózinshe, aldymen Dýlat Aǵadil kózi tirisinde bastaǵan úıdi aıaqtaýǵa baryn salyp, istiń basy-qasynda júrgen belsendi Erbol Eshojın qamalǵan.

Ol 8 tamyzda as ótetini týraly jazǵannan keıin 30 shilde kúni Etalon qurylys bazarynda ustalǵan. Ony astanadaǵy mıtıngige qatysty degen aıyppen 15 kúnge abaqtyǵa japqan.

Sol kúni Eshojındi bosatýdy talap etip Nur-Sultan qalasy polısııa departamentine barǵan belsendiler de qamalǵan.

Gúlbarash Jolmuhambetova "talabymyzdy aıtqyzbastan, áı-sháıǵa qaramastan ustaı bastady" deıdi.

– Sol kúni 9 adam qamaldy. Meni de súıredi. Alysqan kezde qolymdy aýyrtyp aldym. Kógergen izder áli bar. Telefonymdy alyp qoıǵan edi, julysyp júrip, qaıtaryp aldym. Aramyzda Serik Jahın degen adam tipti talyp qaldy. Ony sol essiz kúıi kóterip alyp ketti. Eki adamǵa 83 myń teńgege aıyppul saldy. Ne úshin salǵanyn bilmeımin, –  dedi ol.

Áleýmettik jelide belsendiler sol kúni polısııa departamentiniń aldynda Serik Jahın, Anıa Shýkeeva, Bıbigúl Tuıaqova, Ǵalııa Tamabaeva, Roza Musaeva, Aıbek Sábıtov, Altyn Lespaeva, Janat Núrkeshev, Aıtpaı Qasymov sekildi azamattardyń ustalǵanyn habarlaǵan.

Gúlbarash Jolmuhambetova buǵan deıin 300 adam jınalyp ulyna quran oqyǵan kezde polısııa tóbeden dronmen túsirip, syrttaı baqylap turǵanyn aıtty.

– Bular sonda ólgen Dýlattan qorqa ma? Ne kórindi sonsha? "Nege jınalyp alǵansyńdar" desek, "qaýipsizdik úshin" deıdi. Biz sonda molaǵa kelip soǵys ashamyz ba? Dýlattyń asy aldynda istep otyrǵany mynaý. Bılik Dýlattyń asyn ótkizýge meılinshe kedergi keldirip otyr, – deıdi Aǵadildiń anasy.

Búginde janashyr jandardyń asarlaýynyń arqasynda Aǵadil bastap ketken úı qurylysynyń 90 paıyzy aıaqtalǵan.

"Qurylysqa jergilikti ákimdikten esh kómek bolmady, bári halyqtyń arqasy, halqyma myńda bir rahmet" degen marqum anasy jurttyń járdemdesip otyrǵanyn, sondyqtan turmys taýqymetin tartyp jatpaǵanyn jetkizdi.

Sondaı-aq Gúlbarash Jolmuhambetova Aǵadildi tergeý ızolıatoryna alyp kelgen sáttegi vıdeojazbany ala almaı júrgenin atap ótti.

– Vıdeoda Dýlattyń kamerada birese jatyp, birese turyp, mazasy ketip turǵany kóringen. Kezekshi polıseı 3 ret kirip, jatqan jerinen 3 ret turǵyzdy. Bir sátte ájethanaǵa aparyp kelgen soń Dýlat qulap jatyp qaldy. Ary qaraı ne bolǵany vıdeoǵa túspegen. Tańǵy 12 jarym jarym men tańǵy 6-ǵa deıingi jazba joq. Kameranyń "pamıaty tolyp, jazylmaı qalǵan" deıdi bizge. Endi tym bolmasa, 12 jarymǵa deıingi vıdeony bersin desek, bermeı otyr, – deıdi Jolmuhambetova.

Qart ana jaqyn kúnderi prezıdent Toqaevqa beıneúndeý joldap, 8 tamyz kúngi asqa keletinderge kedergi jasamaýǵa yqpal etýin talap etetinin aıtty.

Aǵadildiń anasy sondaı-aq ıtalııadaǵy oppozısıoner "Erjan Turǵymbaı tarapynan eshqandaı kómek kerek emes" dedi.

– Turǵymbaı janashyr bolmaı-aq qoısyn. Onyń kómegi bizge kerek emes. О́tkende ózi salyp berip jatqandaı Dýlattyń úıine eki ájethana qoıý kerek edi dep aqylyn aıtyp otyr. Kerek emes. Bizge qalyń qazaǵym kómektesip jatyr. Solarǵa myń da bir rahmet" deıdi ol.

Jolmuhambetova "endi facebook-ke tikeleı efırge shyǵyp, "óle-ólgenshe, bıliktiń masqaralyǵyn áshkerelep ótem" dep bekinip otyr.

Dýlat Aǵadil – áleýmettik problemalar jáne azamattyq quqyqty saqtaý máselesin kótergen. Ol ótken jyly birneshe márte ákimshilik jazaǵa tartylyp, keminde 60 táýlik qamaýda otyrǵan. Belsendi byltyr qarashanyń ortasynda ákimshilik qamaýda otyrǵan Selınograd aýdandyq tergeý ızolıatorynan qashyp ketken edi. Keıin ol áreketiniń sebebin "zańsyz qýdalaýǵa qarsylyǵym" dep túsindirgen. Polısııa eki kún boıy izdegen belsendi 15 qarashada ózi bas prokýratýra aldyna kelgen. Keıin ol "sot qaýlysyn oryndamaǵany úshin" taǵy 6 táýlikke sottalǵan.

Belsendi 25 aqpan Nur-Sultantaǵy tergeý ızolıatorynda kóz jumǵan. Resmı derek boıynsha, ólimge júrek talmasy sebep bolǵan. Alaıda marqumnyń jaqyndary men qoǵam belsendileri munymen kelispeıdi. Marqumdy jýyndyrǵan kezde denesinde kógergen jerler bolǵan.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir