21 Shilde, 2020 Saıasat

Toqaev ózi synaǵan úkimetti qalaı jasaqtaýy múmkin?

Fotokollaj

Qazaqstanda keshe sıfrlyq damý, ınnovasııalar jáne aeroǵarysh ónerkásibi mınıstri Asqar Jumaǵalıev qyzmetinen bosatyldy. Onyń qyzmetin atalǵan vedomstvoǵa vıse-mınıstr bolyp taǵaıyndalǵan Baǵdat Mýsın ýaqytsha atqarmaq. Sońǵysy buǵan deıin prezıdenttiń sıfrlandyrý jáne ınnovasııalyq tehnologııalar jónindegi keńesshisi bolǵan. Qoǵam tarapynan da, prezıdent tarapynan da synǵa ushyrap júrgen qazirgi úkimet qaıta jasaqtala ma?  Qamshy tilshisi osy týraly sarapshylar pikirin surady.

Saıasattanýshy, Ulttyq qoǵamdyq senim keńesiniń múshesi Erlan Saırov mınıstrlerdi bir-birtindep ornynan alý arqyly úkimettiń basym kópshiligi aýystyrylýy yqtımal ekenin aıtty.

– Pandemııa kezinde úkimet ashyq jumys isteý, qoǵammen qoıan-qoltyq jumys isteý, azamattyq qoǵammen dıalogqa barý máselesi jaǵynan kende bolyp qaldy. Kóptegen sheshim kýlýardy túrde jasalyp jatyr. Jalpy, qoǵammen eshqandaı baılanys, dıalog joq. Sondyqtan búgingi úkimettiń jumys isteý tásili men stıli azamattyq qoǵamdy da, prezıdentti de qanaǵattandyrmaı otyr. Jáne jumysy aqsap qalǵan mınıstrler boıynsha sheshim qabyldaý jóninde ortaq pikirge kelgen tárizdi. Pandemııa bastalǵanda Qazaqstanda sıfrlandyrý salasynda sheshilmegen másele kóp ekenin belgili boldy. Osy sııaqty ózine júktelgen mindetti atqara almaı otyrǵan mınıstr, ákimderge qatysty naqty sheshim qabyldanýy yqtımal. Halyq úkimettiń qabyldaǵan qararlary men sheshimderine senimmen qaraý kerek. Ol úshin halyq pen úkimet tikeleı jumys isteýge tıis. Al bul úkimet ázirshe qoǵam belsendilerimen, azamattyq qoǵam ókilderimen birlesip jumys isteýge bara almaı otyr. Menińshe, osylaı mınıstrlerdi bir-birtindep ornynan alý arqyly úkimettiń basym kópshiligi aýystyrylýy yqtımal, – deıdi saıasattanýshy.

"HAQ" (Halyqqa adal qyzmet) qozǵalysynyń jetekshisi Toǵjan Qojalıeva "eks-mınıstr Asqar Jumaǵalıev jumysyn qaı deńgeıde atqarǵanyn pandemııa kórsetip berdi" degen pikirde.

– Bizdiń elde bılikte óziniń jumysy úshin, jumysynyń nátıjesi men qorytyndysy úshin jaýap berer sát týǵanda ári qabyldanǵan sheshimniń tıimsizdigine qaraı jaza bolatynyn bilgende ǵana barlyq shendiler jaýapty bolyp, ónimdi jumys isteıdi. Asqar Jumaǵalıevti osy ketkennen memlekettik qyzmetke qaıta kelmeıtindeı etip ketirdi dep úmittenemin. О́ıtkeni Jumaǵalıev mınıstr kreslosynda uzaq ýaqyt otyrdy. Bul aralyqta eldi sıfrlandyrýǵa mlrd-taǵan teńge jumsaldy.

 

Al karantın bilim, áleýmettik qamsyzdandyrý, densaýlyq saqtaý salalarynda, statıstalyq derekter bazasynda eshqandaıda sıfrlandyrýdyń joq ekenin áshkereledi.

  

Sonyń saldarynan 42500 teńge alarda halyq biryńǵaı jıyntyq tólemdi qalaı tólerin bilmedi, azamattar "SON"-dardyń aldynda saǵattap kezekte turyp, indet juqtyryp alyp jatty. Mektepter úsh apta onlaın oqytýǵa óte almaı aqyrynda zoom men whatsapp-qa kóship, bilim sapasy birden tómendep ketti. Statıstıka biriktirilmegendikten, indettiń naqty kórsetkishin bile almaı otyrmyz. Ǵarysh týraly birdeńe deýdiń ózi artyq. Bizde ol sala múlde kenjelep tur. Baıqońyr Reseıdiń basybaıly jeri sııaqty. Bul baǵytta memlekettik múdde qorǵalmaıdy. Ár aýdanda naýqastyń elektrondyq tólqujaty bar, telemedısınaǵa qosylýǵa múmkindik bar delingen. Is júzinde onyń biri de joq bolyp shyqty. Munyń bári tyrnaqshanyń ishinde aıtqanda "Jumaǵalıev jumysynyń jemisi". Al odan da keń masshtabta qarar bolsaq, eldiń tutas ekonomıkasy bılikke tamyr-tanys arqyly kelgen adamdardan, merıtokratııa qaǵıdaty múlde saqtalmaıtynynan zardap shegip otyr, – deıdi ol.

Toǵjan Qojalıeva "úkimetti tolyq aýystyrý kerek, alaıda bıliktiń kadrlyq saıasatyna qaraǵanda mınıstrler kabıneti birtindep aýysatyn sııaqty" dep sanaıdy.

– Mamın úkimeti koronavırýsqa qarsy kúreste sharasyzdyq tanytty. Bul – bir. Ekinshiden, ekonomıkalyq daǵdaryspen kúrese almaıtynyn kórsetti. Eldi bul daǵdarystan alyp shyǵýdyń naqty jolyn áli usynbady. Sondyqtan Mamın úkimetin tolyqtaı aýystyrý kerek. Bılikke ary laılanbaǵan, qoly bylǵanbaǵan jańa adamdar kerek. Alaıda sońǵy ýaqytta bolǵan kadrlyq ózgeristerge qaraǵanda, úkimet birtindep qana ózgeretin sııaqty. Onda da ishinara ǵana aýysatyn túri bar. Endigi kezekte júktelgen mindetti oryndaı almaǵan ulttyq ekonomıka mınıstri Rýslan Dálenov pen qarjy mınıstri Erulan Jamaýbaev ornyn bosatýy múmkin, – dedi qozǵalys jetekshisi.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir