Qazaqstannyń Densaýlyq saqtaý mınıstri Alekseı Soı aýrýhanada emdelip jatqan naýqastarǵa dári-dármek jetpeı jatqany týraly beıneúndeýge jaýap berdi. Bul týraly ol áleýmettik jelidegi paraqshasynda jazdy.

– Dostar Facebook-ten Aıda Boqaevanyń úndeýin kórdim. Áleýmettik jeli qoldanýshylary onyń baılanys nómirin berdi. Oǵan habarlastym. Aıda Boqaeva birneshe aı boıy qoǵamdyq bastamalarǵa qatysyp, aýrýhanadaǵy dárigerlerge kómektesip, naýqastarǵa qamqor bolyp, eden jýyp, sýsyn ákeledi. Ol aýrýhanada dárigerlerdiń qalaı erlikpen jumys istep júrgenin, sonymen qatar jumys barysynda kezdesetin máseleler týraly aıtty. Mundaıǵa beı-jaı qaramaıtyn adamdar maǵan, halyqqa jaǵdaı qalaı bolyp jatqanyn kórsetip, qajetti emge usynystar men durystap kómek kórsetý týraly ótinishterin aıtady. Biz medısınalyq mekeme ishinde ne bolyp jatqanyn qadaǵalaıtyn "halyqtyq baqylaý" quramyz dep kelistik. Halyqtyq baqylaý - jaǵdaıdyń qalaı bolyp jatqanyn baǵalaıdy, adamdarǵa qalaı kómektesý týraly usynystaryn jasaıdy, dári-dármek jetkilikti me joqpa, naýqastarǵa qalaı qyzmet kórsetilip jatyr, basshylyq ujym men naýqastarǵa qalaı kóńil bóletinin baqylaıdy, – dedi Soı.

Ol qajet bolǵan jaǵdaıda, ásirese jemqorlyq jáne qaıta satý sıpatty jaǵdaılar boıynsha qatań sharalar qoldanatynyn atap aıtty.

– Aıda bul jumysty óz qolyna alyp, aımaqtardy aralaýǵa ázir ekenin aıtty. Biz aımaqtar boıynsha osyndaı jumysqa óz erkimen qatysýǵa daıyn meıirimdi jandardy izdeımiz. Ulttyq volonterler júıesi osy jobaǵa qatysýǵa nıet bildirdi. Medısınalyq mekemelerge kirýdi biz qamtamasyz etemiz. Osylaısha jaǵdaıdy jaqsartý boıynsha naqty sheshim qabyldaımyz. Qazirgi ýaqytta qoǵamdaǵy jaǵdaıdy turaqtandyrý úshin bas biriktirý úlken úmit oıatady, – dep jazdy jelidegi paraqshasynda.

Eske sala keteıik belgili zańger Aıgúl Orynbek óziniń facebook-taǵy paraqshasynda aýrýhanada jumys istep júrgen volonterlerdiń densaýlyq saqtaý mınıstri Alekseı Soıǵa joldaǵan beıneúndeýin jarııalaǵan bolatyn. 

Eriktiler aýrýhanalar dári-dármekpen qamtamasyz etilgeni týraly derek jalǵan ekenin, oǵan ózderi kúnbe-kún kýá bolyp júrgenin, ony aıǵaqtaıtyn vıdeomaterıaldyń jetkilikti ekenin aıtqan bolatyn.

 

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir