«Qazaq daýysy» halyqaralyq án-kúı baıqaýy: bas júlde – 3 000 000 teńge!

«Qazaq daýysy» halyqaralyq án-kúı baıqaýy: bas júlde – 3 000 000 teńge!

«Qazaq daýysy» – «Qamshy.kz» portalynyń arnaıy jobasy. Baıqaý eń alǵash ret 2015 jyly ótken. Qazaqstan, Qytaı, Mońǵolııa elderindegi qandastarymyzdyń qatysýymen birneshe mıllıon aýdıtorııany qamtyǵan baıqaýdy álem qazaqtary erekshe yqylaspen qabyldady. Dúnıejúzin qazirgideı kúdik pen úreı bılegen zamanda eń aldymen eldiń rýhanı qýatyn arttyrý, kóńil kókjıegin keńeıtý maqsatynda atalǵan jobany bıyl da jalǵastyrýdy jón kórdik. Bul eń aldymen álemniń qaı túkpirinde, Qazaqstannyń qaı aımaǵynda bolsa da qazaq rýhanııatynyń bir tutas qasıetti qamal ekenin pash etetin joba! Endeshe, barlyq qatysýshylarǵa sáttilik! Ramazan Stamǵazıev bastaǵan óner maıtalmandary qazylyq jasaıtyn baıqaýda baq synap, 3 mıllıon teńgeniń ıegeri bolý – Sizdiń qolyńyzda!  

Qatysýshylarǵa qoıylatyn talaptar:

• Jas erekshelikteri: baıqaýǵa qazaq ánin shyrqaıtyn nemese qazaq kúıin tartatyn 16 jastan 35 jasqa deıingi kez kelgen qatysýshy qatysa alady (ultyna, memleketine, násiline, jynysyna shekteý qoıylmaıdy). 35 jastan asqan qatysýshylarǵa jobada baq synaýǵa múmkindik beriledi. Degenmen, olarǵa júldeli oryn emes, arnaıy syılyq taǵaıyndalady;
• Qatysýshy ózin kórermenge tanystyrý maqsatynda ózi jaıly beıne nusqada aqparat berýi tıis (ádemi, taza jáne tunyq jazylýy tıis);
• Vıdeo «Qamshy.kz» aqparat portaly uıymdastyrǵan arnaıy  «Qazaq daýysy» jobasy úshin, men (aty-jóni, shyǵarmanyń ataýy) oryndaımyn degen sóılemnen bastalýy kerek;
• Sapaly túsirilgen jeke fotosyn jiberý; 
• Baıqaýǵa tek jandy daýysta oryndalǵan ánder ǵana qabyldanady;
• Qatysýshynyń vıdeosy men fotosy [email protected] poshtasyna nemese Telegram-ǵa (8-700-221-21-63) jiberilý kerek;
• 2015 jyly «Qazaq daýysy» baıqaýynda júldeli oryndarǵa ıe bolǵan laýreattar qatyspaıdy;
• Baıqaýǵa ótinishter 2020 jyldyń 1 tamyzynan bastap qabyldanady;
• Baıqaýdyń I kezeńi 2020 jyldyń 1 qarashasynda aıaqtalady. Kelesi kezeńder týraly qosymsha aqparat beriledi.

Dástúrli án oryndaýshylary úshin

1-kezeń. Án oryndaýshynyń óz qalaýy boıynsha án oryndaýy (halyq áni, halyq kompozıtorlary, jańa zaman kompozıtorlarynyń  dástúr izimen oryndaýy).

2-kezeń. Dástúrli kásibı ánshi-kompozıtorlardyń bir áni (Birjan sal, Aqan Seri, Estaı, Abaı, Mádı, Muhıt, Kenen, Shaltabaı, Úkili Ybyraı, Jaıaý Musa, Qapez jáne t.b.). Altaı-Tarbaǵataı, Arqa, Jetisý, Batys Qazaqstan ánshilik mektepterinen oryndaýshynyń qalaýy boıynsha bir dástúrli án. Qatysýshy óz óńirindegi kóp estilmegen, jalpy kópshilikke tanylmaǵan dástúrli án oryndaýy kerek. Sol ánniń shyǵý tarıhy men qaı jerden alynǵanyn, qalaı shyǵarmashylyǵyna qosqanyn aıtyp berýi tıis.

3-kezeń. Qatysýshy tómende kórsetilgen ánderdiń birin tańdap, oryndaýy tıis:

• Áset «Qysmet»;
• Birjan  «Aıtbaı»;
• Muhıt «Pańkóılek»;
• Jaıaý Musa «Kókarshyn»;
• Kenen «Boztorǵaı»;
• Shaltabaı «Shaltabaıdyń áni»;
• Abaı «Segizaıaq»;
• Úkili Ybyraı «Qaraqat kóz»;
• Qalqa «Sarjazyq»;
• Jarylǵapberdi Jumabaıuly «Shama»;
• Berikbol Kópenuly «Aǵashaıaq»;
• Ajardyń áni «Ámirhan».

Ádilqazylar alqasy:

1. Ramazan Stamǵazıev, QR eńbek sińirgen ártisi, «Qurmet» ordeniniń ıegeri; 
2. Nurjan Janpeıisov, QR eńbek sińirgen qaıratkeri; 
3. Ardaq Isataeva, QR eńbek sińirgen qaıratkeri;
4. Janargúl Sárkenova, QR mádenıet salasynyń úzdigi.

Dombyramen kúı oryndaýshylary úshin

1-kezeń. Qatysýshy qalaǵan kúıdi oryndaý. Kúıge baılanysty dástúrli 7 oryndaý mektebi boıynsha 1 kúı tartyp berý (Altaı-Tarbaǵataı, Arqa, Qarataý, Batys Qazaqstan, Mańǵystaý, Jetisý, Syr boıy).

2-kezeń. Qatysýshy óz óńiriniń kúıshilik mektebinen bir kúıdiń  shyǵý tarıhyn baıandap, oryndap berýi kerek. Eskeretin jaǵdaı: kúıdiń tabıǵatyn, minezin asha bilýi, ár óńirdiń kúıshilik mektebiniń dástúrli qalpyn saqtap, kórkem oryndaýshylyq sheberligi baǵalanady. Kúıdi erkin, áserli jetkize bilýi kerek. Kúıdiń tarıhyn kórkem ádebı tilde baıandaýy shart.

2-kezeń boıynsha usynylǵan kúıshi-kompozıtorlar tizimi:

• Qurmanǵazy Saǵyrbaıuly;
• Táttimbet Qazanǵapuly;
• Qazanǵap Tilepbergenuly;
• Dáýletkereı Shyǵaıuly;
• Dına Nurpeıisova;
• Súgir Álıuly;
• Mámen Erǵalıuly;
• Abyl Taraquly;
• Esir Aıshýaquly;
• Myrza Totabolatuly;
• Álshekeı Bektibaıuly;
• Qojeke Nazaruly;
• Baıserke Qulyshuly;
• Tilendi Atabaıuly;
• Nurǵısa Tilendeıuly;
• Beıisbaı Shabanbaıuly;
• Beısenbi Dónenbaıuly;
• Baıjigit;
• Áshim Dúńshiuly;
• Qaıraqbaı Shálekenuly;
• Múkeı;
• Toqa Shońmanuly;
• Ábdı Rysbekuly;
• Qyzdarbek Tórebaıuly;
• Tólegen Mombekov;
• Ábiken Qasenov;
• Maǵaýı Hamzın.

3-kezeń. Kúrdeli 2 kúı oryndaý. Tómende kórsetilgen kúılerden 1 tókpe, 1 shertpe kúı oryndaýy tıis:

• Qurmanǵazy «Tóremurat»;
• Jantóre «Shalqyma»;
• Dına «Jiger»;
• Esir «Aqjarma»;
• Myrza «Tashaýyz»;
• Áshimtaı «Qońyrqaz»;
• Táttimbet «Sarjaılaý»;
• Súgir «Qosbasar»;
• Múkeı «Qosbasqan»;
• Áshim «Keńes»;
• Tilendi «Arman»;
• Qojeke «Qyzaılarmen qoshtasý».

Sybyzǵymen, qylqobyzben kúı oryndaýshylary úshin

1-kezeń. Qatysýshy qalaǵan kúıdi oryndaý.

2-kezeń. Halyq kúıleri nemese baqsy saryndaryn oryndaý. Eskeretin jaǵdaı: kúıdiń tabıǵatyn, minezin asha bilýi, ár óńirdiń kúıshilik mektebiniń dástrúrli qalpyn saqtap, kórkem oryndaýshylyq sheberligi baǵalanady. Kúıdi erkin, áserli jetkize bilýi kerek. Kúıdiń tarıhyn kórkem ádebı tilde baıandaýy shart.

3-kezeń. Sybyzǵymen kúı oryndaýshylary úshin: 

• О́serhan «Beıbitshilik qusy»;
• Kálek Qumaqaıuly «Arman»;
• Kálek Qumaqaıuly «Shopan sazy»;
• Halyq kúıi «Jaraly aqbóken»;
• Halyq kúıi «Bóken jarǵaq»;
• Halyq kúıi «Arbıan qońyr».

3-kezeń. Qylqobyzben kúı oryndaýshylary úshin: 

• Qorqyt «Qońyr»;
• Baýbek «Saryn»;
• Halyq kúıi «Aqqý»;
• Halyq kúıi «Muńlyq-zarlyq»;
• Yqylas «Jez kıik»;
• Yqylas «Aıraýyqtyń ashy kúıi»;
• Yqylas «Qazan».

Ádilqazylar alqasy:

1. Murat Ábýǵazy, QR mádenıet qaıratkeri, kúıshi-dombyrashy;
2. Batyrjan Myqtybaev, QR eńbek sińirgen qaıratkeri, kúıshi-dombyrashy;
3. Talǵat Muqyshev, QR mádenıet qaıratkeri, kúıshi-sybyzǵyshy;
4. Saıan Aqmolda, QR mádenıet salasynyń úzdigi, kúıshi-qobyzshy.

Estrada oryndaýshylary úshin

1-kezeń. Oryndaýshynyń óz qalaýy boıynsha qazaq tilinde bir án oryndaýy (aspatar: gıtara, fortepıano, estradalyq súıemel, tek estradalyq formatta).

2-kezeń. Halyq ánderin jáne halyq kompozıtorlar ánderin  oryndaý  (estradalyq formatta). Eskeretin jaǵdaı: qatysýshy óz óńiriniń sazgerleriniń shyǵarmalaryn oryndaýy kerek. Halyqqa tanylmaǵan ánder bolsa, ádil qazy alqasymen eskeriledi.

3-kezeń. Qatysýshy tómende kórsetilgen ánderdiń birin tańdap, oryndaýy tıis:

• Tólegen Muhamedjanov  «Qus joly»;
• Qýat Shildebaev «Qaıran kóńil-aı»;
• Baýyrjan Esebaev «Darıǵa júrek»;
• Medeý Arynbaev «О́mir –ózen»;
• Halyq áni «Nazqońyr»;
• Jeńis Seıdollauly «Armanym-aı»;
• Keńes Dúısekeev «Asyl ana»;
• Keńes Dúısekeev «О́kinbe sen»;
• Jeńis Seıdollauly «Aıala sen meni»; 
• Erlan Kókeev «Sen»;
• Beıbit Oraluly «Nur beıneń»;
• Jolbarys Seıfýllın «Arnaý»;
• Qýat Shildebaev «Jan ana»;
• Baǵlan Omarov «О́tken kúnder».

Estradalyq án boıynsha ádilqazylar alqasy:

1. Jubanysh Jeksenuly, QR eńbek sińirgen qaıratkeri;
2. Ushqyn Jamalbek;
3. Nurbolat Abdýllın;
4. Merýert Músiráli.

3 janrdaǵy qatysýshylar mindetti túrde eskerýi tıis: daýys dıapazony, akterlik sheberligi, til tazalyǵy, jergilikti aımaqtyq erekshelikterdi buzbaýy, aspap súıemeldeýi myqty bolýy,  dástúrli qaǵysty qoldana bilýi, án shaqyrýy, daýys qýattylyǵy, daýys ıirimderi, daýys regıstrlarynyń tolyqqandy oryndalýyna mán beriledi. Ulttyq mýzykalyq aspaptar súıemeldeýimen (mıkrofonsyz) oryndaýshylar úshin vıdeoda oryndaýshynyń qoly, denesi anyq kórinip turýy kerek. Dástúrli án oryndaýshylar úshin sahnalyq kıim úlgisiniń bolýy shart.

Baǵalaý sharttary: 

Júldegerler tyńdarmannan jınaǵan daýys sany jáne qazylar alqasynyń sheshimimen anyqtalady (Tyńdarman daýysy – 50 paıyz, qazylar daýysy – 50 paıyz). Qatysýshyǵa daýys berý saıttyń mobıldi qosymshalary (qamshy.kz - IOS, Android) arqyly júrgiziledi.

Qurmetti tyńdarmandar, kóńilińizden shyqqan qatysýshyǵa Qamshy.kz saıtynyń mobıldi qosymshasy arqyly daýys bere alasyz. Mobıldi qosymshany IOS, Android qoldanýshylary júkteı alady. Qamshy.kz portaly men «Qazaq daýysy» jobasynyń ınstagramdaǵy paraqshasy (@qamshy_media, @qazaq.dauysy) men Facebook áleýmettik jelisinde jarııalanǵan qatysýshy vıdeosyn qoldaýshylar sany men pikirler eskeriledi. Qytaıdaǵy qandastarymyz úshin arnaıy wechat jelisi iske qosylady.

Qosymsha aqparat:

E-mail: [email protected]
WhatsApp, tel.: 8 700 221 21 63
Wechat: aray_kural 
Wechat tekshe: qazaq_dauysy
Instagram: qazaq.dauysy
Facebook
Youtube

 Joba jetekshisi - Bilál Qýanysh