Etik tigip úı salǵan

Azamatty Kók bazardaǵy satýshylar men bazardyń turaqty kelýshileriniń kóbi biledi. Jibek joly kóshesi 54 úıdiń alǵashqy qabatyndaǵy 4 sharshy metrlik shaǵyn aıaq-kıim sheberhanasy onyń 2005 jyldan bergi jumys orny.

Sheberhanaǵa kireberis

Azamat Myrzaǵalıev 1985 jyly Qaraqalpaqstanda dúnıege kelgen. Balalyǵy Qaraózek aýdanynda ótti.

Etikshilik Myrzaǵalıevterdiń otbasylyq kásibi. Azamat mektepti bitirgennen keıin mehanık mamandyǵyna oqýǵa túskenimen, ómirlik kásibi retinde osy joldy tańdady.

20 jasynda aǵasynyń shaqyrýymen Qazaqstanǵa keldi. Sodan beri Kók bazarda taban aýdarmastan eńbek etip júr. Aıaq-kıimmen qatar sómke de tigedi. Jumysyna kóp almaıdy. Jeńil-jelpi jelimdeý, bir-eki jerin jippen ile salǵanǵa 200 teńge, synǵan tabandy aýystyrǵany, aınaldyra tikkeni úshin 1500-2000 teńge suraıdy.

Etikshi kezekti klıenttiń aıaq-kıimin tigip otyr

Jaz aılary ózi aıtqandaı «sezon» emes. Keıde tapqany shyǵyn men 4 sharshy metrdi jaldaýdan áreń asady. Al jumystyń qyzatyn kezi – kúz, qys kezderi. Klıentteriniń deni saýdagerler men bazar kelýshileri. Jyldar boıy turaqty kelip júrgender de jeterlik. О́ziniń sózinshe, negizinen aıaq-kıim tikkizýge turmysy qarapaıym turǵyndar keledi. "Túrimdi qazaqqa uqsata bermeıtindikten, alǵash kórgenderdiń kóbi oryssha sóıleıdi. Ákem de, sheshem de qazaq ekenin, ózim álimmin, naǵashylarym naıman rýynan dep aıtqannan keıin ǵana senedi" deıdi ol.

Etikshi biri ekinshisinen aýmaıtyn jyldardyń zymyrap ótip jatqanyn ata-anasyna erip kelip júrgen balalardyń eseıip ózderi kelip turǵanynda bir-aq ańǵaratyndaı. Osy ýaqyt aralyǵynda eshkimmen janjaldasyp kórmepti. Munysy jumysyn sheber isteıtin ismerliginen, eshkimmen shataǵy joq minezinen bolsa kerek. Keıde qaıta-qaıta qadap aıtatyn kirpııaz adamdardyń aıaq-kıimin tigý kezinde qyrsyqqandaı sátsizdikter bolyp turatynyn da jasyrmaıdy. Dese de 15 jylda basqa salaǵa ketý, jumys aýystyrý týraly oılap kórmepti. "Stroıkaǵa" keteıin deseń, isteı almaısyń. Qoldan keletini osy" deıdi jymıyp.

Azamat 2012 jyly otaý tikken kelinshegimen búginde úsh ul, bir qyz tárbıelep otyr. Shaǵyn sheberhananyń ash qaldyrǵan kezi bolmaǵan. Bireýden ilgeri, bireýden keıin degendeı turmys keship jatyr. Bastysy – baspanasyz júrgen joq. Kásibiniń arqasynda Talǵar jaqtan úı salǵan. Alystaǵy aǵaıynǵa da qaraılasady.

Azamat jumystan shyǵyp, Talǵarǵa taksı toqtatyp tur

Jýyrda ómirinde bir qaıǵyly, bir qýanyshty jaıt boldy. Qaraózektegi ákesi baqıǵa attanyp, arada eki-úsh kún ótkende tórtinshi perzenti dúnıege keldi. Shekara jabyqtyǵynan sheber áke zıratyna topyraq sala almady. Soǵan ǵana qynjylady. Jol ashylysymen qarashańyraqqa shuǵyl baryp qaıtpaq.