Belgili dintanýshy Baǵdat Beısenov qaıtys boldy

9 mamyr kúni Ál-Farabı atyndaǵy Qazaq ulttyq ýnıversıteti Fılosofııa jáne saıasattaný fakýlteti Dintaný jáne mádenıettaný kafedrasynyń dosenti, fılosofııa ǵylymdarynyń doktory Beısenov Baǵdat Qabyldauly qaıtys boldy.

Baǵdat Beısenov 1968 jyly 14 naýryzda Túrkistan oblysy Otyrar aýdany Sháýildir aýylynda dúnıege kelgen.

Ol 1996 jyly ál-Farabı atyndaǵy Qazaq ulttyq ýnıversıteti fılosofııa bóliminiń bakalavrıatyn támámdaǵan. 

1998-2000 jyldary ál-Farabı atyndaǵy QazUÝ fılosofııa jáne saıasattaný fakýltetiniń aspırantýrasynda oqyǵan.

2001-2010 jyldary ǵylym fılosofııasy jáne dintaný kafedrasynyń assıstenti, oqytýshysy, aǵa oqytýshysy, dosenti qyzmetin atqarǵan.

2002 jyly fılosofııa tarıhy mamandyǵy boıynsha "Máshhúr Júsip Kópeıulynyń áleýmettik fılosofııasy" taqyrybynda kandıdattyq dıssertasııa qorǵady.

2004 jyly memlekettik "Mádenı mura" baǵdarlamasyna aýdarmashy retinde qatysqan.

2010 jyly dintaný, fılosofııalyq antropologııa, mádenıet fılosofııasy mamandyǵy boıynsha "Qazaq rýhanııatyndaǵy ıslam qundylyqtary" atty doktorlyq dıssertasııany tabysty qorǵaǵan.

1 oqý quralynyń, tıptik baǵdarlamalardyń avtory, 5 oqý quralynyń soavtory. 70-ten astam ǵylymı maqala jazǵan. 

"Ulttyq qaýipsizdik aıasyndaǵy dinı aıqyndalý máselesi" (2007-2009 jj.), "Ulttyq ıdeıa aıasyndaǵy Qazaqstandaǵy dinder" (2008 j.), "Qazirgi zamandaǵy dinniń róli" (2011 j.) sekildi QR BǴM tarapynan bólinetin irgeli jobalar aıasynda ǵylymı qyzmetker retinde ǵylymı zertteýlermen aınalysty.

Beısenov Qabyldauly fakýltet pen kafedra tarapynan tapsyrylǵan qoǵamdyq jumystardy jaýapkershilikpen, ýaqytynda atqardy. Ǵylymı-zertteý jumysyn ustazdyq qyzmetpen sabaqtastyra biletin, jaýapkershiligi mol, áriptesteri arasynda qurmetke ıe qyzmetker bolǵan.

Ál-Farabı atyndaǵy Qazaq ulttyq ýnıversıteti Fılosofııa jáne saıasattaný fakýltetiniń ujymy Beısenov Baǵdat Qabyldaulynyń dúnıeden ozýyna baılanysty marqumnyń otbasy men týystaryna qaıǵyryp, kóńil aıtady.