Qazaqstanda 800-ge jýyq dáriger koronavırýs juqtyrǵan

Taýarlar men qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev Qazaqstanda 820 medısına qyzmetkeriniń koronavırýs juqtyrǵanyn málimdedi.

– Elde indet juqtyrǵan adamdardyń 30 paıyzy medısına qyzmetkerleri. Olardyń sany 820-ǵa jetti. Onyń negizgi bóligi – orta medısına qyzmetkerleri jáne kishi medısınalyq personal. Aıta ketetin jáıt juqpaly aýrýhanalarda vırýs juqtyrǵan dárigerler sany az, – dedi T. Sultangazıev.

Sonymen birge, spıker ınfeksııalyq stasıonarǵa qaraǵanda ádettegi emhana men aýrýhana qyzmetkerleriniń jıi aýyratynyn aıtty.

– Juqpaly aýrýlar aýrýhanasynda mamandar jeke qorǵanys quraldarymen júredi jáne ınfraqurylymnyń ózi «taza» jáne «las» aýmaqtarǵa bólýge múmkindik beredi. Al emhanalar men kópbeıindi aýrýhanalarda mundaı bólý qıynǵa soǵady. Onyń ústine kelýshiler sany kóp, olardan vırýs juqtyrý yqtımaldyǵy da artady. Táýlik boıy ǵımarattaǵy medısınalyq mamandar yqtımal naýqastarmen bir aýany jutýǵa májbúr, – dedi T. Sultanǵazıev.

Eske sala keteıik, Ulybrıtanııa álem elderindegi koronavırýstyq ólim-jitim mólsherin salystyratyn grafıkten Qytaıdy alyp tastady.