Birtanov: Jaz aılarynda koronavırýs indetiniń qarqyny tómendeıdi

Qazaqstannyń densaýlyq saqtaý mınıstri Eljan Birtanov tótenshe jaǵdaı boıynsha memlekettik komıssııanyń sońǵy sheshimi jaıly Facebook paraqshasynda jazdy. 

– Elimizde qabyldanǵan qatań karantındik sharalar koronavırýstyq ınfeksııanyń qarqynyn tómendetti, indettiń taralýy 28 naýryzda 52 paıyzǵa jetse, ótken táýlikte ol 12 paıyzǵa deıin tústi. Bul sanıtarlyq jáne medısınalyq qyzmettiń shuǵyl júktemesin azaıtýǵa, ınfeksııany juqtyrǵan jáne naýqaspen baılanysta bolǵan adamdarǵa tıimdi kómek kórsetýge múmkindik beredi, – dep jazdy Birtanov.

Mınıstr ózge memleketterdiń tájirıbesine qarap, elimizde indettiń negizgi kezeńi sáýir-mamyrda ótse, koronavırýs ınfeksııasynyń sharyqtaýy - sáýirdiń birinshi jartysyna tuspa-tus keletinin boljaýǵa bolatynyn jetkizdi.

– Bizdiń elimizde atalǵan aralyqta naýqastar sany 3 myń 500 jetýi múmkin (qazir 551). Epıdemıologtar aldaǵy ýaqytta, ıaǵnı, jaz aılarynda indettiń qarqyny tómendeıdi, biraq túbegeıli toqtamaıdy dep otyr. Keıbir sarapshylar epıdemııalyq maýsymnyń bıyl kúzde qaıtalanýy múmin ekenin joqqa shyǵarmaıdy. Sondyqtan da biz epıdemııa kezinde de, uzaq merzimdi kezeńde de muqtaj azamattarǵa tolyq medısınalyq kómek kórsetýge jan-jaqty daıyn bolýymyz kerek, – dep Eljan Birtanov atap ótti.

Sonymen qatar ol koronavırýstyq ınfeksııa juqtyrǵan naýqastardy emdeýge arnalǵan 3 920 ınfeksııalyq tósek-oryn, kúdikti pasıentter úshin 7 300 jýyq tósek-oryn ázirlengenin jáne 170 ókpeni jasandy jeldetý apparaty jáne 38 qannyń ekstrakorporaldyq membranalyq oksıgenasııasy apparaty (EKMO) ornatylǵan, jaǵdaıy aýyr 180 naýqasty qabyldaı alatyn reanımasııalyq bólimshelerdiń daıyn ekendigin atap aıtty.

– Emdelýshiler juqpaly aýrýlar aýrýhanasynda orta eseppen 3-4 apta jatady, sondaı-aq, eldi mekenderdiń tynys-tirshiligine qajetti qyzmet kórsetetin kásiporyndaǵylar, kúni-túni jumys istep júrgen polısııa, medısına jáne qarýly kúshter qyzmetkerleriniń ınfeksııa juqtyrýy ábden múmkin ekenin eskersek, bizge áli de kóptegen tósek-oryn men arnaıy aýrýhana qajet, – dedi mınıstr.