«Qytaı bıligi mysyq pen ıt etin jeýge tyıym salady». Sheteldik baspasózge sholý

Reuters: Qytaı bıligi azamattarynyń mysyq pen ıt etin jeýine tyıym salmaq.

Koronavırýs pandemııasy paıda bolǵannan beri Qytaıdyń Shenchjen qalasynda jabaıy janýarlar saýdasyn azaıýtý maqsatynda qala turǵyndarynyń ıt men mysyq etin jeýine tyıym salynbaq.

Ǵalymdar koronavırýs adamdarǵa janýarlardan juqqan dep kúdiktenedi. Alǵashqy koronavırýs Ýhan qalasyndaǵy jabaıy janýarlar bazaryna barǵan adamdardan tabylǵan bolatyn. Ol bazarda jylan, sıvıan jáne basqa da janýarlardyń eti satylǵan.

Shenchjen qalasy bıligi jarııalaǵan osyndaı shekteýden keıin, qala turǵyndary arasynda narazylyq týǵan. Alaıda, bul bastamany janýarlardy qorǵaý toptary qoldady.

Qytaı bıligi ıtter men mysyqtardy jeýge tyıym salatyn zań 1 mamyrdan bastap kúshine enetindigin málimdedi.

CNBC: Tramp Qytaı statıstıkasyna senimsizdik bildirdi

AQSh prezıdenti Donald Tramp sársenbide Qytaıdyń koronavırýs boıynsha statıstıkasy «tómendetilip kórsetilgen» dep málimdedi. AQSh prezıdentiniń ulttyq qaýipsizdik jónindegi keńesshisi de Pekınniń sandarynyń durystyǵyn bilý múmkin emes dep aıtty.

Respýblıkalyqtar partııasy jaǵynan Pekınniń derekterine kúmán keltirgennen keıin osyndaı kúdikter aıtylǵan. Bloomberg News AQSh barlaý qyzmetiniń aqparattary boıynsha Qytaıdyń ólim-jitim statıstıkasy senimsiz ekenin jazdy.

CNN: Italııada qarttar úıindegi qarttardyń úshten birinen astamy koronavırýstan qaza tapqan.

Italııanyń Mılan qalasy mańyndaǵy qarttar úıindegi egde jastaǵy azamattardyń úshten birinen astamy koronavırýs pandemııasynyń alǵashqy bir aıynyń ishinde kóz jumdy.

Sara Aragno sársenbide CNN-ge bergen suhbatynda naýryzdyń basynan beri Medıglııa mýnısıpalıtetinde ornalasqan Borromea Residence-tegi 150 turǵynnyń 63-i qaza tapqanyn aıtty.

Qarttardy aman alyp qalý asa qıynǵa soǵýda.

– Egde jastaǵy adamdardyń ólim salystyrmasy joǵary, koronavırýstan kóz jumǵandardyń 80%-dan astamy 70 jastan asqandar, – degen Italııa Densaýlyq saqtaý Joǵary keńesiniń basshysy Franko Lokatellı konferensııada.

The New York Times: Kóktemgi serýenge shyqqan 70 stýdenttiń 44-i koronavırýs juqtyrǵan

Nıý Iork Taıms AQSh-tyń Tehas shtatynda kóktemgi serýenge shyqqan 70 stýdenttiń 44-i koronavırýs juqtyrǵanyn jazdy.

Ostındegi Tehas ýnıversıtetiniń 70-ke jýyq stýdenti Meksıkada kóktemgi demalysyn ótkizgen. Artynsha olardyń arasyndaǵy 44 stýdentten koronavırýs anyqtalǵan.

Qazir stýdentter oqshaýlanǵan. Stýdentterdiń kópshiligi baqylaýda, dep habarlady ýnıversıtet basshylary.

70 stýdentten quralǵan top Ostın áýejaıynan 14 naýryzda Meksıkaǵa demalý úshin jolǵa shyqqan jáne olardyń kópshiligi 19 naýryzda oralǵan. Sapardy JusCollege atty kompanııa uıymdastyrǵan.

The Guardian: Álem boıynsha koronavırýs juqtyrǵandar sany mıllıonǵa jýyqtady.

Al, The Guardian basylymynyń jazýynsha, qazirge deıin álem boıynsha mıllıonǵa jýyq adam koronavırýs juqtyrǵan. Pandemııa búkil álemde 937 170-tan astam adamǵa juǵyp, olardyń 50 myńǵa jýyǵy qaza tapqan.