Elbasynyń tapsyrmasy boıynsha volonterler 4 kúnde 7 myń otbasyǵa kómektesti

Jıyn barysynda Qordyń qamqorshylar keńesiniń quramy jarııalanyp, oǵan belgili qoǵam jáne memleket qaıratkerleri, azamattyq qoǵam ókilderi men jastar kirdi.

Qor quryltaıshylary jınalysynyń sheshimi boıynsha Memleket basshysynyń usynystary eskerile otyryp, Qamqorshylar keńesiniń quramyna: Qamqorshylar keńesiniń tóraǵasy - «Nur Otan» partııasy Tóraǵasynyń Birinshi orynbasary Baýyrjan Baıbek, Qamqorshylar keńesi tóraǵasynyń orynbasary – Tuńǵysh Prezıdent Qorynyń atqarýshy dırektory Qanat Jumabaev, Qamqorshylar keńesiniń hatshysy – jýrnalıst, «Bas redaktorlar klýbynyń» prezıdenti Bıbigúl Jeksenbaı, keńes músheleri – Parlament Senatynyń depýtattary Nurtóre Júsip pen Olga Perepechına, Parlament Májilisiniń depýtattary Nurlan Ábdirov pen Baqtyqoja Izmuhambetov, «Volonterler lıgasy» Qoǵamdyq qorynyń tóraıymy Aısulý Ernııazova, «Ulttyq volonterlar jelisi» Zańdy tulǵalar qaýymdastyǵynyń tóraıymy Vera Kım,  «Mır cherez dýhovnost» qoǵamdyq birlestiginiń tóraıymy Saýle Mýhashova, «Ulttyq ǵylymı kardıohırýrgııa ortalyǵy» AQ Basqarmasynyń tóraǵasy Iýrıı Pıa jáne «Altyn Kyran» Halyqaralyq qaıyrymdylyq qorynyń prezıdenti Islambek Saljanov kirdi.

Qordyń joǵary basqarý organy – Quryltaıshylardyń jalpy jınalysynyń tóraǵasy Premer-Mınıstrdiń orynbasary Eraly Toǵjanov boldy.

Qordyń quryltaıshylary – «Ardagerler uıymy» (Baqtyqoja Izmuhambetov basqarady) jáne «Mır cherez dýhovnost» qoǵamdyq birlestikteri (Saýle Mýhashova basqarady).

«Birgemiz» Qorynyń Basqarma tóraǵasy Rýslan Sakeev qorǵa «Nur Otan» partııasynyń jan-jaqty kómegi qajet ekendigin atap kórsetti. О́ıtkeni osynaý qoǵamdyq birlestiktiń árbir óńirde fılıaldary jumys isteıdi, qajetti materıaldyq-tehnıkalyq bazaǵa ıe jáne «Jas Otan» jastar qanatynyń keń aýqymdy volonterlar jelisi bar.

– Birinshi otyrysty biz «Nur Otan» partııasynyń qabyrǵasynda ótkizip otyrmyz, óıtkeni onyń múmkindikterine súıengimiz keledi. Elbasynyń qoldaýymen qorǵa qarajat túsip jatyr, al halyqtyń aýqymdy bóligimen tıimdi jumys júrgizý úshin bizge ınfraqurylym, zor uıymdyq tájirıbe jáne adamdar qajet. Bul atalǵandardyń basym bóligi búginde tek partııada ǵana bar, – dep atap ótti Rýslan Sakeev.

Búginde jańadan qurylǵan qoǵamdyq qorǵa eldiń iri bıznes ókilderi 40 mln. dollardan astam qarajatty toptastyrdy. Bul qarajat Qamqorshylar keńesiniń sheshimimen halyqtyń áleýmettik osal toptaryna ataýly kómek kórsetýge baǵyttalatyn bolady. Qazir kómek túrleri men ony alýshylar sanattaryn anyqtaý boıynsha júmys bastaldy.

О́z kezeginde Baýyrjan Baıbek Qamqorshylar keńesi atynan Elbasy úndeýine qoldaý kórsetken bıznesmenderge alǵys aıtyp, qazaqstandyqtardyń birlese otyryp, kez kelgen daǵdarysty eńseretinine senimdiligin bildirdi.

– Elbasy, «Nur Otan» Lıderi Nursultan Nazarbaevtyń tapsyrmasy boıynsha biz ózimizdiń barlyq uıymdyq jáne medıaresýrstarymyzdy qordyń tıimdi jumys isteýi úshin aqysyz negizde usynamyz, – dedi Baýyrjan Baıbek.

Memleket basshysy Qasym-Jomart Toqaev jarııalaǵan «Biz birgemiz!» jalpy respýblıkalyq aksııasy aıasynda «Kedergisiz keleshek», «Baqytty otbasy» jáne «Ardagerlerdi ardaqtaıyq» partııalyq jobalary jelisi boıynsha halyqtyń ártúrli toptaryna áleýmettik kómek kórsetý qor qurylǵanǵa deıin bastalyp ketkenin atap ótken jón.

Elbasynyń tapsyrmasy boıynsha «Nur Otan» partııasy karantın jarııalanǵan Nur-Sultan jáne Almaty qalalaryndaǵy jalǵyz basty qarttarǵa, múgedekterge jáne turmysy tómen kópbalaly otbasylarǵa ataýly kómek kórsetý úshin 150 mln. teńge bóldi. Koronavırýs indetiniń taralýyna qarsy kúreske Elbasynyń sheshimimen Tuńǵysh Prezıdent Qory taǵy da 200 mln. teńge baǵyttady.

Búginde «Jas Otan» volonterlary men partııa belsendileri halyqtyń áleýmettik osal sanattaryn antıseptıka jáne gıgıena quraldarymen, birinshi kezekte qajetti taýarlarmen baılanyssyz taratý jolymen qamtamasyz etýde. Tek sońǵy tórt kúnde búkil el kóleminde 7 myńǵa jýyq otbasyǵa 130 mln. teńge somaǵa áleýmettik kómek kórsetildi.