Qazaqstanda koronavırýsqa baılanysty engizilgen tótenshe jaǵdaıdyń áreket ete bastaǵanyna ekinshi kún. Tótenshe shara kezinde memlekettik jáne qoǵamdyq oryndar qalaı jumys isteıdi, júrip-turý men ózge de kúndelikti qajettilikterdiń jaıy qalaı bolmaq degen saýaldardyń jaýabyn tómendegi materıaldan bilýge bolady.

Resmı oryndar jumysy

Nur Otan partııasynyń barlyq qoǵamdyq qabyldaý bólimderi turǵyndardy jeke qabyldaýdy ýaqytsha toqtatty. Al halyqqa qyzmet kórsetý ortalyqtary shtattyq rejımde jumys isteı beredi. Qyzmetkerlerge medısınalyq maska taǵý, antıseptıkter qoldaný, qoldy jıi jýý sııaqty koronavırýstan qorǵaný talaptary qoıylǵan. Jumys ýaqyty ádettegideı tańǵy 9:00-den keshki 20:00-ge deıin.

Balabaqsha men jataqhana

Qalyptasqan jaǵdaıǵa baılanysty balalardy balabaqshaǵa aparý-aparmaý ata-analardyń óz erkinde. Búldirshin balabaqshaǵa birneshe kún kelmese de onyń orny saqtalady. Balabaqshadaǵy oryndy alyp qoıatyn norma ázirshe toqtatyldy. Sondyqtan koronavırýsqa baılanysty bala balabaqshaǵa birneshe kún kelmese, orny týraly ýaıymdaýǵa sebep joq.

Elde 90 myńǵa jýyq stýdent jataqhanada turady. Búginde sonyń 20 myńnan astamy jataqhanalarynda qalǵan. Olar ol jerden shyǵarylmaıdy. Dese de qandaıda bir shekteý qoıylyp, rejım saqtaý boıynsha jumys júrgizilmek. Dese de oqý ornynyń ishki tártibine saı, stýdenttterdiń júris-turysyna talap ártúrli bolýy múmkin.

Jolaýshy tasymaly

Qazaqstan men Qytaı, О́zbekstan jáne Mońǵolııa arasynda avtobýspen jolaýshylar jáne júkterdi turaqty tasymaldaý toqtatyldy. Reseı men Qyrǵyzstanǵa qatynaıtyn avtobýstarmen jáne mıkroavtobýs reısteri eki esege qysqardy.

Áýe qatynasy boıynsha apta ishinde 49 turaqty halyqaralyq reıs pen 84 halyqaralyq reıs qysqartyldy. Qazaqstan men Qytaı, Iran, Ázerbaıjan arasyndaǵy turaqty reıster toqtaldy. 16 naýryzdan qazaqstandyq Air Astana, Scat áýe kompanııalarynyń, sheteldik Turkish Airlines, Fly Dubai, Etihad Airways, Air Arabia, Wizz Air, LOT Polish Airlines, Belavıa áýe kompanııalarynyń Germanııa, Ulybrıtanııa, Nıderlandy, Túrkııa, Ýkraına, Belarýs, BAÁ, Grýzııa, Úndistan, Vengrııa, Chehııa, Polsha syndy baǵyttarǵa 68 turaqty áýe reısi qysqartyldy. Sonymen qatar Scat kompanııasynyń Nur-Sultan-Antalııa, Almaty-Antalııa turaqty reısteri de qysqardy. Buǵan deıin «Lufthansa» kompanııasy Qazaqstanǵa reısterin óz erkimen toqtatqan.

Bazarlar men sýpermarketter

Almatydaǵy «Altyn Orda», «Optovka», «Baraholka», «Taý samaly» jáne taǵy basqa bazarlar jumysynda esh ózgeris joq. Tek «Baraholkadaǵy» «Iаlıan» bazary 10:00-17:00 aralyǵynda isteıdi.

Azyq-túlik satatyn sýpermarketter men gıparmarketterdiń kóbi ádettegideı rejımde jumys isteýin jalǵastyryp jatyr. Tek keıbir nysandar ýaqytynan 1 saǵatqa buryn jabylýy múmkin.

Oıyn-saýyq ortalyqtary

Tótenshe jaǵdaı jarııalanǵan alǵashqy kúni Almatydaǵy oıyn-saýyq ortalyqtarynyń birazy jumys istedi. Alaıda 17 naýryzda Mega Center, Mega Park saýda úıleri qyzmetin múlde toqtatqanyn habarlady. Sondaı-aq Globus ortalyǵy da ýaqytsha jabyq. Esentai Mall, Forum saýda úıleri ishinara ǵana istese, Aport Mall, Grand Park, Asia Park, Atakent Mall, Galereıa, Sputnik, Maxima, Mart, ADK, Moskva syndy ortalyqtar 10:00-den 18:00 aralyǵynda isteıtinin málim etti. Jumys rejımindegi ózgerister týraly aqparat oıyn-saýyq ortalyqtarynyń ınstagramdaǵy paraqshalarynda udaıy jarııalanýda.

Saýda nysandary ákimshiligine «kelýshiler tek maskamen ǵana jiberilýge tıis. Kelýshilerde maska bolmasa, tegin maska usynyp, koronavırýstyń aldyn alý boıynsha jadynama taratýlary qajet. Barlyq kirip-shyǵatyn esikterge teplovızorlar ornatýlary kerek» degen talap qoıylǵan. Oıyn-saýyq ortalyqtaryndaǵy kınoteatrlar men balalarǵa arnalǵan oıyn alańdary jabyq.

Toıhanalarda toı jasala ma?

Tótenshe jaǵdaı aıasynda toı-tomalaq jasaýǵa shekteý qoıylǵan. Meıramhanalarǵa bir aı kóleminde tapsyrys qabyldaýǵa bolmaıdy. Qamshy tilshisine pikir bildirgen «KUANYSH GRAND HALL», «Dıana» «Jetisý» restorandarynyń qyzmetkerleri ázirge toıǵa tapsyrys qabyldanbaıtynyn, tótenshe jaǵdaı jarııalanǵan 16 naýryz ben 15 sáýir aralyǵyna belgilengen jıyn-toılar keıinge qaldyrylyp jatqanyn málim etti.

Qazaqstan musylmandary dinı basqarmasynyń pátýasy

QMDB Ǵulamalar keńesi elde jarııalanǵan tótenshe jaǵdaıdy eskere kele meshitterde juma namazy ýaqytsha oqylmaıtynyn, árkim óz úıinde juma namazdyń ornyna besin namazyn óteıtinin málim etti.

Meshitter jabylmaıdy, bes ýaqyt namazǵa azan shaqyrylady, alaıda bes ýaqyt namaz meshitte jamaǵatpen oqylmaıdy.

Meshit janyndaǵy ashanalarda ótetin qudaıy as, sadaqalar (jetisi, qyrqy, jyly t.b. dástúrli kádeler) ýaqytsha toqtatylady.

Janaza namazyn tek jaqyn týystarymen, ıaǵnı az toppen ótkizgen jón.

Tótenshe jaǵdaı qajet bolǵan jaǵdaıda uzartylýy da, epıdemıologııalyq jaǵdaı ýshyqpasa, merziminen buryn da toqtatylýy múmkin.

Melis Seıdahmetov

Almaty oblysy Kerbulaq aýdany Qyzyljar aýylynda týǵan. Ál-Farabı atyndaǵy Qazaq ulttyq ýnıversıteti fılosofııa jáne saıasattaný fakýltetin bitirgen. 2015-2019 jyldary «Prezıdent jáne Halyq» gazetinde tilshi, shef-redaktor bolyp istegen. 2019 jyldan beri Qamshy portalynda qyzmet atqarady. Qamshy.kz saıtynyń bas redaktory.

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir