Dýlat Aǵadildiń anasy: Azanovqa esh renjimeımin, tek mazalamasa eken (vıdeo)

Qoǵam belsendisi, resmı aqparat boıynsha tergeý ızolıatorynda «júrek talmasynan» qaıtys boldy delingen Dýlat Aǵadildiń anasy Gúlbarash Jolmuhambetova men marqumnyń uly Nurbolat Aǵadil 2 naýryz kúni youtube jelisinde beıneúndeý jasap, zańger Baýyrjan Azanovty advokat retinde almaǵanyn, odan otbasyndaǵy jaǵdaıǵa aralaspaýyn surady. «Bizdiń óz advokatymyz bar» degen Nurbolat Aǵadil bul iske «aralaspasańyz» degen ótinishin jetkizdi. Artynsha, Aǵadil isi boıynsha zańger Aıman Omarova advokat bolyp taǵaıyndalǵany belgili boldy. Qamshy tilshisi máseleniń mán-jaıy týraly taraptardan surap kórdi.

Búgin Qamshy tilshisine pikir bildirgen zańger Baýyrjan Azanov jınalysta ekenin, óziniń áleýmettik jelidegi paraqshasynda jarııalaǵan jazbasy men beıneúndeýine  alyp-qosary joq ekenin málim etti.

4 naýryzda facebook paraqshasyna qaldyrǵan jazbasynda Baýyrjan Azanov Dýlat Aǵadilmen burynnan tanys ekenin, aralarynda senim men dostyqqa qurylǵan qarym-qatynas bolǵanyn aıtty.

«Sondyqtan da bolar Dýlattyń dostary ony ustaǵan kúni maǵan habarlasyp, advokattyq kómek kórsetýimdi surady. Dýlat maǵan sengendikten ara-tura járdemdesýimdi suraıtyn. Men bul iske suranǵan emespin (advokat úshin bul jat nárse bolǵandyqtan, eshqashan, esh jerge suranbaımyn). Dosymdy qorǵaýǵa shyqtym da kettim. Al tragedııa týraly estigende barlyǵy ashyq bolýy úshin oılanbastan máıitti soıýǵa qatystyrýdy talap ettim. Teridegi barlyq zaqymdar men jaraqat izderi vıdeo arqyly hattandyryldy. Buny Dýlattyń týǵan baýyry da kórip, ony rastady. Advokattyq qyzmet kórsetý týraly kelisim meniń qolymda bar» dedi Azanov.

Onyń sózinshe, ol sol sátte advokat retinde qajettiniń barlyǵyn jasaǵan.

«Men Dýlat úshin, onyń ıdealdary úshin tergeýdiń ashyq ári ádil ótýine bárinen buryn múddeli adammyn. О́tken jeksenbide Dýlattyń týǵandarymen júzdestim. Jaqynyraq tanysyp, apta ishinde atqarylǵan jumysty aıtyp berdim. Jaqyndary ádildikke jetýdi qalaıtyndaryn jetkizdi. Marqumnyń qabirin ashýǵa ruhsatyn bermedi. Men eshkimdi májbúrleı almaıtynymdy aıttym. Is-árekettiń birlesken jospary jasalyp, olar sol boıynsha jumys isteýge ázir edi. Sol kúni keshke qaraı Dýlattyń anasy men balasy jeke-jeke qońyraý shalyp, bir máseleler boıynsha keńesimdi surady. Al keshe meniń kómegimnen bas tartatyndaryn, meni kórgisi kelmeıtinderin aıtqan vıdeo shyqty», dep jazylǵan advokat jazbasynda.

Baýyrjan Azanov kóp ótpeı paraqshasyna Aǵadildiń anasyna arnaǵan beıneúndeý jarııalap, onda «sizdi syılamaıdy dep oılamasyn dep», osynda jaýap berip otyrmyn» degen.

Beıneúndeýde «mundaı qadamǵa barýǵa ne májbúr etti, meni túsinbegendikten osylaı jasasańyz, keshirińiz» degen zańger munan keıin Aǵadil áýletinde endigári qaıǵy bolmaýyna tilektestik bildirdi.

Qamshy tilshisimen sóılesken marqumnyń anasy Gúlbarash Jolmuhambetova advokatty eshkimniń yqpalynsyz, májbúrleýinsiz aýystyrǵanyn aıtty.

– Men óz erkim boıynsha, otbasymnyń erki boıynsha Aımandy (Omarova – red) qaladyq. "Baýyrjandy (Azanov – red.) advokat esebinde alamyn" dep aıtqan joqpyn. Bir-eki ret kezdestim, biraq «alamyn» dep aıtpadym. Men bes jasar bala emespin. Bireýdiń aıtqanyna ergen joqpyn. Kóńilim Aımandy qalady, Aımandy aldym, – dedi marqumnyń anasy.

Gúlbarash Jolmuhambetova «bul sheshimdi úıde, qabyrǵammen keńese otyryp qabyldadym» dep atap ótti. Sondaı-aq jeksenbi kúni Baýyrjan Azanovpen kezdeskenin, artynsha telefonmen keńes alǵanyn rastady. Biraq ol kezde «eshteńe aıta almaımyn, basym sheship turǵan joq. Bir jerge baryp kelem, sosyn kórermin. Ázirge advokat alǵan joqpyn» degen ol «Azanov ózi shyrqyrap júgirip júr. Aıman halyqaralyq bolǵan soń júregim sony qalady. Ádildikke jetkim keldi. Azanovqa esh renjimeımin. Tek mazalamasa eken. Aımandy aldym, boldy» dep atap ótti.

Aǵadildiń anasy Azanovqa bul sheshim týraly arnaıy habarlasyp aıtpaǵan, "ol beıneúndeýden bilgen shyǵar» dep topshylaıdy.

Qamshy tilshisine pikir bildirgen advokat Aıman Omarova «maǵan Dýlat Aǵadildiń týysqandary qońyraý shaldy. Artynsha týǵan týystary, Aǵadildiń anasy, balasy Almatyǵa keldi. Menen advokattary bolýymdy ótindi. «Sizderde advokat bar ma» dep suradym. Olar «joq» dedi. Men kelisimimdi berdim. Kelisim-shart jasastyq. Boldy. Maǵan kelmese, almas edim» dep jaýap berdi.

♦ Oqı otyryńyz: Aǵadildiń advokaty: Maǵan onyń mastyǵyn rastaıtyn qujatty kórsetken joq

♦ Oqı otyryńyz: Aǵadildiń qorǵaýshysy: Marqumnyń qabirin ashýǵa týra keledi