Toqaev Dýlat Aǵadildiń ólimine qatysty pikir bildirdi

Qazaqstan prezıdenti Qasym-Jomart Toqaev informburo.kz saıtyna bergen suhbatynda 25 aqpan kúni Nur-Sultandaǵy tergeý abaqtysynda kóz jumǵan qoǵam belsendisi Dýlat Aǵadildiń ólimi týraly aıtty. 

Prezıdenttiń sózinshe, Aǵadilldiń qazasy týraly resmı nusqaǵa qarsy pikir aıtý – shyndyqqa qarsy shyǵýmen teń.

– Qoǵamda úlken rezonans týdyrǵan ispen muqııat tanysyp shyqtym. О́kinishke qaraı, belsendi Aǵadil júrek talmasynan qaıtys boldy dep senimdi túrde aıta alamyn. Al buǵan qarsy pikir aıtý – shyndyqqa qarsy shyǵý. Marqumnyń kózqarasy, saıası ustanymy qandaı bolsa da, ol eń birinshi – adam. Adam ómiri bárinen de bıik ári qundy. Bárimiz Jartýshynyń qalaýyna boıusynamyz. Imandy bolsyn!, – dedi Toqaev. 

Dýlat Aǵadil 25 aqpanda tergeý abaqtysynda kóz jumǵan edi. Ishki ister mınıstrligi aldyn ala boljam boıynsha Aǵadildiń júrek talmasynan qaıtys bolǵanyn aıtty. Biraq belsendiniń  ólimine baılanysty áli naqty saraptama qorytyndysy daıyn bolǵan joq. Aǵadildiń jaqtastary men keıbir quqyq qorǵaýshylar onyń júrek talmasynan qaıtys bolǵanyna senbeıdi. Olar Aǵadil qazasyn onyń saıası belsendiligimen baılanystyryp, ólimine bılikti kinálap otyr. 

Toqaev qoǵamda úlken rezonans týdyrǵan Aǵadil ólimi týraly alǵash ret aıtyp otyr. Buǵan deıin eldegi saıası uıymdar, quqyq qorǵaýshylar jáne shetel dıplomattary Qazaqstan bıligin Dýlat Aǵadildiń ólimine baılanysty túsinikteme berýge shaqyrǵan bolatyn.