"Jas Alash" gazetiniń bas redaktory aýysty

Respýblıkalyq "Jas Alash" gazetiniń bas redaktory Inga Imanbaı qyzmetinen ketti. Bul týraly Imanbaıdyń ózi Facebook paraqshasynda habarlady. 

Imanbaıdyń jazýynsha, gazet basshylyǵynan ketýine oppozısııalyq saıasatker Janbolat Mamaıdyń áıeli bolǵany sebep. 

– О́zderińizge belgili, osydan bir jarym aı buryn men "Jas Alash" gazetiniń bas redaktory bolyp taǵaıyndaldym. Biz birden redaksııalyq saıasatty ózgertip, Nazarbaev pen onyń otbasy týraly ótkir materıaldardy basyp shyǵara bastadyq. Osyǵan jáne Janbolat Mamaıdyń jubaıy ekendigime baılanysty bılik tarapynan  gazet quryltaıshysy Altynbek Sársenbaıulynyń otbasyna qysym jasala bastady.  Beısenbi kúni men Altynbek aǵanyń jubaıy Saltanat Atýshevamen jáne nemere inisi Nurlan Sársenbaımen sóılestim. Olar maǵan Sársenbaevtar otbasynyń jaqyn týysyna qatysty qylmystyq is qozǵalyp, eger meni bas redaktor qyzmetinen ketirmese, onyń qamalatynyn aıtty.  Atýshevanyń aldynda eki tańdaý turdy: meni jumystan bosatý nemese týysynyń tutqyndalǵanyn kútý. Beısenbi kúni olarǵa bir vedomstvonyń generaldary kelip, meni sol kúni jumystan bosatpaǵan jaǵdaıda týysyn tutqyndaıtynyn aıtyp qorqytty. Árıne, Saltanat Atýsheva týysynyń erkindigin tańdady. Generaldar olarǵa Inga Imanbaı Mamaıdyń jubaıy bolǵandyqtan, gazettiń redaktory bolmaýy kerek degen talap qoıǵan. Janbolat gazetke qatysy joq degen barlyq dálelder qabyldanbady. Talap: meni jumystan shyǵarý. Jáne mindetti túrde 22 aqpan aldynda, – dep jazdy ol. 

Inga Imanbaı ózin redaktorlyq qyzmetten bosatqan gazet quryltaıshylaryna ókpesi joq ekenin jetkizdi.

– Saltanat Atýshevaǵa eshqandaı aıyp taǵa almaımyn. Ol meni gazette basshylyq qyzmette qaldyrýdyń barlyq amaldaryn jasady. Biraq bılik oǵan kúshti qysym kórsetti jáne ony osylaı jasaýǵa májbúr etti. Endi "Jas Alash" bıliktiń baqylaýyna tolyǵymen kóshetinin aıta ketý kerek, – dedi Imanbaı.

Inga Imanbaı – oppozııadaǵy belsendi, "Demokratııalyq partııa" bastamashyl tobynyń jetekshisi Janbolat Mamaıdyń jary. Ol bir aı buryn ǵana "Jas Alash" gazetine bas redaktor bolyp taǵaıyndalǵan edi. 

Búgin "Jas Alash" gazetine jańa bas redaktor retinde Qaırat Matrekovtyń taǵaıyndalǵany belgili boldy. Metrekov buǵan deıin birqatar mekemelerdiń baspasóz qyzmetinde, "QazTAG" aqparat agenttiginde, 365info.kz saıttynda jumys istegen.

1921 jyldyń naýryz aıynan shyǵa bastaǵan "Jas Alash" gazeti - qoǵamdyq, saıası-áleýmettik máselerdi qozǵaıtyn aptasyna eki ret shyǵatyn respýblıkalyq basylym. Gazet Qazaqstandaǵy sanaýly táýelsiz basylymdardyń biri sanalady. Keıbir aqparat kózderiniń deregine qaraǵanda, qazir gazet tolyǵymen 2006 jyly qastandyqpen óltirilgen saıasatker Altynbek Sársenbaıulynyń otbasyna tıesili.