Batalov "demagog" dep jumystan qýǵan sheneýnik ketpeıtin boldy

Osydan buryn jazǵanymyzdaı oblys ákiminiń halyqqa esep berý jıynynda Taldyqorǵan qalasynyń turǵyny óńir ákimine shaǵymdanǵan bolatyn.

Onda ol Ashat Meıramǵalıulynyń ózine aıtqan "Amandyq Batalovqa kirseńiz boldy, másele sheshiledi dep oılaısyz ba?» degen sózin dáıek ete otyryp óz máselesiniń áli kúnge deıin sheshilmeı kele jatqanyn jetkizgen. Dálirek aıtqanda, tórt balasy bar jalǵyzbasty Ana ata-anasynan muraǵa qalǵan páterdi rásimdeı almaı júr.

Osy rette, qolastyndaǵy sheneýniktiń jaýapsyzdyǵyna ashýlanǵan Amandyq Batalov: «Maǵan «demagog» kerek emes. Aryzyńdy jaz da, bar...Men keshe baıqaǵanmyn. Halyq maǵan kelgende, ol jóndi  jaýap ta bere alǵan joq. Mundaı adamdy «demagog» dep ataıdy. Demagog kerek emes. Aryzyn jazsyn. Sodan keıin myna kisiniń máselesin sheship berińder», - degen edi.

Alaıda, Almaty oblysy ákiminiń baspasóz hatshysy Ǵalymurat Jýkel synǵa qalǵan sheneýniktiń qyzmetinen ketpeıtinin, Qalıasqarovqa kópbalaly analar arasha túskenin jetkizdi:

«Ol aryz jazbady. Esep berý kezdesýinen keıin, kópbalaly analar bizge habaralsyp, ótinish aıtty, bir turǵynnyń aryzy búkil halyqtyń pikiri emes dedi. Analar áleýmettik jelilerge jáne oblys ákimine jeke-jeke hat jazyp, qala orynbasaryn ornynda qaldyrýdy surady. Turǵyndardyń pikirinshe, Qalıasqarov kópbalaly analarmen jaqsy jumys isteıdi. Osyǵan baılanysty ony jumys ornynda qaldyrý týraly sheshim qabyldandy, biraq budan bylaı eshkim onyń jumysyna shaǵymdanbaýy úshin oǵan eskertý jasaldy», - dedi Almaty oblysy ákiminiń baspasóz hatshysy Ǵalymurat Júkel.

Oqı otyryńyz: "Maǵan «demagog» kerek emes": Batalov esebinen soń Taldyqorǵan qalasy ákiminiń orynbasaryn jumystan shyǵarýdy tapsyrdy