"Jeńemiz dep oılamadyq" Sheneýnik Nur-Sultannan páter utyp aldy

"BI Group" qurylys kompanııasy páter satyp alǵandardyń arasynda jyl saıynǵy utys oıyndaryn oınatqan. Oǵan eki myńnan astam adam qatysyp, bas júldeni Qazaqstannyń aqparat jáne qoǵamdyq damý vıse-mınıstriniń orynbasary Ǵabıdolla Ospanqulov utyp aldy.

– Biz jeńemiz dep oılaǵan joqpyz. Sodan holǵa shyǵyp ketkenbiz. Endi qarasaq, ekranda bizdiń bıletimizdiń nómirin kórsetip tur. Bárimiz tańǵaldyq, páter utqanymyzǵa sengen joqpyz. Biz buryn da utysqa qatysqanbyz. Bıyl jolymyz boldy, – deıdi Ospanqulov.

Ǵabıdolla Abdollauly Ospanqulov 1981 jyly týǵan. Ońtústik Qazaqstan oblysynda dúnıege kelgen. Qazaq gýmanıtarlyq zań ýnıversıteti men Qazaq-Reseı ýnıversıtetinde bilim alǵan "Bolashaq" baǵdarlamasymen Ulybrıtanııanyń "Bırmıngem" ýnıversıtetinde oqydy.

2013-2017 jyldary bilim jáne ǵylym mınıstrliginiń jastar isteri jónindegi komıtetin basqardy. Jastar saıasaty departamentiniń dırektory qyzmetin atqardy. Din jáne azamattyq qoǵam isteri mınıstrliginde jumys istedi.

2017 jyldyń qazan aıy men 2019 jyldyń tamyz aıy aralyǵynda Batys Qazaqstan oblysy ákiminiń orynbasary boldy. Odan keıin Nur Otan partııasynyń hatshysy qyzmetine taǵaıyndaldy.

Ol ótken jyldyń sońynda aqparat jáne qoǵamdyq damý mınıstri Dáýren Abaevtyń orynbasary qyzmetine taǵaıyndalǵan.