«Qulynnan bulshyq et talshyq úlgilerin alamyz»: reseılik ǵalymdar jylqy etin qoldan jasamaqshy

Bul týraly «Qamshy.kz» aqparat agenttigi «Qazaqparat» deregin negizge ala otyryp habarlaıdy.

Tatarstandyq ǵalymdardyń aıtýynsha, tórt túlik maldyń ishinde Qambar Ata túliginiń etin tańdaýǵa osy azyq túrin súıip jeıtin tatar halqynyń dástúri sebep bolǵan.

«Et jasaý úshin bıopsııa kómegimen qulynnan bulshyq et ulpasynyń úlgilerin alamyz. О́ıtkeni qulynnyń etinde bizge qajet baǵanalyq jasýsha kóp. Sosyn bıologııalyq materıaldy arnaıy ınkýbatorǵa salamyz. Bul tehnıka durys temperatýralyq rejım men atmosfera quramyn qamtamasyz etedi, sondaı-aq jasýshalardyń ósýine qajetti taǵamdyq zattardy jetkizedi», – deıdi ArtMeat kompanııasynyń bas dırektory Asqar Latyshev.

Al 3D Bioprinting Solutions kompanııasy quryltaıshylarynyń basqarýshy seriktesi Iýsef Hesýanıdiń pikirinshe, keleshekte kúndelikti tutynýǵa arnalǵan arzan et óndirýge múmkindik bar. Ýaqyty kelgende ettiń bul túri qymbat restoran men dúkenderde paıda bolýy múmkin.

«2014 jyly ósirilgen jasýshanyń kılogramy $1 mln bolsa, qazir ol $1,5 myńǵa deıin tústi. Biraq bul ónim restoranǵa deıin jetýi úshin ony taǵy 100 ese arzandatý kerek, ıaǵnı $15 deıin. Meniń oıymsha, bul ábden múmkin», – deıdi Iýsef Hesýanı.

Sonymen birge, ǵalymdar jasandy jylqy etin óndirýdegi artyqshylyqtardy da atap ótken. Máselen, olar mundaı daıyn ónim alý úshin antıbıotok jáne basqa da adam densaýlyǵyna zııan preparattar qoldanylmaıtynyn, tipti, vırýstar men bakterııalardan qorǵalyp, qunary saqtalyp ósiriletinin aıtady.

Nátıjesinde, qoldan jasalǵan et pen kádimgi jylqy etiniń dáminde aıyrmashylyq bolmaıdy deıdi olar.

Atap óterligi, ArtMeat ósirgen alǵashqy farsh shamamen úsh jyldan keıin daıyn bolmaq. Qazir álemde et ósirý tehnologııasyn damytyp jatqan 30-ǵa jýyq joba bar.