Almatyda 9 myń adam emhana aýystyrdy

Bıylǵy tirkeý naýqany kezinde 9 myń almatylyq turǵyn emhana tańdaý quqyǵyn paıdalandy. Bul týraly búgin arnaıy brıfıng barysynda «Áleýmettik medısınalyq saqtandyrý qory» KEAQ Almaty qalalyq fılıalynyń dırektory Tileýhan Ábildaev habarlady.

Tileýhan Ábildaevtyń sózine súıensek, tirkeý naýqanyna qatysqan azamattar sany byltyrǵy jylmen salystyrǵanda edáýir qysqarǵan. Buǵan atalǵan kampanııanyń elektrondy sıfrlyq qoltańbanyń kómegimen, Egov elektrondy úkimet portaly arqyly júrgizilýi sebep. Onyń ústine, sońǵy kezde turǵylyqty jerindegi emdeý mekemesiniń qyzmetin paıdalanatyn turǵyndar sany jyl sanap artyp keledi.

– Sońǵy jyldary halyq arasynda, medısına uıymdary arasynda aqparattyq-túsindirý jumystary kóp júrgizildi. Buǵan emhana aýystyrýshylar sanynyń kúrt tómendeýi dálel bolsa kerek. Mysaly, jaqyn mańdaǵy emhana arqyly úıge dáriger shaqyrtýǵa yńǵaıly. Oǵan qosa, qazir jedel bolmasa, 4 sanattaǵy shaqyrtýlardyń bárine jergilikti emhana brıgadalary qyzmet kórsetedi, –  dedi fılıal dırektory.       

Bıylǵy tirkeý naýqanyna Almaty qalasynan 77 medısına uıymy qatysty. Onyń 38-i jekemenshik klınıkalar. Bul jeke bıznestiń memlekettik tapsyrysty oryndaýǵa degen qulshynysynyń artyp otyrǵanyn bildiredi.

Esterińizge sala ketsek, tirkeý naýqany qyrkúıektiń 15-inde bastalyp, 15 qarashada aıaqtalǵan bolatyn. Biraq tańdaý jasap úlgermegen azamattar emhanany basqa ýaqytta da aýystyra alady. Atap aıtqanda, basqa jerge qonys aýdarǵanda, emhana qaıta uıymdastyrylǵanda nemese Medısınalyq saqtandyrý qorymen kelisimshartty buzǵan jaǵdaıda da basqa emhanaǵa tirkelýge bolady. Sonymen qatar, ár turǵynnyń emhanany jylyna bir ret erkin tańdaý quqyǵy bar.