Almatydaǵy qoǵamdyq kóliktiń hal-ahýaly qandaı?

Almaty qalasy ákimdiginiń baspasóz ortalyǵynda qalalyq qoǵamdyq kóliktiń jaǵdaıy, damýy jáne onyń qyzmet kórsetý sapasyn arttyrý týraly brıfıng ótti, dep jazady ákimdiktiń baspasóz qyzmeti.

Brıfıng barysynda Qalalyq mobıldilik basqarmasy basshysynyń orynbasary Erlan Ádilov qalada jolaýshylardy turaqty tasymaldaýmen 14 avtoparktiń aınalysatynyn, olardyń 13-i jekeniki, al bireýi kommýnaldyq ekenin aıtty.

226 baǵyt uıymdastyrylǵan, onyń 120-sy qalalyq, (112 avtobýs, 8 trolleıbýs baǵyttary); qalaaralyq (oblysaralyq) – 45; qala mańy – 61. Aıta keterligi, qala baǵyttary boıynsha kún saıyn 1 mln 250 myńǵa jýyq tasymal bolady. Baǵyt júıelerin odan ári keńeıtý maqsatynda jańadan №33, 113, 204, 206, 208 baǵyttaryn ashý josparlanǵan, olar qala ishinde jáne qala mańyndaǵy túrli eldi mekenderge jolaýshylardy tasymaldaıdy.

Sońǵy bes jyl ishinde gazben jáne dızelmen júretin 1331 jańa avtobýs satyp alyndy. Bıylǵy jyly taǵy 450 avtobýs satyp alý josparlanǵan (AET – 260 birlik, jeke tasymaldaýshylar 190 birlik.), olardyń 222-si avtobýsy jetkizildi.

Qala mańyna júretin qoǵamdyq kólikti damytý maqsatynda bes turaqty baǵyt uıymdastyrylǵan, olar: «Saıran» avtovokzaly – Qaskeleń qalasy (№202 baǵyt, uzyndyǵy 29 km, jyljymaly birlik sany – 20, tarıf – 80 teńge, sýbsıdııa somasy – 155 mln teńge); metronyń «Raıymbek» beketi – Talǵar qalasy (№203 baǵyt, uzyndyǵy 40 km, jyljymaly birlik sany – 15, tarıf – 80 teńge, sýbsıdııa somasy – 449 mln tenge); Sport saraıy – «Pıoner» sanatorııi (№209 baǵyt, uzyndyǵy 33 km, jyljymaly birlik sany – 2, tarıf – 300 teńge); Sport saraıy – «Oı-Karaǵaı» sanatorııi (№210 baǵyt, uzyndyǵy 31 km, jyljymaly birlik sany – 2, tarıf– 300 teńge); Sport saraıy – Alma-Arasan (№211 baǵyt, uzyndyǵy 44 km, jyljymaly birlik sany – 2, tarıf – 300 teńge).

Qalada avtobýs jáne trolleıbýs baǵyttarynan ózge metro qyzmet kórsetedi. Almaty metropolıteni jyl saıyn 14 mıllıonnan astam jolaýshyny tasymaldaıdy. Bes jyl ishinde (2014-2018 jyldar) metrodaǵy jolaýshylar aǵyny 216 prosentke artty, eger 2014 jyly 6,8 mln bolsa, 2018 jyly 14,7 mln adamǵa deıin ósti. Aǵymdaǵy jyly metropolıten 12,9 mln jolaýshyny tasymaldady. «Saryarqa» jáne «Dostyq» beketteri paıdalanýǵa berilse, metro aýqymy keńeıedi, ıaǵnı Abaı dańǵylynyń boıymen Altynsarınnen Momyshuly kóshesine deıin 3,1 kılometrge uzarady. Munda jolaýshylar aǵyny táýligine 86 myń adam bolady dep kútilýde. Beketter qurylystarynyń aıaqtalý merzimi – 2021 jyl. Sonymen qatar, metronyń «Qalqaman» jáne «Batys avtovokzaly» atty eki beketiniń jobasy jasalýda.

Búgingi kúni «Ońaı» elektrondy bılet júıesi qalanyń qoǵamdyq kóliginiń quramdas bóligine aınaldy. Júıe iske qosylǵan úsh jyl ishinde 970 mln astam tranzaksııa jasaldy, qazirgi kezde kún saıyn 1 mln 250 myń tasymal jasalýda, «Ońaı» kartasyn 1 mln astam adam belsendi qoldanýda. Júıe tasymaldaýdyń ashyqtyǵyn arttyrdy, jolaýshylar aǵynynyń 40%-y, tranzaksııa tabysynyń 65%-y kóleńkeden shyǵaryldy. 2019 jyly «Transport holdıngi» JShS kompanııasy qosymsha jabdyqtar – termınaldar, server quraldaryn satyp alý jáne baǵdarlamalyq qamtamasyz etý úshin 280 mln teńgeni ınvestııalady.

«Ońaıdy» engizý tasymaldyń naqtyly ekonomıkasyna múmkindik berdi jáne sonyń arqasynda sýbsıdııa bóline bastady. О́tken jyly tasymaldaýshylardy qoldaý úshin qala bıýdjetinen 9 mlrd astam teńge bólindi. 2019 jyly bólingen 20 mlrd teńge – bul barlyq qala bıýdjetiniń 1/15 bóligi. Qazirgi kezde jolaqysynyń naqtyly baǵasy 220 teńgeden astam, al qala turǵyndary «Ońaı» arqyly nebári 80 teńge tóleıdi, ıaǵnı jolaqysynyń tek jartysyn ǵana. Azamattardyń birqatar sanattary (balalar, oqýshylar, stýdentter, múgedekter, zeınetkerler jáne basqalary) tegin júredi nemese 40 teńge tóleıdi.

– Qys mezgilinde úzdiksiz qyzmet kórsetý úshin qajetti qosalqy bólshekter (shınalar, akkýmýlıatorlar) satyp alyndy jáne JJM jetkizýshilermen kelisimshart jasaldy, – dep atap ótti «Almatyelektrotrans» JShS dırektory Ǵanı Tájıev.

Sapaly qyzmet kórsetý úshin áleýmettik mańyzy bar baǵyttardyń tasymaldaýshylaryna sýbsıdııa der kezinde bólinedi.

Koǵamdyq kóliktiń kestesi men ıntervalyn saqtaýda jedel shara qoldaný úshin dıspetcherlik qyzmettiń jumysy kúsheıtildi.