"Otandastar" qory oı-joba urlaı ma?

Qamshynyń elektrondy hat qorjynyna  "Aqtuıǵyn" JShS dırektory Armangúl Soltanmuratqyzynyń atynan "Otandastar" qory oı-joba urlaı ma?" degen taqyrypta hat kelip tústi. Qamshy - erkin pikir alańy bolǵandyqtan, Soltanmuratqyzynyń "Otandastar" qory kommersııalyq emes aksıonerlik qoǵamynyń jumysyn synǵa alyp jazǵan hatyn jarııalaýdy jón kórdik. 

Eskertý: Hat avtorynyń kózqarysy Qamshy.kz aqparat agenttiginiń ustanymyn bildirmeıdi. Eger "Otandastar" qory kommersııalyq emes aksıonerlik qoǵamy osy hatqa  baılanysty qandaı da bir túsinikteme beretin bolsa, Qamshy.kz aqparat agenttigi ony da jarııalaýǵa daıyn. 

Dúnıejúzi qazaqtary qaýymdastyǵy tóraǵasynyń birinshi orynbasary Z.Q. Turysbekov pen "Otandastar" qory kommersııalyq emes aksıonerlik qoǵamynyń prezıdenti N.Ábiqaevtyń nazaryna! Osydan bir jyl buryn joldasym, jazýshy Jádı Shákenuly Dúnıejúzi qazaqtary qaýymdastyǵy tóraǵasynyń birinshi orynbasary Z.Q. Turysbekovke jáne "Otandastar" qory kommersııalyq emes aksıonerlik qoǵamynyń prezıdenti N.Ábiqaevqa "Shetel qazaqtarynyń kitaphanasy"-syn ashý týraly oı-joba" taqyrybymen usynys hat jazǵan edi. Hatty 2018 jyldyń aıaǵynda atalǵan uıymdarǵa aparyp bergen bolatyn.

Atalǵan hatta: "Qazaq álipbıiniń ózgerýi men qytaı syndy elderdegi qandastarǵa jasalǵan buǵaý sebepti sheteldegi qazaqtarǵa qatysty qundy dúnıelerdiń bizden alystap, bólinip qalý qaýpi týyndap otyr. Sheteldegi nemese shetelden oralǵan qandastardyń ádebıeti men mádenıetine, rýhanı álemine janashyrlyq tanytý – qazaqtyń túgendelip jatqan baı qazynasyna degen qamqorlyq qana emes qazaq rýhanııatyn baıytýǵa qosqan úles sanalady.

Sol sebepti de osy úrdisterdiń sheshilýine oń yqpal etip, Elbasynyń "Uly dalanyń jeti qyry" maqalasynda aıtylǵan tól tarıhymyz ben tól muramyzdy ardaqtap el kádesine usyný úshin – "Shetel qazaqtarynyń kitaphanasy"-syn ashý ıdeıasyn usynyp otyrmyn" degen joldar bar bolatyn.

Úsh aı kútse de hattan esh jaýap bolmaǵasyn joldasym atalǵan uıymdarǵa kirip, hattyń jaýabyn suraıtyndyǵyn bildirgen edi. Birde «Otandastar» qory kommersııalyq emes aksıonerlik qoǵamynyń prezıdentiniń orynbasaralary Talǵat, Manatbekterge kirip atalǵan áńgimeni qaıta qozǵaǵanyn aıtyp, menimen aqyldasty. Ári Talǵat myrzanyń atalǵan jobany iske asyrýdyń naqtyly jobasy jóninde usynys-joba jazyp berseńiz degenin aıtyp keldi. Sóıtip, joldasym J.Shákenuly ekeýimiz jańa joba daıyndadyq. Kitaphana atyn "Otandastar kitaphanasy" dep ataýdy jón kórdik.

Atalǵan joba "Shetel qazaqtarynyń "otandastar kitaphanasy" týraly oı-joba" dep atalady. Jazbasha daıyndaldy. Bylaısha bastalady: "Joba "Otandastar" qory kommersııalyq emes aksıonerlik qoǵamynyń qarjylyq demeýshiligimen JK "Aqtuıǵyn" arqyly iske asady. Eger JK qujaty laıyqty emes dep tanylsa uıymdastyrýshylar jaǵynan ózge de zańdy tulǵalar usynylady.

Eki jaq ózara kelisken soń naqty  jumys barysy kelisim-shart arqyly júzege asady. QR zańnamasyn basshylyqqa alady.

Kitaptar qoryn toptaýdy uıymdastyrý, kitaphana jumysyn júrgizý, qyzmetkerler taǵaıyndaý, kitaphanaǵa tán ózgede is-sharalardy uıymdastyrý JK "Aqtuıǵyn" arqyly júredi".

Atalǵan joba "Otandastar" kitaphanasyn ashýdyń barlyq joldary men amaldaryn, is barysyn egjeı-tegjeıli baıandaǵan.  Hattyń sońyna  "Joba usynýshy:  JK "Aqtuıǵyn" jáne "Aqtuıǵyn" JShS dırektory Armangúl Soltanmurat (meniń esimim), Qazaqstan Jazýshylar odaǵynyń, Eýrazııa Jazýshylar odaǵynyń múshesi. Halyqaralyq Shyńǵyshan akademııasynyń akademıgi, jazýshy  Jádı Shákenuly» dep qol qoıylǵan.

Hatty atalǵan quziretti mekemelerge jetkizgen joldasym qýana jaýap kútip júrdi. Alaıda hattan taǵy da jaýap joq. Sosyn atalǵan joba boıynsha ózin qoldaýshy eki azamatpen birge "Otandastar" qory basshysy N.Ábiqaevqa kirmek bolyp arnaıy hat jazdy. Hatty birge daıyndaǵan edik.

"Otandastar" qory kommersııalyq emes aksıonerlik qoǵamynyń prezıdenti N.Ábiqaevtyń atyna jazylǵan ótinish hattyń mátini mynadaı: "Shetten oralǵan jáne oralmaqshy qazaqtarǵa kórsetiletin rýhanı-mádenı kómekter haqynda arnaıy saýaldarmen Sizdiń quzirettiligińizge kirýge ruqsat etip, arnaıy qabyldaýyńyzdy suraımyz.

Ult janashyrlary men zııaly qaýym ókilderinen:

"Astana 20 jyl" medalynyń ıegeri, QR "Ardagerler uıymy" Respýblıkalyq qoǵamdyq birlestiginiń Ortalyq keńesiniń múshesi, QR Tarıh jáne qoǵamdyq ǵylymdar akademııasynyń akademıgi, "Shıpaly emdeý ortalyǵynyń" dırektory Qaırat Aıdarhanuly, Qazaqstan jazýshylar odaǵynyń, Eýrazııa jazýshylar odaǵynyń múshesi, halyqaralyq Shyńǵyshan akademııasynyń akademıgi  jazýshy Jádı Shákenuly ult janashyry, qoǵam belsendisi, belgili kásipker Bilál Sqaq".

Atalǵan hatqa taǵy da jaýap bolmaǵasyn, joldasym J.Shákenuly ózin qoldaýshy kásipker azamattarmen aqyldasa kele, "Otandastar" qory qarjylyq demeý kórsetse boldy, kitaphana jobasyn iske asyrmaq nıetpen N.Ábiqaevtyń atyna taǵy da hat jazdy.

Hat "Otandastar kitaphanasy"-sy óz jumysyn bastamaq" degen taqyryppen bastalǵan.

Atalǵan hatta mynandaı joldar bar: "Atalǵan kitaphanany kitappen qamtý jáne oǵan jetekshilik etýshi belgili jazýshy Jádı Shákenuly alǵashqy adymda kitap qoryna qajetti 2 myńnan astam kitap qoryn daıyndady. 500 kitaptyń elnusqasy daıyndaldy. Basym paıyzy sheteldegi qazaq ádebıeti men tarıhyna arnalǵan basylymdar. Onyń ishinde qundy qoljazbalar men arhıvtik materııaldar da bar".

Hat osylaı jazyla kele «atalǵan sharany iske asyrýǵa – "Otandastar" qory, "Aqtuıǵyn" JShS, "Tarıhı Atajurt" qoǵamdyq birlestigi, t.b. zańdy tulǵalar men jeke kásipkerler qoldaý kórsetedi" deı kelip, "Otandastar" qorynyń da qarjylyq múmkindigine qaraı qoldaý bildiriýin suraǵan.

Bul hatta izim-ǵaıym joq. Teńizge tastalǵan ınedeı bolyp, joǵalyp ketti. Negizi qandaı mekemelerge jazylǵan hat bolmasyn arysy 1-2 aıda, berisi bir aptada jaýap hat berilýi kerek edi. Atalǵan hattardyń eshqaısysynan jazbasha nemese aýyzsha túrde jaýap kelgen emes.

"Aıta-aıta Altaıdy, Jamal apaı qartaıdy" demekshi, sóıtip, joldasym ekeýimiz atalǵan mekemelerden kúderimizdi úzip, kitaphana ashýdyń basqa joldaryn qarastyra bastadyq. Sóıtip, "Tuǵurul han – On han" korporatıvtik qorynyń qoldaýymen atalǵan joba ıdeıasymen "Tuǵyrylhan kitaphanasyn" ashýǵa kiristik. Alǵashqy adymda 3000 dana kitap qoryn toptap, jumysty bastap kettik.

Sóıtip jatqanda, jaqynda ǵana, ıaǵnı, osydan bir apta buryn qaýymdastyq pen otandastar qory atynan Talapbek Tynysbekuly degen aqyn inisi habarlasyp: "Qaýymdastyq pen Otandastar qory Ulttyq akademııalyq kitaphanamen birigip, sheteldegi qazaqtardyń otandastar kitaphanasyn ashaıyq dep jatyrmyz, soǵan kitaptaryńyzdy berińiz» degen ótinishin bildirdi. Bizdiń kisi (J.Shákenuly) oǵan da aıylyn jımaı, qýana maquldyq berip jatty.

Búkil istiń kýágeri bolyp júrgen men shyr-pyr bolyp edim: «kim iske asyrsada el úshin ǵoı, jasaı bersin! Bizde bastap qoıdyq, sheginerge jol joq. Bizde jasaı bereıik" deıdi. Aıtpaqshy, joldasymnyń hattary men jazbalaryna kómektesip otyratyndyǵymnen ol kisiniń jazǵan hattaryna da qanyqpyn. Ári atalǵan jobany belgili zańdy tulǵalar jáne JK "Aqtuıǵyn" men "Aqtuıǵyn" JShS arqyly iske asyrmaq bolǵanymyz úshin birlikte iske kirisip edik.

Burynǵylardan qalǵan: "qarnymnyń ashqanyna emes, qadirimnyń qashqanyna jylaımyn" deıtin bir sóz bar. "Otandastar" qorynyń oı-joba urlap, ony bizden búrkemelep, ıdeıa, joba-jospar – bári-birin egjeı-tegjeıli jazǵyzyp alyp, endi jalǵyz-aq kúnde "jarq etpekshi" bolǵandaryna qaıran qalyp otyrmyn!

Bárin aıt ta, birin aıt – quziretti mekemeler basshylarynyń osyndaı kóleńkeli oıyndarǵa barmaı, halyqqa adaldyqpen qyzmet etýin suraımyn!

Dúnıejúzi qazaqtary qaýymdastyǵy men "Otandastar" qory jaǵynan Ulttyq Akademııalyq kitaphana buryshynan ashylǵaly otyrǵan "Otandastar oqý zalyna" da, "Tuǵurul han – On han" korporatıvtik qory jaǵynan jańadan ashylǵan "Tuǵyrylhan kitaphanasyna" da  sáttilikter tileımin. Ekeýiniń de murat-maqsaty bireý. Bul bizdiń ǵana kútkenimiz emes, halyqtyń júregindegi izgi armannyń biri edi. Ásirese, ár túrli alańdaýshylyq týdyryp otyrǵan sheteldegi qazaqtyń ádebıeti men mádenıetin qutqaryp, olarǵa rýhanı dem berý – búgingi kúnniń ýaqyt kúttirmes qajettiligi sanalady!

       

Armangúl Soltanmuratqyzy,

«Aqtuıǵyn» JShS dırektory