• USD 389.52
  • EUR 429.21
  • RUB 6.07
  • CNY 54.94
21 Qarasha, 00:20:57
Qazaqstan Ýkraınanyń saýda naryǵyna alańdaýly

18 Qazan, 2019 NEWS

Erteń "Medeýde" jańa maýsym ashylady

Almaty ákimdigi belsendi demalysty jáne konkımen syrǵanaýdy unatatyndar úshin birqatar jańalyqtar daıyndady, dep habarlaıdy ákimdiktiń baspasóz qyzmeti.

Jańa maýsymda qonaqtardy birqatar edáýir ózgerister kútýde. Almaty qalasynyń ákimi B. Saǵyntaevtyń tapsyrmasy boıynsha muz aıdynyndaǵy servıstiń sapasy men deńgeıine erekshe nazar aýdarylǵan.

Birinshi kezekte, muzdyń sapasyna mán berilgen. Negizgi sheshim – muz qatyrǵyshtar sany ulǵaıtyldy. Budan bylaı kúndizgi jáne keshki daıyndyq jumystarynan ózge demalys kúnderi muzdy kúni boıyna eki ret daıyndyqtan ótkizedi. Seanstar ýaqyty qysqarǵan, bul muzǵa túsetin júktemeni azaıtady.

Ekinshi problema uzaq ýaqyt boıyna sheshimin tappaǵan uzaq-sonar kezek bolatyn. Jańa maýsymda bul máseleni sheshýdiń birneshe nusqalary usynylady. Birinshi – muz aıdynyna kireberis jerde biryńǵaı kassa jumys jasaıdy. Endi bir jerde bir ret barlyq qyzmet túrine aqy tóleýge bolady. Kirý bıletiniń, konkıdi jalǵa alýdyń, nusqaýshy qyzmetiniń quny tólem ishine kiredi. «Bir tereze» qaǵıdasynda qajet qyzmetterdiń tólemi qarastyrylǵan. Eger qonaq óz konkıimen kelse, onda jalǵa alýdy tóleýdiń qajeti joq.

Jańa maýsymda qaıta syrǵanaýǵa aqsha tóleýdiń qajeti joq. Endi muz aıdynyna kelgen qonaq 1000 teńgege konkı alyp, seans sońyna deıin syrǵanaýyna bolady. Bul tek aqshany únemdeýmen qatar, jalǵa alý kassasyna ekinshi ret kezekke turmaıtyndyqtan ýaqytty da únemdeıdi.

Ýaqytty únemdeýdiń ekinshi tetigi – onlaın-kassalar. Alǵash ret jolda kele jatyp nemese úıde otyryp qyzmet túrlerine aqy tóleý múmkindigi júzege asty. Bıletterdi bir aı buryn www.medey.info saıtynan alýǵa bolady. Úshinshi alternatıva – Onay tólem kartasy. Metrodaǵydaı budan bylaı kartany týrnıketke engizip, muz aıdynyna kezeksiz ótýge bolady. Júıe kelýshiniń jasyna oraı tarıf boıynsha kartadan qajetti somany alyp qalady. Aıtpaqshy, baǵalar týraly aıtar bolsaq, olar byltyrǵy deńgeıde qalǵan.

Konkılerdi jalǵa berý júıesine de ózgerister engizildi. Nysan ishi keń. Konkılerdi qaıraý men kafeterıı jeke lokasııada ornalasqan. Konkı beretin terezeler sany artqan. Nysan, kelýshiler jıi shaǵymdanatyn onyń ishindegi dárethanalar da jóndeýden ótken.

Qonaqtarǵa yńǵaıly bolý úshin konkıler sany 3500 jupqa deıin artty. Balalardyń qaýipsiz syrǵanaýy úshin qorǵanys komplektileri jáne syrǵanaýdy jańa bastaǵandarǵa arnalǵan qosymsha ınventar satyp alyndy. Onyń ishinde eń kishkentaı kelýshilerdi syrǵanatatyn «kıtter» de bar.

Qoǵamdyq tamaqtanýdyń bes tolyq lokasııasy jumys isteıdi, sonyń biri – ortalyq arendaǵy fýdkort. Mundaı ádis qyzmet kórsetýdi júıelendirýge jáne oǵan baqylaý jasaýǵa múmkindik beredi ári onyń deńgeıin arttyrady. Sonymen qatar, syrǵanaý kezinde durys demalatyn oryndar sany ulǵaıady.

Qoǵamdyq tamaqtaný júıesin transformasııalaý «Medeýdiń» tarıhı kelbetin qaıta jańǵyrtýdaǵy ortaq ıdeıany jalǵastyrady. Aǵymdaǵy jyldyń maýsymynan bastap 1972 jylǵy alǵashqy sáýlet jobasynda qarastyrylmaǵan elementter birtindep alynyp tastalýda.

Almaty ákimi B. Saǵyntaevtyń tapsyrmasy boıynsha tarıhı kelbet qalpyna keltirilýde. «Medeýdiń» 50 jyldyq mereıtoıy jaqyndap qaldy.

Eń aldymen, onyń aldyndaǵy jarnama konstrýksııalary alyndy. Kórý alańyndaǵy kassa da alynyp, tómengi deńgeıge aýystyryldy. Tamaqtanatyn kıoskiler súrilip, olardyń ornyna «Medeý» qoınaýynyń selden qorǵaıtyn bógetiniń kórý alańdarynda «qarlyǵashtar» stılıstıkasyn qaıtalaıtyn zamanaýı pavılondar paıda boldy.

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir