Nazarbaeva: Bireýiniń de nátıjesin kórmedik

Jambyl oblysynda pılottyq joba qolǵa alynyp, aýyl halqyna 2,5 prosentpen kredıtter jáne mıkrokredıtter berilmek.

Senattyń búgingi otyrysynda 2019 jylǵa arnalǵan naqtylanǵan respýblıkalyq bıýdjettiń jobasy qaraldy. Atalmysh joba ishinde Jambyl oblysy halqynyń tabysyn arttyrý boıynsha pılottyq jobaǵa bólinetin qyrýar qarjy da bar, – dep Qamshy.kz aqparat agenttigi habarlaıdy, Spýtnıkke silteme jasap.

Pılottyq jobanyń alǵashqy kezeńin iske asyrýǵa 7,2 mıllıard teńge qarastyrylǵan. Sonyń esebinen aýyl halqyna 2,5 prosentpen kredıtter jáne mıkrokredıtter beriledi. Merzimi – 5-7 jyl. Osy sharalardyń arqasynda kelesi jyly Jambyl oblysynda 7 myńnan astam otbasynyń tabysy 104 000 myń teńgege deıin ósedi degen jospar bar. 2021 jylda – 156 000 teńge, al 2022 jyly jobaǵa qatysatyn árbir otbasynyń tabysy 200 000 teńgege deıin artady.

Oblys ákimi Asqar Myrzahmetovtyń aıtýynsha, búginde barlyq esep-qısap jasaldy. Tipti, jem-shóptiń qunarlyǵy zerdelendi. Sebebi, aldymen jem-shóptiń arqasynda maldyń ónimdiligin arttyrýǵa bolady. Arzan kredıtter de osy kásipke beriledi. Al shaǵyn kredıtterdi qaıtarý kórsetkishi 95 prosent bolady degen boljam bar.

"Búginde 10 pılottyq okrýg anyqtaldy. Biz árbir aýyldy okrýgte kredıt berý ortalyqtaryn ashtyq. Ol jerde barlyq maman otyrady. Búginde pılottyq jobaǵa qatysýshylardyń jartysy óz qujattaryn rásimdep aldy. Endi, qarashanyń basynda aqsha oblystyq bıýdjetke tússe, ony taratýǵa bolady. Jyldyń aıaǵynda qarjyny ıgeremiz", – dedi Myrzahmetov senattyń búgingi otyrysynda.

Osy oraıda senat tóraıymy Darıǵa Nazarbaeva mańyzdy bir máselege toqtaldy.

"Negizi, biz "pılottyq joba" degen sózden úreılenemiz. Sebebi, osy salada "tájirıbe" bar. Buǵan deıin talaı pılottyq joba iske qosylǵan. Artynan onyń nátıjesin eshkim zerdelegen joq. Durys istedik pe? Burys istedik pe? Eshkim esep bermeıdi. Sonda birde-bir pılottyq jobanyń nátıjesin kórmeı kelemiz", – dep atap kórsetti Nazarbaeva.

Osy kezde oblys ákimi pılottyq jobanyń tıimdiligine arnalǵan kesteni kórsetkisi keldi. Biraq, senat tóraǵasy prezentasııany oqyp shyqqanyn jetkizdi.

"Biz prezentasııany oqydyq. Ol jerde barlyǵy jazylǵan. Qaǵaz bárin kóteredi. Endi, sonyń bári is júzinde assa eken deımiz...", – dep atap kórsetti Nazarbaeva.