Baspanamen qamtý – basty nazarda

Turǵyndardyń turmys sapasyn jaqsartý kún táirtibinen túsken emes. Bul baǵytta azattyqtyń alǵashqy jyldarynan aýqymdy jumystar atqarylyp, aıtarlyqtaı nátıjelerge qol jetkizilýde. Jyldan jylǵa halyq sany ósýde. Soǵan sáıkes suranystyń da arta túsetindigi túsinikti. Osy oraıda memleket deńgeıinde jańa jobalar men baǵdarlamalar qabylanyp, júzege asýda. Munyń barlyǵy da áleýmettiń áleýetin kóterýge baǵyttalǵan ıgi qadamdar.

Qazaqstan Respýblıkasynyń Prezıdenti Qasym-Jomart Kemeluly Toqaev «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda qazaqstandyq, ıaǵnı Nazarbaev modeliniń negizinde órkendeýdiń jańa kezeńine shyǵý jolyn aıqyndady. Bul qujat Prezıdentimizdiń saılaýaldy baǵdarlamasyn iske asyrýdyń ózegi bolyp tabylatyn bes basymdyqty belgilep berdi. Osy oraıda buqarany baspanamen qamtýdyń tıimdi tetikteri de qamtylǵanyn aıta ketý kerek. Bul baǵytta Jambyl oblysynda qyrýar tirlikter atqarylýda. Árbir aýdanda mysal retinde keltiretin ister jeterlik. Mysaly, Jýaly óńirinde de janǵa jylý syılaıtyn jumystar barshylyq.

Aýdanda turǵyn úımen qamtamasyz etý baǵytynda maqsatty jumystar atqarylýda. Baýyrjan Momyshuly aýylynda «Kóktóbe» jańa turǵyn úı alaby ınfraqurylymmen qamtamasyz etý jumystary júrgizilip, aıaqtaldy. Bul óz kezeginde áleýmettik nysandardyń qurylysyn júrgizýge jáne kezekte turǵan 170 azamatty jer telimimen qamtamasyz etýge múmkindik beredi.

Qarasaz aýylynyń sý júıesiniń qurylysyna respýblıkalyq bıýdjetten 2019 jylǵa jalpy smetalyq quny 616,29 mılııon teńgeni quraıtyn qurylys-montaj jumystaryna qarjy bólinip, memlekettik satyp alýdyń ashyq konkýrsynyń nátıjesine sáıkes «KDSM» JShS jeńimpaz bolyp anyqtalǵan. Jumystar mamyr aıynyń birinshi jartysynda bastalyp, sý jınaý ǵımaratynyń ornyn daıyndaý jáne jol boıynda sý qubyry jelisin tartý jumystary júrgizilip, qurylys jumystary búgingi kúnge 70 paıyz oryndalyp otyr. Bir sózben aıtqanda qurylys jumystary óz deńgeıinde júrýde.

Sonymen qatar bıyl kezekte turǵan az qamtylǵan kópbalaly bes otbasyna aýdan kásipkerleriniń qoldaýymen «Baýyrjan Momyshuly» qaıyrymdylyq qory arqyly baspana satyp áperildi. Jyl sońyna deıin taǵy eki otbasyna páter alyp berý josparlanyp otyr.