Qazaqstan boks federasııasynyń prezıdenti bolyp kásipker Keńes Raqyshev saılandy. Mundaı sheshim búgin, 9 qazanda ótken federasııanyń jyldyq konferensııasynda qabyldanǵan. Konferensııaǵa qatysqan federasııa ókilderniń barlyǵy Raqyshevtyń kandıdatýrasyn qoldap daýys bergen.
2009 jyldan beri boks federasııasyn Qazaqstandy 30 jylǵa jýyq úzdisiz bılegen Nursultan Nazarbaevtyń kúıeý balasy, kásipker Tımýr Qulybaev basqardy. Qazaqstan boks federasııasy resmı saıtynyń jazýynsha, Qulybaev "múddeler qaqtyǵysyn boldyrmaý úshin" óz qyzmetinen ketý týraly sheshim qabyldaǵan. Sondaı-aq, Qulybaev Sý sporty túrleri federasııasynyń prezıdenti qyzmetinen de ketken.
Qulybaevtyń orynyna kelgen Raqyshev 1979 jyly Almatyda týǵan. Ol - Qazaqstannyń saýda-ónerkásip palatasyn basqarǵan belgili memleket jáne qoǵam qaıratkeri Hamıt Raqyshevtyń uly, Qazaqstannyń joǵary bıliginde laýazymdy qyzmetter atqarǵan Imanǵalı Tasmaǵanbetovtyń kúıeý balasy. Raqyshev birneshe jyl Forbes jýrnalynyń reıtıngi boıynsha eldegi eń baı kásipkerlerdiń qatarynda boldy. Ol 2018 jyldyń jeltoqsanynda boks federasııasynyń vıse-prezıdenti bolyp taǵaıyndalǵan.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir