"Men seniń oıynshyǵyń emespin": Núkenova Bıshimbaevqa qandaı habarlamalar joldaǵan?!

Eks-mınısr Qýandyq Bıshimbaevqa qatysty búgingi sot otyrysynda Saltanat Núkenovanyń habarlamalary qaraldy. Prokýror marqumnyń jeke jazbalaryn da oqyp shyqty. 

2023 jyldyń 11 qazanynda joldanǵan habarlama: 

• "Men bári retteledi dep senip, kútip júrgende, bizdiń jaǵdaı bárine belgili boldy. Shildede barlyǵy tynyshtalyp, qabaǵyń ashyla bastap edi. Qalýyńdy ótingenimde de senbediń. Sen anańnyń sózin tyńdadyń, sebebi ol sen úshin ýaıymdaıdy. Men anańa seni súımeıtinimdi, aıaıtynymdy aıtqan joqpyn... Biraq ol bizdiń ajyrasqanymyzdy qalady. Sen olardy qorqytyp jatyrsyń. Balalar da bárin kórdi.  Kúızelip júrdim... Bir kúni adam sııaqty uıyqtaıyn dep edim... Biz nekede emespiz, ózimdi qorǵaı almaımyn, bárine jaman kórindim. Keshirim surasam da, menen qutylǵyń keldi, ol da nátıje bermedi. Endi men senen qutylǵym keledi..."

Núkenovanyń jeke jazbalary: 

• "Qýandyq, men Pavlodarǵa ketip baram. Qaıtyp kelmeımin. Aramyzda eshqandaı sezim joq ekenine kózim jetti. Sen kózime shóp salǵanyń úshin keshirim suraǵan da joqsyń. Bárine meni kinálap, "psıhoterapevtke qaral" dep qoımadyń. Eshteńe kórmeıtin soqyrlyǵyńdy kótere alar emespin. Meni keshir, bárin umyt ta, bosat. Bir sheshimge keldim. Endi ata-anammen bolam, olar maǵan qaraıdy".

• "Sálem, janym, osynyń bárine júregim aýyrady. Seniń osyǵan deıin istegenderińdi baǵalaımyn, biraq men mundaı qarym-qatynastan sharshadym. Bundaı ómir-ómir emes. Meniń seniń oıynshyǵyń da, balań da emespin. Aýrý adam emespin, sondyqtan maǵan 24/7 ne isteý keregin úıretpeı-aq qoı. Meniń óz isim bar. Mahabbat pen otbasyny saqtap qalý úshin ózara syılastyq qajet. Biz bir-birimizge medet bolýymyz kerek qoı, jaý emespiz, jyndy adamsha jaýlaspaıyq. Qarym-qatynasymyzdy talqylaı berýden sharshadym. Saǵan "urys-keristi kóńilime jaqyn qabyldaımyn" dep aıtqan edim. Sonyń kesirininen júıkem syr berdi. Endi óz-ózimmen jumys istep, sen úshin ózgerýge tyrysamyn, saǵan unaý úshin bárin isteımin". 

Sonymen qatar, prokýror Bıshimbaevtyń Saltanat Núkenovaǵa tún ortasynda qońyraý shalýdy ádetke aınaldyrǵanyn da tilge tıek etti. 

"Túngi saǵat 2:32, 2:38, 3:14, 3:19, 3:20, 3:32, 3:37, 3:39 shamasynda Bıshimbaev qońyraý soqqan. Jaýap bermegen sátte "Salta, tutqany kóter" dep jazǵan, birneshe aýdıohabarlama jibergen", – dedi ol.