"Osynyń bárine kim jaýap beredi?": Qaraǵusova nege ashýlandy? (vıdeo)

Májilis depýtaty Gúljan Qaraǵusovany AÁK alatyndardyń sany tańǵaldyrdy dep jazady Qamshy.kz aqparat agenttigi. 

"Men bir suraq qoıǵym kelip tur, biraq jaýap berýdiń qajeti joq. Barlyq aqshany ózim esepteımin. Bizde qazir buryn-sońdy bolmaǵan jaıt oryn alyp otyr. Qazaqstan táýelsizdiginiń búkil tarıhynda ataýly áleýmettik kómek alatyn 1 mıllıon 800 myń adam eshqashan bolǵan emes. Elimizde 8 mıllıon ǵana eńbekke qabiletti adam bar. Men taǵy da salyq tóleýshiniń aqshasy týraly aıtyp otyrmyn. 2007 jyly men mınıstr qyzmetinen ketkenimde jaǵdaı óte nashar boldy. Shyndyǵynda sol jyldary jumys ta, aqsha da bolmady, biraq biz bul sandy bir jarym mıllıonnan 500 myńǵa tómendettik. Al qazir jumyspen qamtý týraly túrli baǵdarlamalar bar kezde bizge ne boldy?", - dedi Qaraǵusova.

Depýtat elimizde jumyspen qamtýdy qoldaý baǵdarlamalary únemi engizilip kele jatqanyn atap ótti.

"Biz eshqandaı shekteýsiz "Atamekenge" oqytýǵa, qaıta daıarlaýǵa múmkindik berdi. Mıkrokredıtter de berildi. Biz ındýstrııalyq-ınnovasııalyq damýdyń memlekettik baǵdarlamasynyń ekinshi besjyldyǵyn iske qostyq - 1200 kásiporyn ashyldy. Endi ne boldy? Osynyń bárine kim jaýap beredi? Sondyqtan, maǵan jumys tobyna esep berińiz. Jumyspen qamtý baǵdarlamalaryna qansha qarajat jumsaldy? Osyǵan deıin qansha mıkrokredıt berildi? Bul suraqtardy birinshi ret qoıyp otyrǵanymyz joq. Sizder osy suraqtarǵa jaýap berińizder al biz taldaýdy ózimiz jasaımyz", - deıdi Qaraǵusova.