Prezıdent joldaýy – órkendeýdiń negizi

Baızaq aýdanyndaǵy ál-Farabı atyndaǵy mádenıet úıinde Qazaqstan Respýblıkasynyń Prezıdenti Qasym-Jomart Toqaevtyń Qazaqstan halqyna arnaǵan Joldaýynyń basym baǵyttaryn túsindirýge arnalǵan jıyn ótti. Oǵan mádenıet salasynyń ardagerleri, klýb jáne kitaphana meńgerýshileri, kitaphanashylar qatysty.

Aıtýly sharany aýdan ákimdigi ishki saıasat bóliminiń basshysy Saltanat Imanova ashyp, Joldaýda kórsetilgen negizgi baǵyttarǵa qysqasha toqtaldy. Saltanat Báıteliqyzy Memleket basshysy bekitip bergen basty mindetter - halyqtyń ál-aýqatyn jaqsartýǵa baǵyttalǵandyǵyn jetkizdi.

Budan ary sóz alǵan spıker, aýdan ákimdigi mádenıet jáne tilderdi damytý bóliminiń basshysy Sáken Syzdyqov Memleket basshysynyń «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» atty Joldaýynda aıtylǵan mańyzdy baǵyttar: ınklıýzıvti qoǵam qurý, bilim berý, medısınalyq qyzmettiń qoljetimdiligi men sapasyn kóterý, shaǵyn jáne orta bıznesti órkendetý, otandyq zeınetaqy júıesin damytý, sybaılas jemqorlyqpen kúres syndy máselelerdi sheshý kózdelgendigin baıandady.

– Prezıdent óziniń Joldaýynda elimizdiń táýelsizdigin, onyń ekonomıkalyq áleýeti men adam kapıtalyn odan ary nyǵaıtý jáne halyqtyń ál-aýqatyn arttyrý mańyzdy ekendigin basa aıtqandyǵyn alǵa tarta otyryp, aldaǵy jyldan bastap, mádenıet qyzmetkerleriniń, sonyń ishinde, kitaphana, mýzeı, teatr qyzmetkerleriniń eńbekaqylary kóteriletindigine ekpin saldy. Halqymyzdyń maqtanyshtary: ál-Farabıdiń 1 150 jyldyq, Abaı Qunanbaıulynyń 175 jyldyq mereıtoılaryn atap ótý kezinde, olardyń eńbekterin halyq arasynda dáripteýde júktelip otyrǵan mindettiń aýqymdylyǵyn áńgimeledi. Halyqty alda turǵan maqsattarǵa qol jetkizýge jumyldyratyn qujattyń mańyzdylyǵyn atap ótti.

Prezıdenttiń: «Elimizdegi etnostyq toptardyń tili men mádenıetin damytýǵa jaǵdaı jasaı beremiz. Qazaq tiliniń memlekettik til retindegi róli kúsheıip, ultaralyq qatynas tiline aınalatyn kezeńi keledi dep esepteımin. Biraq mundaı dárejege jetý úshin bárimiz dańǵaza jasamaı, jumyla jumys júrgizýimiz kerek.

Sondaı-aq, til úlken saıasattyń quraly ekenin de umytpaǵan jón» –degen sózine súıene otyryp, Sáken Shámshiuly el birligin saqtaý, etnosaralyq tatýlyqty nyǵaıtý baǵytynda qolǵa alynatyn jumystardy basa aıtty.

Jıyn barysynda «Prezıdent usynǵan baǵyttardy iske asyrýda qandaı qadamdar jasaımyz?» degen saýal tóńireginde áńgime órbidi. Baızaq aýyldyq klýbynyń meńgerýshisi Shyrynkúl Toqbolatova qoǵam men bıliktiń ózara yqpaldasqan is-qımylynyń ózektiligin aıtsa, mádenıet úıiniń ádiskeri Gúlnaz Álimqulova mádenıet salasy ókilderine kórsetiletin qamqorlyqqa kóńili tolatynyn jetkizdi. Sondaı-aq kitaphanashylar da qundy pikirlerin ortaǵa saldy.