Muhamedjan Tazabekov áleýmettik jelide bılikti nege synamaıtynyn aıtty

"Nege halyqty sabyrǵa shaqyra beresizder, bıliktiń de qatesin aıtpaısyzdar ma?"

Birneshe oqyrmanym osyndaı saýal joldaǵan eken...

✅Elden úlken emespiz, kóptiń suraǵyna kókeıimdegi birneshe oımen bólise keteıin.

♦ Birinshiden, qaraıǵan xalyq ınternet qarap, ýatsab ashyp, áleýmettik jelide otyrǵandyqtan elge eń kerek degen oıymdy osynda jazamyn. Ol múmkin "sabyr" jaıly, bálkim "otbasylyq qundylyqtar" týraly nemese "adamı qarym-qatynastar" jaıly bolýy múmkin...

♦Al, bılik ókilderi kóbinde áleýmettik jelini pende retinde qaraǵanmen, sheshýshi sheneýnik retinde janyna jaqyn qabyldaı bermeıtini anyq. Sondyqtan da, aıtqym kelgen aqıqatym, jetkizgim kelgen talabym bolsa, onyń basqa joldaryn qarastyrǵandy táýir kóremin...

♦Maǵan, qolpashtaýshylardyń: "Pax, shyndyqty aıttyń, batyr ekensiń. Seni depýtat qylý kerek, bizdiń Muxań molodes" degen maqtaýy kerek emes. Elge paıdaly sharýanyń sheshilgen nátıjesi kerek. 

♦Áleýmettik jelide attandamaı-aq, ákim, mınıstr, shynjyr balaq, shubar tósterdiń kez-kelgenine kirip te, jazyp ta jetkize alatyn bolsam alystan arqan laqtyryp qaıtemin. Talaı muqtajdyń talabyn jetkizip, talaı jyrtyqqa jamaý taýyp bergen bolsam, kimge ne dep maqtanýym kerek?!
Nemese, "búıttim, sóıttim" dep, esep berip otyrý ádepke de jata qoımas, dep oılaımyn.
Áleýmettik jeli – keıde ashyq taqta nemese jabyq kúndeligiń sııaqty. Ańqyldaǵan tusta ashylyp-shashylyp, keıde tyrs etip, túk jazbaı, teris qarap júretin keziń de bolady. 

♦О́kpeli talaı dostaryma aıtqanmyn: "Ata zań ruqsat berip tur, qolyńnan kele me, ashyna bermeı, ashyq oppozısııaǵa shyq, bedel jına, qarjy jumsa, múddeles partııa tap, depýtat bol, ókimet quramyna kir, baǵdarlama usyn, eldiń senimine ıe bol...
"Joǵa jolatpaıdy ǵoı" deısiń...

♦ Ondaı irilik qolyńnan kelmeı me, olaı bolsa, qoǵamdyq uıymdardy qoldan, bedeldi, yqpaldy tulǵalarǵa shaǵyn, únińdi solar arqyly jetkiz. Hat jaz, usynys aıt, zańǵa súıenip zar ıle...

♦ Ol da nátıje bermese, otbasyńa buryl. Ul-qyzyńdy bilimdi, alǵyr, jan-jaqty qyp tárbıele. Bıikke ushyr, "Bolashaqpen" oqyt...
Buryn patshalardyń balasy ǵana alǵan bilimdi, qazir qarapaıym sharýanyń da balasy alyp jatyr...
Sóıtip, birin bılikke, birin kásipke baýly...
Býyn aýysady, tolqyn jyljıdy. At tuıaǵyn taı basady...
Múmkin, solar armanyńdy oryndar...

♦ Oǵan da jaǵdaıyń kelmese ıaǵnı, partııaǵa barmasań, tulǵalardy tanymasań, perzentteriń tolymdy bolmasa, alaqan jaı da Allaǵa duǵa qyl. Ol da úlken múmkindik!
Alla estimeıtin, qabyl etpeıtin duǵa joq. Eger soǵan laıyq bolsań.

♦ Al, munyń biri de qolyńnan kelmese, qur beker oqyrmandy yza qyp, ashýyn qozdyryp, otqa maı quıyp, ishirtkideı postyńmen ish bosatyp, eldiń postyna ekilene pikir jazý erlik pe?!

♦ Qaraptan qarap, júıkeńdi tozdyryp, júregińdi qaraıtyp, aldamshy maqtaýǵa nápsiń semirip, úıde otyryp úrlenip, óziń aıtqan úlken sózge óziń aldanyp, "alańǵa kettik" degende, "sharýań shyǵyp qap", "balpańdap basqyń kelgenmen, baltyryń shydamaı", aqyr sońynda "e, bári bitti, el bolmaımyz" dep qol siltep, púshaıman xalde júresiń...

♦ Azdan soń báıbisheńe jýastý kózben qarap, qarynyńnyń ashqanyn bildirip, qazan jaqqa jaýtańdaı qaraýyń – eń shynaıy beıneń emes pe? Menmensigen qý nápsiniń qalaýyn xalyqtyń atynan aıtyp, jalqaýlyq men qyrsyqtyǵyńdy bireýdiń qateliginiń astyna jasyryp qaıtesiń?! 

♦ О́zińniń jeke renshiń men ókpeńdi, óziń jete almaı qalǵan tabys pen mansapty eldiń atynan túgendep qaıtesiń?!
Bireýdiń baılyǵy men otbasylyq ustanymyn kústanalap, ǵaıbatqa kirip nemiz bar, bıik bılik túgili tóbeniń tóńireginde taıǵanap júrmiz...
Qudaı basqa bermesin! 
Bas aınaldyrar baq qonsa, talaıdyń kózi tóbesine bitip, tabany jelkeńde turatyny aıtpasa da túsinikti aqıqat qoı...
Alla ózi saqtasyn!

♦ Osylaı dep aıtqanymda, ókpeshil dostarymnyń deni oılanyp qaldy...

♦ Al, ózim oppozısııa bop, partııa ańsap, bılikke balama jol usynýǵa nıetti emespin. Odan bólek úsh baǵytta qoldan kelgen qareketti jasap júrmiz, el múddesi jolynda eshteńeden aıanyp qalǵan jerim joq.
Oqyrmandaryma Alla jar bolsyn!!!

Muhamedjan Tazabek

Feısbýk paraqshasynan