Atyraýda Konstıtýsııakúnine arnalǵan respýblıkalyq konferensııa ótti

Konstıtýsııa kúni qarsańynda Atyraýda «QR Konstıtýsııasy: birlik, turaqtylyq jáne órkendeý» atty respýblıkalyq ǵylymı-praktıkalyq konferensııa ótti.

Sharany bastap ashqan QR Konstıtýsııalyq Keńesiniń múshesi Únzıla Shapaq elimizdiń basty qujatynyń barlyq qazaqstandyqtar úshin mańyzyn atap ótti.

Qazaqstan Respýblıkasynyń Konstıtýsııasy 1995 jylǵy 30 tamyzda jalpyulttyq referendýmda qabyldanyp, oǵan bes ret ózgerister engizildi: 1998, 2007, 2011, 2017 jyldary jáne 2019 jyly.

Qoldanystaǵy Konstıtýsııa táýelsiz Qazaqstannyń tarıhyndaǵy ekinshi ret qabyldanǵan osyndaı qujat. Birinshisi 1993 jyly qabyldanǵan bolatyn.

Konstıtýsııa Qazaqstan halqynyń elimizdi demokratııalyq, zaıyrly, quqyqtyq jáne áleýmettik memleket retinde bekitýge degen umtylysyn, jigerin beıneleıdi. Eń bastysy, Negizgi zańymyz qazaqstandyqtarǵa tańdaý jasaý quqyǵyn berdi.

Elimizdiń ár azamatynyń quqyqtary men bostandyqtaryn qamtamasyz etetin ádiletti sot atqarýdyń kepili Konstıtýsııa ekenin atap ótken Atyraý oblystyq sotynyń tóraǵasy Marǵulan Bektemirov, Konstıtýsııaǵa engizilgen sońǵy ózgerister sot-quqyq qorǵaý júıesiniń damýyna oń yqpal etkenin aıtty. 

Konferensııaǵa qatysýshylardyń pikirinshe, elimizdiń Konstıtýsııasyn jalpymemlekettik, jalpyulttyq jáne jalpyazamattyq qoldaý sharalarynyń júıesi qajet. Konstıtýsııalyq jańǵyrý jaı ǵana mátindi túzetý, Konstıtýsııa normalarynyń mazmunyn túsindirý emes. Bunyń máni – konstıtýsııalyq normalardy odan ári naqty mazmunmen toltyrý úshin árbir memlekettik organ, azamattyq qoǵamnyń ınstıtýttary men azamattary turaqty jumystanýy qajet. 

Konferensııaǵa qatysqan Atyraý oblysy ákimi Nurlan Noǵaev qoǵamnyń konstıtýsııalyq mádenıetin kóterýge qatysty kóptegen máselelerdi talqylaý múmkindigi úshin uıymdastyrýshylar men qatysýshylarǵa rızashylyǵyn bildirdi. Konstıtýsııanyń prototıpteri qazaq halqynda buryn da bolǵanyn aıta ketý kerek. Negizgi zańnamalyq normalardyń biryńǵaı jınaǵynyń neǵurlym aıqyn úlgileri – Qazaq handyǵynda qoldanysta bolǵan «Jeti jarǵy» jáne «Táýke hannyń zańdary». Ataqty Tóle bı, Qazybek bı, Áıteke bı jasaqtaǵan bul zańdar jınaǵy Qazaq handyǵyndaǵy qoǵam ómiriniń barlyq salalaryn derlik rettep otyrǵan.

–  Táýelsizdik tańynda elimizge azamattardyń quqyqtary men bostandyqtaryn qorǵaıtyn qujat qajet boldy. Sol kezde Elbasy – Qazaqstannyń Tuńǵysh Prezıdentiniń bastamasymen 1995 jyly jalpyulttyq referendýmda Konstıtýsııamyz qabyldandy. Elimizdiń basty qujatynyń, sonyń aıasynda osy jyldary qabyldanǵan zańdardyń arqasynda Qazaqstan bıik belesterdi ıgerdi. Búgingi konferensııa Konstıtýsııanyń bolashaq múmkindikteri týraly pikir almasyp, oı bólisý turǵysynan paıdaly boldy. Bul elimizdiń basty qujatynyń jańa múmkindikterin ashyp, kórsetýge múmkindik beredi , – dep atap ótti Nurlan Noǵaev.