«ShALEM KAZAHISTAN»: Balany Úkimet satady, dárigerler sottalady

  Osy kúni Qazaqstan telearnalaryn  kóretinimiz «Shet eldegi qazaq balalary» degen  aıdarmen beriletin «satylyp» ketken balalardyń ómiri jaıly telehabar.

        Úkimetimiz  muhıt asyryp shetelge bala satýda (sońǵy derekter on myńnan asty delinip júr). Biz tipti úlken parlament minberinen Bilim jáne ǵylym mınıstri J.Túımebaevtyń qazaq balalaryn amerıkandyqtar kóptep satyp alýda dep maqtanǵanynda estidik.

       16 maýsym 2015 jyl. Qazaqstan tele arnalarynyń sońǵy jańalyqtarynyń barlyǵy derlik Ońtústik Qazaqstandaǵy (Shymkent) bir aýrýhana (perzenthana) dárigerleriniń ózge de deldaldyq etýshilermen birge birneshe balany satqandary jaıly habar taratty. Sońǵy jyldary  bundaı jaǵdaılardyń elimizdiń kóptegen oblystarynda oryn alyp júrgenderi jaıly habarlardyń jarııalanyp júrgenin bárimizde estip júrgen bolarmyz.

        О́zderińiz kórip otyrǵandaı úkimetimiz bala satqan soń qalǵandary qalsyn ba? «Aq halatty abzal jandarymyz da» solarmen jarysqa túsken. Aıyrmasy úkimetti eshkim sottamaıdy, al bala satqysh «abzal jandarymyz» túrmeniń qaq tórine bir-aq toǵytylady.

        Eline jany ashıtyn, ultynyń bolashaǵyn oılaǵan jandar bundaıǵa jol bermes edi. Bala satý qazaqtyń qanynda joq nárse. Ata-babalarymyz esh ýaqytta jesiri men jetimin jylatpaǵan. Shamasy, qazirgi bizdiń denemizdegi qan emes, sýǵa aınalyp ketken syńaıly. Sebebi, buryn jetim nárestelerdi balalar úıine ótkizdi dese qulaqqa sýyq estilip, denemiz túrshigýshi edi. Qazir qazaqtyń qara domalaqtarynyń, shetelge zat esebinde aqshaǵa satylýyna da etimiz úırenip ketken. Selt etpeımiz. Bunyń jalǵyz sebebi, orys tildi bıliktiń qazaq ultyn (salt-dástúr, ádet-ǵurpyn, dilin, dinin, tilin) moıyndamaýynan, ulttyq tárbıeniń, ulttyq namystyń joqtyǵynan degennen basqa lajymyz joq. Bul qazaqty ósirýge emes, óshirýge aparatyn tike jol. Balasyn satqan qazaq erteń atasyn da, anasyn da, oǵan qosa Otanyn da satpaıdy dep kim kepildik bere alady? Uranymyz - Aqsha, Aqsha! Taǵy da Aqsha! «Alǵa Qazaqstan» dep shapqylap júrmiz.

       Estıtinimiz sol balalardyń «Shalem Kazahıstan» dep shúldirlegenderi. Olardyń bar biletin qazaqshasy tek qana osy «Shalem Kazahıstan» degen bir aýyz sóz. Osyny kórgen saıyn kóńilim álem-jálem. Osy habardy kúnde beretin Qazaqstan telearnalaryna birde renjımin, birde jýrnalısterge rıza bolamyn. Renjıtinim men jáne men sııaqty kóptegen qazaq azamattarynyń «jarasynyń» aýzyn kúnde tyrnap qanata beretini. Jaramnyń aýzy qanaǵan saıyn meniń Qazaqstannyń orys tildi bıligine degen narazylyǵym da kún sanap artyp keledi. Keıde jata qalyp senderdiń báriń elge Beıbarys sultan sııaqty qazaqtyń uly azamaty bolyp oralsańdar eken dep armandaımyn. Ázirge qolymyzdan bar kelgeni osy bolyp tur.  Shalem Kazahıstan!

 Qojyrbaıuly Muhambetkárim

Mańǵystaý