Otandyq kınotúsirýshiler qansha tabys tabady?

Belgili bir sharttardy durys qoldanyp, táýekeldi tómendetse, kıno túsirý salasyna ınvestısııa quıý arqyly joǵary tabysqa jetýge bolady, deıdi "Anaǵa aparar jol", "Elbasy joly" syndy kóptegen fılmderdiń prodıýser Ernar Qurmashev "Kapıtal.kz"-ke bergen suqbatynda.

Onyń aıtýynsha, buryndary "Qazaqfılm" jylyna bir-eki joba ǵana túsirse, qazir jeke ınvestısııalar esebinen táýelsiz prodıýserlerdiń kóptegen kınokartınalary jaryq kórýde. Sondyqtan kınoteatrlardyń jumysyn retke keltiretin júıeni qurý ózekti bolyp otyr. Mysaly, kórshiles Reseıde biryńǵaı avtomattandyrylǵan aqparattyq júıe jumys isteıdi. Arnaıy baǵdarlama kınoteatr jumysynyń móldirligin qamtamasyz etedi. Osynyń arqasynda Reseı kınoteatrlar naryǵy 99 paıyzǵa ashyq. Bul reseılik kınoındýstııanyń damýyna aıtarlyqtaı úlesin tıgizdi.

Qazaqstanda bul saladaǵy alǵashqy qadamdar endi qolǵa alynýda. 2019 jyldyń basynda Kıno týra zań qabyldandy. Zań elektrondyq bılet satý júıesin engizýge mindetteıdi. Júıe engizilgen kún kınoóndirýshiler úshin taǵdyrsheshti sát bolmaq. О́ıtkeni fılm prokatta naqty qansha jınaǵanyn bilýge jol ashylady. Sonda kınojobalarǵa ınvestısııa salý úlken táýekel týdyrmaıdy.

"Búginde otandyq fılmder prokatta eń kóp degende $500 myń men $1 mln qarjy tabady. Barlyq túsirilgen fılderdiń arasynda tabystylary 15-20 paıyzdy quraıdy. Fılm tapqan 500 myń dollardyń 250 myń dollaryn kınoteatrǵa beredi. Qalǵan 250 myń dollardyń 5-7 paıyzyn dıstrıbıýtor alady, óndirýshide qalǵany $230. 30 myń dollarǵa jýyq qarajat marketıngke ketedi. Bizde sonda týra 200 myń dollar qalady. Sondyqtan shyǵynǵa ushyramas úshin fılm bıýdjetin osy somadan asyra almaımyz. Bundaı bıýdjetpen sapaly kompıýterlik grafıkamen fentezı nemese atys-shabys fılmin túsire almaısyń. Bul janrlardyń Qazaqstanda kenjelep jatqany sodan. Jańaǵy aqsha komedııa men drama túsirýge ǵana jetedi" – deıdi ol.

Prodıýser otandyq kınoındýstrııadaǵy júıelik máseleler sheshilse, 5-10 jylda fılmder 5 mln dollardan astam qarjy jınaýy múmkin degen pikirde. 18 mln turǵyny bar naryq áleýeti $15-20 mln-dy quraıdy. Ol úshin kınoteatr bıznesin móldir etip, aımaqtarda jańa kınoteatrlar salý qajet. Sýbsıdııa men kvota bólinýi tıis.

"Menińshe Qazaqstanda kınoteatrlar kóp bolýy kerek. Qazirgideı 280 zal emes, kemi 700 zal bolǵany durys" – deıdi Ernar Qurmashev.

Rústem Masakov