Arys kóshelerinde jarylmaǵan qansha snarıad qaldy?

Arys qalasyndaǵy áskerı qoımada jarylǵan jarylǵysh zattardyń áleginen keıingi tekserý kezinde polısııa qyzmetkerleri 37 bas iri qara, 150 ıesiz qoı tapty. Atalǵan túlikter qazirgi tańda arnaıy kúzettiń qaramaǵynda dep jazady Qamshy.kz aqparat agenttigi.

Túrkistan ákimshiliginiń málimetine súıensek, Arys qalasyndaǵy jaǵdaıǵa baılanysty Túrkistan oblystyq polısııa departamentiniń 448 qyzmetkeri jáne 75 avtotransporty jumys jasaǵan.

Ulttyq gvardııanyń á/b №6506 580 áskerı qyzmetkeri jáne 36 arnaıy trasport, onyń ishinde  jol talǵamaıtyn «Ýral» kóligi evakýasııalaý isinde jumys jasady. Sondaı-aq, áskerı polsııanyń 10 qyzmetkeri, №0358 áskerı bóliminiń 200 qyzmetkeri halyqty zalalsyzdandyrýǵa atsalysty. Barlyǵy 1238 qyzmetker Arystaǵy apatty aýyzdyqtaý úshin áreket etken.

Sonymen qatar, QR Qorǵanys mınıstrligine qarasty 1800 áskerı qyzmetker men 50 arnaıy tehnıka jumysqa tartyldy. Arys qalasyndaǵy tótenshe jaǵdaıdan keıingi ekinshi kúnde polısııa departamentiniń qyzmetkeleri 4 urlaý faktisin tirkegen. Aýdanaralyq joldarǵa, mańyzy bar trassalarǵa 20 jerden beket qoıylǵan. Buul qaladaǵy qaýipti jaǵdaıdan turǵyndar zardap shekpesi úshin jasalǵan qaýipsizdik sharasy.

Aıta ketý kerek, polsııa departamenti men Qorǵanys mınıstrliginiń bólimshesi tize qosyp, qalany mınadan tazartý jumystaryn júrgizdi. Nátıjesinde qala mańynan, kóshelerden jarylyp úlgermegen 130-dan astam snarıad tabylǵan. Budan birshama ýaqyt buryn Túrkistan oblysy ákiminiń keńesshisi Sáken Qalqamanov 70-ke jýyq jarylmaǵan snarıadtardyń bar ekenin jetkizgen edi.