Jambylda Turar Rysqulov týraly fılm túsirilmek

Elbasynyń  «Uly dalanyń jeti qyry» atty maqalasynyń «Arhıv-2025», «Uly dalanyń uly esimderi»,  «Túrki áleminiń genezısi», «Uly dalanyń ejelgi óner jáne tehnologııalar mýzeıi», «Dala folklory men mýzykasynyń myń jyly», «Tarıhtyń kıno óneri men televızııadaǵy kórinisi» arnaıy jobalary aıasynda Jambyl oblysynda búgingi kúnge deıin 67 is-shara ótkizilgen.  

Mysaly, jaqynda ǵana oblys ákimdiginiń mádenıet, arhıvter jáne qujattama basqarmasy men Taraz memlekettik pedagogıkalyq ýnıversıtetiniń uıymdastyrýymen «Erlikke taǵzym – urpaqqa paryz» atty halyqaralyq ǵylymı-praktıkalyq konferensııasy ótken.  Konferensııaǵa «Arhıv-2025» ǵylymı-ádistemelik ortalyǵynyń basshysy Berik Ábdiǵalı, QR-nyń Prezıdenti Arhıviniń janyndaǵy Qoǵamdyq Keńes tóraǵasy Borıs Japarov, QR-nyń Prezıdenti Arhıviniń dırektory Jámılá Ábdiqadyrova,  Polsha Respýblıkasynyń Gdansk qalasyndaǵy Pomorsk geneologııalyq qoǵamy Prezıdentiniń orynbasary, tehnıka ǵylymdarynyń kandıdaty, ólketanýshy Voıseh Beshınskıı jáne ózge de óńirlerdiń arhıv basshylary men mamandary qatysty.

Maqala tarıhty kıno men televızııa arqyly tanytý jóninde de biraz dúnıe aıtylǵany belgili. Rasynda da, kıno bir ulttyń mádenıeti men tarıhyn, salt-dástúri men ulttyq ıdeıasyn kórsetetin qural.

Baǵdarlamanyń «Tarıhtyń kıno óneri men televızııadaǵy kórinisi» arnaıy jobasynyń negizgi maqsaty da Qazaqstannyń órkenıet tarıhynyń úzdiksiz damýyn kórsetetin derekti jáne qysqa metrajdy fılmderin óndiriske engizý.

Bul arnaıy joba aıasynda Qazaqstan jazýshylarynyń eńbekteriniń negizinde tarıhı fılmderdi túsirý jáne shyǵarmashyl jastardy kıno álemine tartý, úzdik ssenarıılerdi jazýǵa yntalandyrý baǵyttarynda Áýlıeata óńirinde de júıeli jumys atqarylýda. Aldaǵy josparlar da aýqymdy.

-Bıylǵy jyldyń aýqymdy is-sharalarynyń josparymen bólisetin bolsam, aǵymdaǵy jyldyń maýsym aıynda oblys ákimdiginiń mádenıet, arhıvter jáne qujattama basqarmasynyń uıymdastyrýymen jastar arasyndaǵy «Úzdik ssenarııler», «Jalyndy jastyq shaq» beınerolıkter baıqaýyn, Merki aýdany ákimdiginiń uıymdastyrýymen Merki, Aspara qalashyǵy, Merki-1,2,3,4,10 qorǵandary men Sandyq, Qaraqystaq shatqaly, balbal tastardyń tarıhı-mádenı muralary týraly derekti fılmder túsirý josparlanýda. Jýaly aýany ákimdiginiń uıymdastyrýymen Sherhan Murtaza atamyzdyń «Qyzyl jebe» romany jelisinde T.Rysqulov týraly qysqa metrajdy fılm túsirý de josparda bar,-deıdi «Jambyl oblysynyń «Rýhanı jańǵyrý» jobalyq ofısi» mekemesiniń basshysy Serikbol Berikqoja.

Baqyt Jalǵas