Jetistikke jetý úshin ónimdi jumys isteýdiń 10 qaǵıdasy

Búgingi naryqta barlyǵy óz taýarynyń ónimdiligin arttyrýdy kózdep, áreket etýge kóshken. Tipti, keıbir kásipkerler tutynýshynyń pikirin tyńdaımyn dep ózderiniń basty ıdeıalaryn da joǵaltyp jatady. Este bolsyn, naryqta ónimdi bolýdyń basty qaǵıdasy – erekshe ári qoǵamǵa qat nárseni taýyp bere alý. Osydan keıin baryp qana qoldanýshylardyń usynys-pikirlerin tyńdap, soǵan oraı kishigirim ózgerister engizýge bolady.

Kásip bastaǵan kez-kelgen azamat óz taýarynyń ónimdiligin arttyrýdy kózdep, túrli keńester beretin saıttar men gazet-jýrnaldardyń betin paraqtaıdy.

Ras, keıbir qaǵıdalardy jóndi qoldana bilseń, ájepteýir kómegin tıgizedi. Degenmen, atalǵan qaǵıdalardyń barlyq kásipkerlerge birdeı paıda ákele bermesin qaperde ustaǵan jón. Árıne, ónimdilikti arttyrý turǵysyndaǵy barlyq sharttardy basty nazarda ustap, kóńil túkpirine túıip júrgenniń aıyby joq.  Jumys barysynda  bul sharttardy qoldanatyn utymdy ýaqyt kelip qalýy kádik. Kásipkerlik salasynda barlyǵynyń nazaryna usynylatyn, esh ózgermeıtin 10 qaǵıda bar. Búgin sol týraly aqparat bermekpiz. Endeshe, ári qaraı oqyńyz.

1 – qaǵıda. Barlyǵyna úlgerý úshin erte turý qajet

Kásip salasynda izdeniste júrgen azamattardyń barlyǵy "Tabysty kásipker bolý úshin uıqydan tańǵy saǵat 4-te turý kerek" degen tirkesterdi oqyǵany anyq. Jazba avtorlarynyń esepteýinshe, osyndaı daǵdy arqyly adam jetistikke jetedi eken-mys. Rasynda erte turý kóp máseleni sheshedi me?

Ras, erte turǵan adamnyń uıqysy sol daǵdyǵa úırenedi. Sodan keıin ol ózin sergek sezinetin bolady. Al sergek adam kúni boıy kóp tirliktiń basyn qaıtarýǵa qaýqarly. Bul – tańǵy uıqydan erte oıanýdyń balama paıdasy.

Al joǵaryda keltirgen tirkes syndy jazbalardyń avtorlary erte turǵan adam sátti jumys asaıdy, jetistikke jetýge degen qulshynysy artady nemese jańa múmkindikter paıda bolady degen túıinder keltirip jatady. Árıne, bul tirkesterdiń ómirde shyndyqqa aınalýy ábden múmkin. biraq barlyq adamnyń ómirinde emes.

Al erte turý arqyly ýaqyt únemdeý taqyrybyna oralsaq, bul jerde arnaıy bekitilgen qajetti uıqyny ótep júrip-aq barlyǵyna úlgerýge bolady. Ýaqytty tıimdi paıdalaný jóninde jazylǵan derekterge súıensek, árbir adamnyń ónimdi jumys jasaıtyn mezgili ártúrli. Osy oraıda aıtylǵan keńester boıynsha tańǵy jáne túngi mezgildi jumys jasaýǵa ońtaıly qoldana bilgen jón eken. О́ıtkeni, dál osy ýaqyt aralyǵynda adamnyń kóńilin alańdatatyn nárselerdiń bári damyldaıdy. Sol sebepti jumys jasap otyrǵan kisiniń bar nazary tek aldyndaǵy isine ǵana aýmaq.

2 – qaǵıda. Keńsede ǵana ónimdi jumys jasaýǵa bolady

Bul qaǵıda osydan on shaqty jyl buryn ótimdi bolǵan bolar, bálkim?! О́ıtkeni, ol kezeńde árbir adamnyń qolynda qajetti tehnologııalar, qoljetimdi ınternet nemese basqa da qajettilikter bolǵan joq. Sondyqtan, ortalyqtandyrylǵan keńsede kúndiz-túni jumysyn aıaqtaǵansha otyrýǵa májbúr boldy.

Kóptegen saraptamalardyń nátıjesine súıensek, úıden nemese kafelerden jumys istegen azamattardyń qyzmet ónimdiligi áldeqaıda joǵary bolady eken. Sebebi, úıden nemese ózine yńǵaıly jerden qyzmet jasaý arqyly adam ózine yńǵaıly ýaqytty nemese qolaıly jaǵdaıdy jasap alady. Sodan keıin bar yntasymen jumys jasaıdy.

Saraptamalar nátıjesinde búginde kóptegen adamdardyń qashyqtyqtan jumys jasaýǵa daǵdy alyp bara jatqany anyq kórinedi. Degenmen, olardyń da qyzmet ónimdiligi keńsege turaqty baryp jumys jasaıtyndardan artyq bolmasa, kem emes.

Joǵaryda da aıtyp óttik, adamdar ózine qolaıly nárseni tańdaıdy. Keıbir adamdarǵa qashyqtyqtan qyzmet jasaǵan ońtaıly bolsa, keıbir jandarǵa, kerisinshe, áriptester arasynda, keńsede jumys jasaǵan tıimdi.

3 – qaǵıda. Uıqy tek álsizder úshin

Uıqy – adamnyń fızıkalyq qajettiligi. Ras, túngi ýaqyt – kóp adamdar úshin jumys jasaýǵa óte qolaıly ýaqyt. Degenmen, medısınalyq tujyrym boıynsha deni saý adam táýligine 8 saǵat mindetti túrde uıqtaýy shart. Bul aralyqta adamnyń jalpy aǵzasy, mıy tynyǵyp, kelesi kún sergek bolýǵa kómektesedi.

Kópshilik adamdar túngi uıqy ýaqytyn qysqartyp, ony ózge bir paıdaly nársege jumsaǵandy jón dep sanaıdy. Biraq, esińizde bolsyn, uıqynyń jetkiliksizdigi ónimdiliktiń azaıýyna alyp keledi. Sondyqtan da, ózińizdiń ýaqytyńyzdy tıimdi paıdalanyp, qajet uıqyny ótep júrgenińiz abzal.

4 – qaǵıda. Bir nársemen shuǵyldaný - ónimdi eńbek etý

О́zińizge bul jaǵdaı ábden tanys bolar. Adam birdeńemen shuǵyldanyp jatqan kezinde ózin ónimdi eńbek etip jatqan azamat retinde, ýaqytyn tıimdi basqaryp otyrǵan tulǵa retinde sezine bastaıdy. Eger siz ózińizdiń jeke esep dápterińizde atqarylǵan bir isterdi túrtip júrseńiz de, bul ónimdilikti bildirmeıdi. О́ıtkeni, onda oryndaýǵa jáne oryndamaýǵa da bolatyn shuǵyl sharýalar nemese jedel oıǵa oralǵan dúnıeler bolýy múmkin.

О́nimdi bolý degenimiz – arnaıy josparlanǵan kásibińdi dóńgeletip, óz salańda qarqyndy jumys jasaý jáne sol arqyly paıda keltirý. Al joǵaryda aıtylǵandaı shuǵyl jáne jedel sheshim qabyldanǵan sharýalarmen aınalysý arqyly adam ózin-ózi basqarýyn joǵaltady nemese ónimdilik deńgeıin tómendetedi.

Eger ózińiz shuǵyldanyp júrgen isterińiz nátıje bersin deseńiz, barlyǵyn aldyn ala josparlańyz. Sodan keıin jospardaǵy sharýalardyń eń mańyzdysy dep sanaıtyn nárseni birinshi kezekte oryndaýǵa tyrsyńyz. Ýaqyt joǵaltatyn nemese ózińizdiń ónimdilik dárejeńizge kedergi keltiretin áreketterden bas tartyńyz.

5 – qaǵıda. Jumys daǵdarysyn jeńip shyǵýǵa qalyptasyńyz

Árbir adam jumys ýaqytynda basqa dúnıemen shuǵyldanǵysy kelip nemese demalǵysy kelip turatyny ótirik emes. Bul nárseni ǵalymdar "jumys daǵdarysy" dep ataıdy. Atalǵan daǵdarys kezinde adamdar qyzmetke degen qulshynysyn joǵaltady.

"Jumys ýaqytyndaǵy osy bir saǵattardy ótkizýdiń orynyna basqa sharýamdy tyndyrý kerek edi" degen sekildi oılar adam sanasyn jaýlap alǵan kezde, ol ózin-ózi basqarý qabiletinen ajyraı bastaıdy. Sodan kelip, búgin atqarylýy tıis jumysty erteńge qaldyrý sekildi ónimdilikti joǵaltatyn erinshektik áreketter jol ala bastaıdy.

Al keıde adam ózine berilgen jaýapkershilikti qyzmetin jasaýdyń ornyna ústel ústindegi qaǵazdardy qaıta bir sholyp shyǵý, áleýmettik jelini paraqtaý, taza aýamen demalý, poshtasyn tekserý sekildi árekettermen aınalysyp ketedi.

О́nimdi qyzmet jasaýǵa qaýqaryńyz bar kezde, altyn ýaqytyńyzdy bosqa joǵaltpańyz. Búgingi qyzmetińiz ýaqyt óte kele aldyńyzda abyroıyńyzdy asqaqtatyp tóseletin qyzyl kilem, qaltańyzdyń qalyńdyq deńgeıin arttyratyn qarajat bolyp oralmaq.

6 – qaǵıda. Jumys bárinen joǵary

Álemdik deńgeıde belgili bir jetistik deńgeıin baǵyndyryp qoıǵan adamdardyń paıymynsha, jumysty birinshi orynǵa qoıýdyń qajeti shamaly. Nemese basqasha jetkizip kórelik. Turaqty qyzmetińiz ben jeke ómirińiz arasynda tepe-teńdik ustaı bilińiz.

Qazirgi kúni adamdardyń kópshiligi ózderiniń kózdegen maqsattaryna jetýi úshin kúni-túni eki-úsh jumysty qatarynan atqaryp júr. Al bul nárse sizge eshqashan kózdegen mejeńizge jetkizbeıtin, quıryǵymen aldap otyratyn qyzyl túlki sekildi.

Eń durysy – jumys jasaıtyn ýaqytta ónimdi qyzmet atqaryp, qalǵan ýaqytta qalaǵanyńyzsha jeke ómirińizge kóńil bólgenińiz abzal. Eger demalys kúnderi jumys jasaý qajet bolsa, oǵan belgili bir ýaqyt aralyǵyn ǵana bólińiz. О́ıtkeni, úzilissiz qyzmet jasaý – ónimdilik dárejesin quldyratýǵa alyp keletin birden-bir keleńsizdik.

7 – qaǵıda. Kóp jaýapkershilik júkteý – maqsatqa jetý joly

Qazirgi naryq talabyna saı kelip, júktelgen mindettemelerdi tolyǵymen oryndaý úshin maqsaty aıqyn azamattardyń kópshiligi eki nemese úsh jumystyń jaýapkershiligin ózderine júkteıdi. Bul jolmen, árıne, tamasha tabys tabýǵa bolady. Biraq, aldymen, densaýlyqty, ekinshiden, ónimdilik deńgeıin eń tómengi qatarǵa túsirip alasyz.

Kóp jaýapkershilik júktegen adamda birinshi qyzmet pen ekinshi qyzmet arasyndaǵy aýysym kezinde demalys bolmaıdy. Ras, bir múmkindigin taýyp, uıqtap nemese sál demalyp jatýǵa bolady. Biraq mı árdaıym qozǵalysta bolady.

Al mı demalmaǵannan keıin adam rýhanı turǵydan sharshaı bastaıdy. Mine, osy kezde baryp qana adam óziniń ónimidiliginiń nasharlaǵanyn bir-aq sezedi.

8 – qaǵıda. Ǵalamtor ónimdi eńbek etýge kedergi jasaıdy

Qazirgi kezde adamdardyń kópshiligi áleýmettik jelilerden, túrli saıttardan kelip túsetin aqparattardyń kóptigine shaǵymdanady. Olardyń aıtýy boıynsha, aqparat kóp qabyldaǵan saıyn adam negizgi jumysynyń ónimdiligin azaıta bastaıdy eken.

Degenmen, barlyǵyn ǵalamtorǵa úıip-tóge salýǵa bolady ma? Joq, árıne. Árbir adam – óz ómiriniń qojasy. Eger adam óz ýaqytyn táýlikpen bólip, ár táýliktegi jalpy ýaqytty josparlap otyrsa, eshteńeden qur qalmaýǵa jáne barlyǵyna úlgerýge ýaqyt tabady.

Ǵalamtordaǵy kóptegen aqparattyń keıde paıdasy da tıetinin umytpaǵan jón. Biraq ónimdilikti arttyryp, qyzmet jasaý qajet kezde óz qyzyǵýshylyǵyńyz arqyly qaraıtyn baǵdarlamalar, otyratyn áleýmettik jeliler týraly umytýdy daǵdyǵa aınaldyryńyz.

9 – qaǵıda. Uzaq jumys jasasań, kóp sharýa tyndyrasyń

Keńsede uzaq ýaqyt otyryp alyp jumys isteý arqyly óz ónimdiligińizdi arttyram degen oıyńyzdyń 100 paıyz oryndalary nemese oıyńyzdaǵydaı shyqpaýy tarazy basynda turady.

Parkınson tujyrymdamasy boıynsha, sizdiń qyzmet jasaǵan ýaqytyńyz bolyp, tek taza jumyspen aınalysqan ýaqytyńyz ǵana esepteledi. Al qalǵan ýaqyt – bosqa ótken nemese jeke ómirińizge jumsalǵan ýaqyt.

Eger siz keńsege tańerteń kelgen kezde, jumys ýaqyty bite salysymen úıge barý qajet degen oımen jumysqa otyrsańyz, onda sol ýaqytqa deıin bir kúndik tapsyrmańyzdy tolyq oryndap ketesiz. Al keshke jumys ýaqytynan keıin asyqpaýǵa, biraz ýaqyt taǵy da qalyp, artyǵyraq jumys jasaýdy kózdeseńiz, artyq saǵattardy qosqan kúnde de keshegi kúnmen birdeı tapsyrma oryndap shyǵasyz.

Demek, uzaq jumys ýaqyty ónimdi eńbektiń aınasy emes, ónimdi eńbek qyzmet sapasymen synalady.

10 – qaǵıda. Taza jumys orny ónimdilikti arttyrady

Bul qaǵıdanyń da áseri árkimge árqalaı. Mysaly, keıbir azamattar ústelderiniń ústinde artyq jatqan jarty paraq qaldyrmaı jınap otyrsa, keıbirkisiler barlyǵyn shashyp otyryp jumys jasaǵandy jaqsy kóredi. Bul – árkimniń jeke kózqarasynyń nátıjesinde oryndalatyn dúnıe.

Joǵaryda aıtqan deńgeıdiń ekinshisine jatatyn adamdar tap-taza ústel ústinde otyryp jumys jasaı almaýy múmkin. О́ıtkeni, ol aldyna qaǵazdardy jaıyp tastap, ústeliniń shetine kitap jınap qoıyp, qoıyn dápterine bir dúnıelerdi túrtip otyryp jumys atqarǵandy jany qalaıdy.

Al birinshi deńgeıdiń adamdary ekinshi deńgeıdegi qyzmetkerlerdiń jumys ústelinde otyra almaýy múmkin.

Biz sholý jasap ótken 10 qaǵıdanyń barlyq sharttary kúlli adamzat balasyna arnalmaǵan. Eger joǵarydaǵy qaǵıdalar ishinen ózińizdiń boıyńyzda bar áreketterdi baıqaǵan bolsańyz, onda osy qaǵıda mindetteelerin oryndap kórseńiz bolady.

Qyzmettiń ónimdi bolýy ózińizge, jasaǵan jumysyńyzǵa, paıdalanǵan ýaqytyńyzǵa baılanysty ekenin umytpaǵan abzal.