Elordadaǵy mıtıng: Sultanov suraqqa jaýap berýdi ǵana bile me? (vıdeo)

16 mamyr kúni Nur-Sultan qalasynda kóp balaly jáne jalǵyzbasty analardyń narazylyǵy ótti, dep jazady Qamshy.kz aqparat agenttigi. 

Narazylyq qalaı bastaldy?

Azattyq radıosynyń aıtýynsha, analardyń narazylyǵy qalalyq ákimdikke qyryqqa jýyq ana kelip, baspana men járdemaqy máselesine shaǵymdanýynan bastalǵan. Narazylar arasynda kóp balaly, jalǵyzilikti jáne múgedek bala baǵyp otyrǵandar bar.

Narazylar bıliktiń baspana máselesin sheshý úshin usynǵan baǵdarlamalary tıimsiz dep sanap, úkimetten úıdi alǵashqy jarnasyz, bank komıssııasynsyz berýdi suraıdy. Baspana men ataýly áleýmettik kómek alý úshin qujat daıyndaǵandaryn aıtqan analar kedergiler kóptigin de aıtty.

Jınalǵandar ótken aıda balalarǵa beriletin járdemaqyny kóbeıtý, áleýmettik jeńildikter jasaý sııaqty ondaǵan talabyn jazyp, Qazaqstan Prezıdenti Qasym-Jomart Toqaev pen premer-mınıstr Asqar Mamınge, parlament depýtattaryna hat joldaǵan. Ákimdikke jınalǵan analar ózderiniń haty qaıyrylǵan bılik ókilderine emes, Eńbek jáne halyqty áleýmettik qorǵaý mınıstrligine jetkenine narazy.

Ákimdik aldyna 10.30 shamasyna jınalǵan analarǵa qala ákimi de, orynbasarlary da shyqpaǵan soń narazylar Astana ekonomıkalyq forýmy ótip jatqan Kongress ortalyǵyna bet alǵan. Narazylar forýmǵa bara jatqan soń ákimdik ókili shyǵyp, qala ákimi Baqyt Sultanovtyń orynbasarlary analardy kezdesýge shaqyrǵanyn aıtty. Biraq analar "olardyń eshteńe sheshpeıtinin" málimdep, ákimdikke qaıtýǵa kelispegen.

"Elbasy kelsin"

Narazy analar Halyqaralyq ekonomıkalyq forým ótip jatqan atalmysh ǵımarattyń aldyna jınalyp, Qazaqstannyń burynǵy Prezıdenti N.Nazarbaevtyń bılikke  kelip, ózi ýáde etken ataýly áleýmettik kómekti berýin talap etti. Olardy qalalyq polısııa departamentiniń ókili Baqytjan Malybaev tarap ketýge shaqyrdy. Biraq analar narazylyqtaryn bildirip, taramaı turyp aldy.

"О́ıtkeni onyń qarny toq"

Olar "bıliktegiler halyqtyń jaǵdaıyn oılamaıdy, memlekettiń aqshasy ustaǵannyń qolynda, tistegenniń aýzynda ketip jatyr" dep ashyndy.

"Elbasy bizge teledıdardan pıar jasap, ataýly áleýmettik kómek, baspana ýáde etti ǵoı. Biraq qarasańyzdar, Elbasynyń osy sózinen keıin 1 mamyrdan bastap analar qansha úı aldy? Men mysaly, kezekte on myńynshymyn, 10 jyl boldy qazir segiz myńynshy orynǵa keldim. Sonda ne,10 jylda 2000 adam ǵana úı aldy ma? Onyń bári ótirik. Eldiń bárin aldap-aldap, halyqtyń qarajatyn úkimet ózi ıemdenip jatyr. Bizdiń shahterlarymyzdyń, munaıshylarymyzdyń, temirjolshylarymyzdyń aqshasy basqa bireýdiń qaltasynda ketip jatyr. Osynyń barlyǵy halqymyzdyń momyndyǵynan, ıti de, bıti de basymyzǵa shyqty. Ustaǵannyń qolynda, tistegenniń aýzynda ketip jatyr. Men myna analardyń qandaı jaǵdaıda ómir súrip jatqanyn kórgende, júregim qars aırylady. Jeıtin nan, ishetin sút tappaı, sábıleri qara sý iship, qara nan jep otyr. Ony Elbasy bile me eken, bilmeıdi! О́ıtkeni onyń qarny toq. Ony biz bilemiz", - dedi narazy analardyń bireýi.

Ákim men mınıstr analardy ymyraǵa shaqyrdy

"Balalarǵa úı berilsin!", "Baspana" dep aıqaılaǵan analarmen sóılesýge forým ótip jatqan ǵımarattyń ishinen Nur-Sultan qalasynyń ákimi Baqyt Sultanov pen Eńbek jáne halyqty áleýmettik qorǵaý mınıstri Berdibek Saparbaev kelip, olardy avtobýspen qala ákimdiginiń ǵımaratyna baryp, óz máselelerin aıtýǵa shaqyrdy.

Ákimdik qyzmetkerleri narazy toppen birge jýrnalısterdiń avtobýsqa minýine kedergi keltirgen. Alaıda, analar "avtobýsqa jýrnalıster minse ǵana, ákimdikke baramyz" dep talap qoıdy. Analardyń talabyna amalsyzdan kelisken olar jýrnalısterdiń birge barýyna kelisken. Alaıda, ákimdik ǵımaratyna jetken soń ǵımarat ishine BAQ ókilderiniń kirýine taǵy da qarsylyq bildirildi. "Jýrnalıster kirmese, biz de kirmeımiz" degen analarǵa Berdibek Saparbaev "sizderdiń máselelerińiz ǵoı, jýrnalısterdiń qandaı qatysy bar?" dep ýájin aıtty.

Sultanov suraqtarǵa jaýap berdi

Budan keıin qala ákimi Berik Sultanov narazy analardy ákimdik ǵımaratynda qabyldady. Biraq oǵan Eńbek jáne halyqty áleýmettik qorǵaý mınstri Saparbaev qatysqan joq. Qabyldaý barysynda analar baspana jáne ataýly áleýmettik kómek máselesin kóterip, suraqtaryn qoıdy.

Jınalǵandardyń keıbiri baspana alý úshin bankke alǵashqy jarna tóleý talabyn alyp tastaýdy surady. Sultanov "Alǵashqy jarna tóleý talabyn alyp tastaý - bankti quldyratý degen sóz" dedi. Baspana kezeginiń baıaý jyljıtynyna shaǵynǵan analarǵa Sultanov "máseleniń sheshilip jatqanyn" aıtyp jaýap berdi.

- Kezekte turǵandarǵa beriletin baspana sanyn kóbeıtýge tyrysamyz. Úkimet túrli baǵdarlamalar arqyly Almaty da, Shymkentte de osy máseleni sheshýge tyrysyp jatyr. Sebebi bizde másele rasymen kóp. Kezekke tura almaı jatqandar da bar, - dedi ákim.

Qala ákimi baspasóz qyzmetiniń habarlaýynsha, jıynǵa 70-ke tarta ana kelgen. Olar Sultanovtyń atyna jeke basyndaǵy máselesin jazyp, arnaıy  jazba qaldyrdy. Biraq kókeıde bir suraq bar: Qala basshysy Baqyt Sultanov pen ákimdiktegiler osy ýaqytqa deıin qaıda qaraǵan? Máseleniń sheshilýi úshin analar mindetti túrde mıtıngke shyǵýy kerek pe?