Alǵabas turǵyny ulynyń týǵan kúninde lıftten qulap, ajal qushty (vıdeo 18+)

2019 jyldyń 13 aqpanynda Almaty qalasyndaǵy «Alǵabas-6» yqshamaýdanynyń turǵyny dál ulynyń týǵan kúninde lıft shahtasyna qulap qaıtys boldy.  Kórshileriniń aıtýynsha, aýǵan soǵysynyń ardageri Talǵat Jastyqbaev istemeı turǵan lıft shahtasyna saǵat 16:20-de qulaǵan, alaıda denesi tek 21:00-de bir-aq tabyldy. Oqıǵanyń jalpy qalaı bolǵanyn Qamshy.kz aqparat agenttigi tilshisine 144-úıdiń podezderine jaýap beretin turǵyn Aıdana Shúıinshalıeva baıandap berdi.

Aıdana Shúıinshalıevanyń aıtýynsha, oqıǵa 144-úıdiń 1 podezinde bolǵan. Marqum er adam 6-qabatta turady eken. Onyń neden qaıtys bolǵanyn bilý úshin turǵyndar vıdeobaqylaýdy kórgen. Vıdeodan kórsetilgendeı, er adam jalǵyz ózi syrt kıimsiz shyǵypty. Alaıda qaıda shyqqany belgisiz. Onyń ústine keshe ulynyń týǵan kúni bolǵan.

«Ol kisi 144-úıdiń 1-shi podezinde turady. Byltyr 2 podezge tolyq vıdeobaqylaý qoıǵyzǵanbyz. Tipti lıfttiń ishinde de bar. Oqıǵa jaıly estı sala birden vıdeobaqylaýǵa jaýap beretin mamandarǵa habarlastym. Sebebi túsiniksiz jaǵdaı edi: jańaǵy er adam lıfttiń ishinen emes, shahtadan tabyldy. Er adam 21:00-de tabyldy. Sol ýaqyttan 23:00-ge deıin jatqan jerinde jatty. Sebebi TJ komıtetine habarlastyq, olar kelmedi. Ol jerden marqumdy tek solar alyp shyǵýy kerek eken. Al ol kisiler 23:00-den óte keldi. Aıtýlarynsha, shaqyrý 23:00-de túsken. Ol jaqta polısııa qyzmetkerleri de júrdi. Al vıdeobaqylaý ókili de  alǵashynda kelýden bas tartty. Polısııa arqyly shyqtyq», - dedi 144-úıdiń turǵyny.

Ulynyń týǵan kúni bolǵandyqtan úıine týǵan-týystary jınalǵan. Bári derlik Talǵatty syrtqa shyǵyp ketti dep oılapty. Alaıda 4 jarymnan beri oralmaǵan ákesin uly izdeýge kirisedi. Bul ýaqytta kórshileri lıfttiń istemeı turǵanyna baılanysty arnaıy mamandarǵa da habarlasyp qoıǵan edi. Olar keshki 21:-de keldi. Ári er adamnyń lıft shahtasynda jatqanyn da baıqaǵan sol mamandar boldy. Tek tótenshe jaǵdaılar komıteti kelmeıinshe, er adamdy shahtadan alyp shyǵýdan bas tartty.

«Senesizder me, álgi kisi ana shahtada neshe saǵat boıy jatqan. Bul marqumnyń jaqyndaryn ábden ashýlandyrdy. Tipti sońy tóbeleske ulasyp keterdeı boldy. Sebebi bári sharasyz edi. Aqyry vıdeobaqylaý mamandary da, TJ qyzmetkerleri de keldi. Vıdeodan kórgenimizdeı, ana kisi lıftti shaqyratyn núkteni basqan. Ol kelmegen soń, biraz kútti de, baspaldaqpen túsip ketti. Biraq nege ekeni belgisiz, qaıtadan kóterildi. Lıftti taǵy shaqyrdy, kelmegen soń túsip ketti. Dál osylaı ol kisi úsh  ret túsip, úsh ret kóterildi. Vıdeodan daýys estilmeıdi, sondyqtan ne sebepti kóterilgeni belgisiz. "Bálkim lıfttiń qozǵalǵan daýsyn estip, istedi" degen oımen kóterilgen bolar. Sońǵy kóterilgeninde shahtanyń esigin ashty. Al ol esik op-ońaı ashyla ketti. Negizi lıftterdiń esigine tipti kúshi tasyp turǵan adamnyń kúshi jetpeýi tıis edi ǵoı. Joq, esik ashylyp ketti. Ol kisi tómenge qaraımyn deı bergende aıaǵy shalynyp, qulap tústi. Ol kezde saǵat 16:20-ny kórsetip turdy», - dedi Aıdana Shúıinshalıeva.

Iаǵnı, 16:20-da lıft shahtasyna qulaǵan er adamnyń óli denesin ol jerden tek túngi 23:00-de alyp shyqqan. 9 saǵatqa jýyq jatqan Talǵatty dárigerler de qutqara almady. Al dál ulynyń týǵan kúninde kelgen ajal marqumnyń jaqyndaryn qatty eseńgiretip jiberdi.  

Resmı aqparatty áli eshbir organ bergen joq. Alataý aýdany ákimdigi tústen keıin habarlasýdy surasa, Almaty qalasy IID baspasóz hatshysy Saltanat Ázirbek aýyzsha túsinikteme berýden bas tartyp, bolǵan oqıǵany jazbasha túrde poshtamyzǵa jiberýge ýáde berdi. Ázirge qaıǵyly jaǵdaıǵa kimniń jaýapty ekeni belgisiz.