Exit-poll málimetteri boıynsha N.Nazarbaevqa 97,5 paıyz saılaýshylar daýys berdi

N.Nazarbaevqa 97,5 paıyz saılaýshylar daýys berdi, dep habarlady Demokratııa ınstıtýtynyń dırektory Iýlııa Kýchınskaıa OKQ ótken brıfıngte.

«Elimizde ótken Qazaqstan Respýblıkasynyń Prezıdentin saılaý barysynda Demokratııa ınstıtýty barlyq óńirlerde jalpyulttyq exit-poll júrgizdi», - dep atap ótti Iýlııa Kýchınskaıa.

Qazirgi prezıdenttik saılaýda halyqaralyq jáne qazaqstandyq sarapshylardyń málimetteri boıynsha tarıhta tuńǵysh ret saılaýshylardyń teńdessiz, rekordty qatysýy  atap ótilgen.

Mundaı saılaý ótkizý jáne osyndaı tarıhı joǵary kórsetkishte qatysýdy baıqaýshylar ózge elderden eshqashan da kórmegen.

Búginde qazaqstandyqtardyń Prezıdent saılaýyna qatysý deńgeıin sensasııa dep baǵalaýǵa bolady - eńbektegen baladan eńkeıgen kárige deıin barlyǵy otbasylarymen, eńbek ujymdarymen tańerteńnen saılaý ýchaskelerine aǵyldy.

Saılaý ýchaskesi ashylmaı turyp kezekke turǵan saılaýshylar aǵyny jabylǵanǵa deıin tolastaǵan joq.

Búgin qazaqstandyqtar  buryn-sońdy bolmaǵan belsendilik kórsetip, saılaýshylar sany boıynsha sensasııalyq joǵary kórsetkishke jetti.

Jármeńkeler men konsertter uıymdastyrylyp, saılaý jalpy halyqtyq merekelik kóńil-kúıde ótti.

Saılaý naýqanyn 10000-nan astam otandyq, 1000-nan astam sheteldik baıqaýshylar men uıymdar baqylady. Olardyń bári saılaýdyń joǵary deńgeıde uıymdastyrylǵanyn atap ótýde, olardyń baǵalaýy boıynsha, bul transparentti, ashyq jáne ádil saılaýdyń jarqyn kórinisi ispettes.

Sheteldik baıqaýshylar saılaý kúni azamattardyń, sonyń ishinde jastardyń belsendi daýys berýin, Qazaqstandaǵy saılaýdyń demokratııalyq túrde, halyqaralyq standarttarǵa saı bolǵanyn atap ótti.

Eń aldymen bul - qazaqstandyqtardyń patrıottyǵyn, azamattardyń saıası saýattylyǵy men olardyń elektoraldy mádenıetin, sondaı-aq eldiń birligin, azamattyq belsendi pozısııasyn bildiredi.

Saılaýǵa aqparttyq qoldaý da joǵary deńgeıde boldy.

Qazaqstannyń barlyq BAQ-tarynda, onyń ishinde Internet, áleýmettik jelilerde saılaý taqyryby tańnyń atysynan kesh qaraıyp batqanǵa deıin basty taqyrypqa aınaldy.

Qazaqstandaǵy Prezıdent saılaýy týraly 37 memleketten kelgen 200-den asa jýrnalıst aqparat taratty

IA "Kazınform"