Qarashadan hanǵa hat: Halqyńyzdy qolyńyzǵa shara toly qymyz alyp quttyqtańyz!

Jer jaralyp, sý aqqaly Turan topyraǵynda mynadaı bir dástúr saqtalǵan. Qar astynan mızamshýaq tebindep, ker dalany boz jýsan ańqytyp Áz naýryz týǵanda kún men tún teńelip, han men qara teńelip bir máz meıram bolysady eken. Han jarshysy jer jahanǵa jar salyp, kil sańylaqtardy han ordasyna aldyrady. Qarasha ishinen sýrylyp shyǵyp, qaımanadan óner ozdyrǵan shyn daryndyǵa han bir kúngi taǵynan túsip, el bıletipti. («Han men qara teńelipti» degen sóz osydan qalsa kerek.) Áz naýryzda aıtylǵan qarashanyń qalaýy –  han tarabynan keri qaıtarylmaǵan eken. (Bul motıv kóne ańyzdardy zerttegen ǵalymdardyń eńbekterinde de aıtylady.)

Mine, qysytyń tońy jibip, qar kóbesin sógip, qazaq dalasyna Áz naýryz da jetti. Ebi jeldeı júıtkip ótken jylqy jylǵa salaýat aıtyp, momaqan qoı jylyn qarsy almaqpyz. Kúlli shyǵys halyqtarynyń jańa jyly tabyldyryqtan attaǵaly tur. Osy oraıda joǵaryda aıtyp ótkendeı «han men qarasha teńeler» tusta bizde el tizginin ustaǵan Elbasyna dat aıtpaqpyz. (Dat ta emes, hat degenimiz durys shyǵar). Tek bir aýyz tilegimiz bar. Sózge qonaq bergen, sóz qunyn óz qunym dep túsinetin halyqpyz ǵoı. Sondyqtan munyń eshbir ábestigi joq degen úmittemiz.

Qurmetti, Qazaq eliniń Tuńǵysh Prezıdenti Nursultan Ábishuly Nazarbaev myrza!

Sizdi, aldaǵy Ulystyń uly kúni Áz naýryz meıramymen quttyqtaı kele, sáýirde bolatyn saılaýdaǵy úmitkerligińizge sáttilik tileımiz!

Bizdiń sizge aıtpaq aqjoltaı tilegimiz, ulystyń uly kúnin jańa jyldy qarsy alǵandaı, (naýryzdyń jıyrma birinnen jıyrma ekisine qaraǵyn túni) qolyńyzǵa shara toly qymyz alyp, qarasha halqyńyzdy quttyqtasańyz. Osyny  jyl saıynǵy buljymas dástúrge aınaldyrsańyz eken dep suraımyz.

Bul el birligi úshin, ári Áz naýryz meıramyna tamasha ár beretin edi.

Atalǵan bastama – el ishindegi túrli ulttar men eshqandaı elaralyq saıasatqa  kóleńkesin túsiretin qadam emes degen oıdamyz.

El úshin mańyzdy hatty hanǵa jetizý úshin, han ýázirleri shybyn janyn pıda etkendigi tarıhtan málim. Sondyqtan bizdiń bul ótinishimiz jerde qalmas degen úmittemiz.

Ulystyń uly kúni Áz naýryz qut bereke ákelsin!

Qoı jyly elimiz qomaqty tabystarǵa jetsin!

Qurmetpen: Baqytbek Qadyruly,  Yqylas Ojaıuly,  Qamshy.kz aqparattyq portalynyń ujymy

Sýret: http://www.profi-forex.org/