Astanada qazaq saıttary redaktorlarynyń tuńǵysh konferensııasy bastaldy

Astanadaǵy Qazmedıa ortalyǵynda bastalǵan qazaq saıtynyń búgingi máseleleri men damýyna arnalǵan tuńǵysh konferensııanyń quttyqtaý sózin «Nur Otan» HDP hatshysy Erlan Qarın bastady. Onyń aıtýynsha tuńǵysh ret keń kólemdi uıymdastyrylǵan qazaq saıttarynyń redaktorlaryna arnalǵan bul konferensııa «Qazaq» gazetiniń shyqqanyna 100 jyl tolýyna da oraılastyryp otyr eken. О́tip jatqan alqaly jıyn qazaq ınternetiniń damý erekshelikteri men ózekti máselelerin, dızaıny jáne tehnıkalyq súıemeldeýdi qoldaý, kommersııalandyrý máselelerimen qosa IT salasyndaǵy termınologııa jáne qarip máselesni, jańa medıa men qazaq ınterneti jýrnalıstıkasy qatarly taqyryptardy talqylamaq. «Bul retki basqosýdyń jáne bir ereksheligin atap óter bolsam, búgin Amerıkadan jáne Qytaıdan Skype arqyly baılanysqa shyǵatyn qazaq saıttarynyń belgili tulǵalary bizdiń talqylanatyn taqyryptarymyzǵa óz pikirlerin qosatyn bolady»,-dedi Erlan Tynymbaıuly. Erlan Qarın quttyqtaý sózinde konferensııany ótkizý oıyn ortaǵa qoıǵan azamattar saıasatker Aıdos Sarym men «Abaı-aqparat» agenttiginiń basshysy Dáýren Qýat ekenin atap ótti. Konferensııada tórt qujat qabyldaýdy maqsat etken uıymdastyrýshylar eń aldymen ınternet qaýymdastyǵyn, ıaǵnı qazaq saıttarynyń redaktorlaryna arnalǵan qujatty daıyndap otyrǵandyǵyn jetkizdi. Sonymen qatar qazaq ınternetiniń damýyn memlekettik organdarmen baılanystyratyn, aýyl-aımaqtarǵa ınternet jelileriniń barýy, WIFI jelileriniń ornaýyna arnalǵan qujat pen latyn qarpine kóshý jaıly qujatty qabyldaýdy da kózdelip otyr.