Nazarbaev qazaq jastaryna arnalǵan bolashaqtyń úsh máselesin aıtty (vıdeo)

14 qyrkúıek kúni Aqordada otandyq jáne sheteldik jýrnalıstermen kezdesken Elbasy Nursultan Nazarbaev el ómirindegi mańyzdy kóptegen saýaldar týraly pikirin bildirdi, dep jazady Qamshy.kz. Prezıdentke «Qamshy» aqparat agenttigi jetekshisi Bilál Qýanysh: «Eldiń bolashaǵy jastardyń qolynda» dep jıi aıtasyz. Búgingi jastar máselesinde sizdi ne tolǵandyrady. Jalpy búgingi jastardyń tárbıesine qatysty oıyńyzdy bilgim keledi», - dep saýal qoıdy.

«Ony biz aıtyp júrmiz. «Rýhanı jańǵyrýda» aıtylǵan máseleniń ishindegi kóbisi jastarǵa arnalǵan bolashaqtyń máselesi. Birinshi, jastarǵa aıtatynym búgingi zamanda bilim kerek, ǵylym kerek. Tek qana saýatty el, tek qana bilimge umtylǵan el búgin aldyńǵy qatarda bolady. Shetelde de oqytatyn, ishimizde de ár jerde mektepterge kóńil bólip jatqanymyz, ıntellektýaldyq mektep, jańadan ýnıversıtetter salyp jatqanymyz, mektepterimiz jastar úshin.

Ekinshi, Qazaqstannyń jastary úshin Otansúıgishtik. Táýelsiz Qazaqstandy qolda ustap turý úshin Otandy súıý kerek. Bul Qazaqstan jastardyń Qazaqstany. XXI-XXII ǵasyrdyń, arǵy ǵasyrlardyń Qazaqstany. Osy memleketti abyroıly qyp ustaý úshin Qazaqstandy janyndaı súıýi kerek.

Úshinshi, Dúnıede neshe túrli dinı aǵymdar bar. Sırııada qaqtyǵystar bolyp jatyr. Olar ár jerden jastardy shaqyrtyp soǵysqa beıimdep, soǵystyryp jatyr. Sodan keıin elderińe qaıtyp, lańkestik jasańdar dep oǵan úıretip jatyr. Bizdiń jastarymyz qudaı saqtap ondaı jaǵdaıǵa túspesin dep oılaımyn, ol jerde eshqandaı bolashaq joq», - dep jalǵady prezıdent óz jaýabyn.  

«Buryn da aıtqanmyn, qazir de aıtaıyn. Bizdiń qazaqtyń qyzdary, jalpy áıel azamattary esh ýaqytta betin búrkemegen. Qyzdarymyz burymdaryn salbyratyp, sholpylaryn syńǵyrlatyp júretin. Bizdiń analarymyz batyr bolǵan. Erleriniń janynda júrip soǵysqan, qolyna naıza alǵan. Sondyqtan sonsha ǵasyrlyq tarıhymyzdy alyp kelip, búgin basqasha jolǵa túsemiz be? Shaldardyń sholtıtyp shalbar kıgenderin qaıdan kórdińizder? Saqalyn beline túsirip júrý musylmandyqtyń kádesi emes qoı. Qaı quranda jazylǵan? Bul saltymyzdy buzady. Munda turǵan qandaı erekshelik bar? Oǵan kim qyzyǵady? Sondyqtan ol bizdiki emes. Men bul týraly bir ret aıttym. Men aıtqannan keıin oryndatatyn adammyn. Sondyqtan jastarǵa osylardan aýlaq bolyńdar deımin», - dedi Qazaqstan Prezıdenti.

Munan bólek, Nursultan Nazarbaev qazirgi tańda otandastarymyz soǵysyp júrgen aımaqtardaǵy jaǵdaıdyń óte aýyr ekenin basa aıtty.

«Dúnıede neshe túrli dinı aǵymdar bar. Sırııada qaqtyǵystar bolyp jatyr. Olar ár jerden jastardy shaqyrdy, aqsha tóledi. Olardy soǵysqa beıimdep, soǵystyrdy. Sodan keıin «elderińe qaıtyp, lańkestik jasańdar» dep oǵan úıretip jatyr. Bizden de baryp jatqan adamdardy bilemin. Ol jastar óziniń ornyn osy jerde taba almaǵan, ne jumysqa ornalaspaǵan ne bilim almaǵan. Ana jaqta qarajat tóleımiz degennen keıin soǵan baryp aldanyp qalady. Sol jaqqa otbasyn da aparǵandyqtan olar kete almaıdy», - dedi Memleket basshysy.