Meshit ımamy ekstremıst pe?(VIDEO)

Israfıl Begeı  biraz ýaqyt buryn Irannan Qazaqstanǵa kóship kelgen, áıeli men 3 balasy bar eken. Ol Mańǵystaý oblysynyń Jańaózen qalasyndaǵy meshitterdiń birinde ımam bolyp qyzmet atqarǵan.Úndeý jarııalaǵandardyń aıtýy boıynsha, ol jat aǵym ókilderimen ashyq suhbat júrgizip, jat aǵymda júrgen jastardyń týra joldy tabýyna kómektesken eken. Onyń ýaǵyzdary Youtube jelisinde keń tarap, kóp kórermen jınaǵan. Azdaǵan ýaqyt ishinde kóptegen shákirt tárbıelep te úlgergen. Israfıl Begeı Qazaqstanda 3 – 4 jyl buryn kóship kelse de osyǵan deıin azamattyǵyn ala almaı kelgen. Azamattyq ala almaýynyń da óz sebebi bar. Oǵan Jańaózen turǵyndarynyń aıtýy boıynsha ekstremıst dep jala jabylǵan.  Oǵan ekstremıst dep jala jabyldy ma, álde shyndyq pa belgisiz bolyp otyr. 

Israfıl Begeıge baılanysty osyndaı máseleden keıin Jańaózen turǵyndary Elbasyǵa vıdeo úndeý jarııalaı bastady. Olar meshit ımamynyń azamattyq alý kezindegi máseleni sheship berýin ótindi.

 «Men Daýyl Shalqaryń anasy Satqanbaeva Jazıra balamdy meshitke jiberýge qorqatyn edim. Israfıl ustaz kelgeli balamdy alańsyz meshitke jiberetin boldym. Men onyń jat aǵymdy ýaǵyzdap júr degen jalaǵa senbeımin. Qurmetti Elbasy Israfıl ustazǵa kómektesýińizdi suraımyn»,- depti Jańaózen qalasynyń turǵyny.

Onyń  shákirtteriniń ata-anasy osyǵan uqsas vıdeo úndeýdi kóptep jarııalaýda. Barlyǵy da burynǵy ımamynyń aqtalýyn qalap,Elbasydan  kómek kórsetýin suraıdy. Sonymen birge ortalyq meshittiń jamaǵaty da Elbasyǵa arnaıy vıdeo úndeý jasaǵan.

Osyǵan oqıǵaǵa baılanysty QMDB-ǵa habarlastyq.

«Israfıl Begeı 1 jyl kóleminde, naqtyraq aıtqanda, 2015-2016 jyldar aralyǵynda Jańaózen qalasyndaǵy meshitte taǵylymdamadan (stajırovka) ótti. Synaq merzimi barysynda oǵan qatysty quzyrly mekeme ókilderi tarapynan suraqtar týyndady. Osyǵan baılanysty Israfıl Begeıdiń qyzmeti ýaqytsha toqtatyldy», dedi QMDB-nyń baspasóz meńgerýshisi Aǵabek Qonarbaıuly.

Bizdiń elde shetelden kelgen qazaq azamattaryna jumys tabý aıtarlyqtaı ońaıǵa soqpaıdy. Al Iran elinen kelgen qazaqtyń qalaısha meshitte ımam bolyp jumys istedi degen suraqqa Aǵabek Qonarbaıuly bylaı jaýap berdi: «Quzyrly mekeme ókilderi tarapynan tekseris júrgizilipti. Qazir anyqtaý jumystary jalǵasyp jatqan kórinedi». 

Onyń aıtýy boıynsha, Israfıl Begeıdiń azamattyq alý týraly jazǵan ótinishi tıisti mekemeler tarapynan qanaǵattandyrylmaǵany týraly anyqtama bar eken. Alaıda onyń Qazaqstanǵa qashan kelgeni týraly eshqandaı derektiń joqtyǵyn, sonymen birge 2015 jyldyń basynan bastap  Mańǵystaý oblysy Jańaózen qalasyndaǵy meshitten taǵylymdamadan ótý týraly ótinishi maquldanǵanyn aıtty.

Sonymen qatar Aǵabek myrza Israfıl Begeıdiń azamattyǵy joq bola tura qalaısha ımamdyq qyzmetke aralasqany jónindegi suraqqa bylaı jaýap berdi: «Qazaqstanda azamattyǵy joq ımamdar ımamdyq qyzmetke taǵaıyndalmaıdy. Quzyrly mekeme ókilderi tarapynan tekseris júrgizilgeni. Qazir anyqtaý jumystary jalǵasyp jatqan kórinedi.Israfıl Begeıdiń Qazaqstan musylmandary dinı basqarmasy tarapynan resmı buıryǵy bolǵan joq.  Qazaqstan musylmandary dinı basqarmasy shetten kelgen baýyrlarymyzdyń azamattyq alǵannan keıin dinı qyzmetke taǵaıyndaý týraly ótinishterin qanaǵattandyryp, barynsha qoldaý kórsetip, qamqorlyq jasaýda. Atap aıtqanda, Almatydaǵy «Nur Múbárak» ýnıversıteti men Imamdardyń bilimin jetildirý Islam ınstıtýtynda Mońǵolııadan, Qytaıdan, О́zbekstannan, Reseıdiń Altaı Respýblıkasy men Omby aımaǵynan, t.b. kelgen qazaq jigitterine arnaıy granttar bólip, tıisti dinı qyzmetterge taǵaıyndaýda. Sonymen qatar, memlekettik baǵdarlamamen soltústik aımaqqa kóship jatqan qandastarymyzǵa da meshit tarapynan áleýmettik qoldaý jasalyp, qaıyrymdylyq kómek kórsetilýde».  

Atalǵan máseleniń qashanǵa deıin sozylatyny ázirge belgisiz. Biraq Jańaózene turǵyndary másele sheshilgenge deıin qoldarynan kelgenniń bárin jasaıtyn syńaıly. Olardyń vıdeo úndeýleriniń sany kúnnen-kúnge kóbeıip keledi.

Qamshyger: Ásel О́teshova