QAZAQSTANDA DEPÝTATTARDY QYZMETTIK KО́LIK PEN PÁTERDEN AIYRÝ JО́NINDE USYNYS TASTALDY

Ananyń kóńili balada, balanyń kóńili dalada. Memleket depýtattardy oılap, erkeletip, aılyǵyn kóterip, qas-qabaǵyna qaraýmen boldy. Olar bolsa, eldi, jerdi oılaýdyń ornyna, terezege telmirip otyra berdi. (Bárine qatysty aıtylmaǵan) Bul jerde depýtattardy balamen salystyrýdyń da syryn oqyrman túsingen bolar... Balany jeti jasqa deıin handaı kút, jeti jastan keıin qulsha jumsa. Memleket osyny ustanǵandaı. Oǵan dálel qoǵam belsendileri depýtattardyń «erkelikterin» kótere bermeı, olarǵa jumsalyp jatqan shyǵyn, halyqtyń qaltasynan berilip jatqan qarajatty qysqartýdy usynys etipti.

«Halyq birligi» qoǵamdyq birlestiginiń jetekshisi, zańger Maqsat Ilııasuly depýtattardy qyzmettik kólik pen páterden aıyrý jóninde usynys tastapty, dep habarlaıdy Qamshy aqparattyq agenttigi. Bul jóninde zańger óziniń Feısbýk paraqshasynda jazǵan. Mazmuny tómendegideı:

«QR qos palataly Parlamentindegi depýtattar sany – 154. Keıbir derekterge súıensek, qos palataly Parlamenti depýtattarynyń shyǵyny jyl saıyn 15 mıllıard teńgege deıin jetedi eken. Iаǵnı memleket bir depýtatqa 100 mıllıon teńge jumsasa, ár depýtat úshin qazynada kúnine 380 myń teńge saqtalǵan. Paralment mundaı shyǵynǵa laıyq pa? Menińshe, joq. Bárimizge málim, depýtattar arasynda úısiz-kúısiz júrgender joq, báriniń jaǵdaıy jaqsy: páter deısiń be, kólik deısiń be, bári bar, aqshalary da jetip artylady».

Osylardy negizge ala otyryp, daǵdarys ýaqytynda depýtattardy qyzmettik kólik pen páterden aıyrý jóninde usynys tastady.

«Sondaı-aq, prezıdent ákimshiliginiń, bılik pen oblys ákimdigine bólinetin qyzmettik kólikter sanyn azaıtýdy usynamyn. Qyzmettik kólikter men garajdardy qamtamasyz etý úshin memlekettik qazynadan qomaqty soma ketedi» deıdi Ilııasov.

Qoǵam qaıratkeri sol aqsha balalardy tamaqtandyrýǵa jumsalsa degen ıgi oıymen de bólisip qaldy.

Qoǵam qaıratkeriniń myna aıtqanyn eskerip, bir máselege toqtalyp ketkendi jón kórdik. Sáýirdiń basynda depýtattardyń jalaqysyn kóterý jóninde aqparat taralǵany bárimizge málim. Aqparat taratýshylardyń keltirgen deregine saı 1 naýryzdan bastap Májilis depýtattarynyń aılyǵy 30 paıyzǵa artqan. Jalpy alǵanda, májilismenderdiń ortasha jalaqysy buǵan deıin 500 myń teńgeni quraǵan. Al qazir 50 paıyzǵa, tipti 30 paıyzǵa kóterilse, endigi jalaqysy qansha bolatynyn elestetip kórińizder.

Buǵan depýtattardyń tóbesi kókke jetip, qýanǵan edi. QR Parlamenti Májilisi tóraǵasynyń orynbasary Vladımır Bojkonyń  pikirinen osyny baıqaýǵa bolady.

«Saıası qyzmetkerler arasynda jalaqysy sońǵy bop ósken osy depýtattar, Negizi bul sheshim osydan 4 jyl buryn qabyldanyp qoıylǵan edi. Mınıstrlikter men ózge de vedomstvolardaǵy jalaqyny birtindep ósiremin degenshe 4 jyl ótip ketti. Mine, endi bizdiń kezegimiz keldi», - dep máz-meıram bolǵan bolatyn Vladımır Bojko.

Tóbeleri kókke jetken depýtattar myna usynysty estigende qýanshytary sý sepkendeı basylady-aý. Bılik tarapy atalmysh usynysty qabyldaı ma, qabyldamaı ma, bizge beımálim, alaıda qarapaıym halyq únsiz qalmaı, qoldap-qolpashtary sózsiz.