Tozaqpen teń ómir: DAISh tutqynynda bolǵan áıelder sumdyq taǵdyrlarymen bólisti

2014 jyldyń jazynda Iraktyń Sınjar qalasy «Islam memleketi» áskerglere toldy. 5 myńnan astam áıel tutqynda bolyp, quldyqqa satyldy. Tek biren-sarany qashyp qutyla alǵan.

Bul áıelderdiń adam janyn túrshiktirer oqıǵalary jaıynda jergilikti BAQ tilshisi DAISh tutqynynan tek bir ǵajaptyń kúshimen qutylǵandardan bilip qaıtty.

Nazıma atty 22 jastaǵy arýdyń aıtýynsha, áskerler Nazımany satyp jibergen. Satyp alýshy adam ony basqa qalaǵa alyp ketedi. О́z erkinen tys sol erkektiń áıeli atanady. Er adam bir orynda turaqtamaıtyn, bir jylda birneshe ret oryn aýsytyryp júrgen eken. Nazımany da janynan bir eli tastamaǵan. Al qyz erkektiń yǵyna baǵynbaı, qashyp ketýge tyrysqan soń talaı taıaq ta jegen. Tipti, aptalap jabyq ári qarańǵy bólmede ash otyrǵan.

Mosýlǵa kelgende Nazıma taǵy qashýǵa tyrysqan. Bul oıy júzege asty da. Jolda kezdesken taksıge otyra sala, ózin quldyqta ustap otyrǵanyn taksıske birden jetkizedi. Nazımanyń ótinishi boıynsha, taksıshi qyzdyń aǵasyna habarlasyp, Nazımany kúrdter panalaıtyn lagerge jetkizip salady. Sóıtip, Nazıma bostandyqqa qol jetkizedi.

28 jastaǵy Rýba esimdi qyzdyń oqıǵasy da adamnyń júregin almaı qoımaıdy. Qyz Saýd Arabııasynan shyǵa bere quldyqqa tap bolady. Belgisiz er adam qyzdy kúshtep áıeldikke almaq bolǵan, alaıda qyz qasarysqan. Sol sátte ol Rýbany soqqyǵa jyǵyp, qarýmen ses kórsetedi. Rýbanyń kishkentaı jıeni de osy adamnyń quldyǵynda bolǵan kórinedi. Ápkesimen qosa quldyqtaǵy ómirdiń ashy dámin kishkentaı búldirshin de tatty.

Budan keıin, Rýba jıenimen basqa erkekke satyldy. Ol da qyzdardy kún saıyn sabaýmen boldy. Tipti zorlamaq bolǵan, biraq qyz zorlyqtan qutylǵan. Ne kerek, úshinshi ret satylypty. Ol jerde bir úıdiń qyzmetshisi bolyp jumys atqardy. Qojaıynynyń áıeli qyzdyń 3 jasar jıenin ábden qorlaǵan: uryp-soqqan, qarańǵy bólmege qamap qoıyp, tamaqsyz qaldyrǵan. Qyzdardyń denesinde sol kúnderdiń esteligi retinde tyrtyq qalyp qoıǵan.

22 jastaǵy Shırın albandyqqa satylyp, 5 otbasy turatyn úıge tap boldy. Ol jerde úı sharýasymen ǵana aınalysyp qoımaı, úıde turatyn ár erkektiń kóńilin tabý da jas qyzdyń moınyna júkteldi. Birneshe aıdan soń Shırındy sırııalyq otbasyna satyp, ol jerde bala kútýshi bolyp qyzmet atqardy.

Kúnderdiń birinde qyzda qashyp qutylatyn múmkindik týdy. Dalada qalǵan Shırın adamdardan kómek surap, aǵasyna habarlasady. Sóıtip, úıine qaıtyp, quldyqtan bir jola qutylady.