Mustafa Shoqaıdyń Berlınde Túrkistan jastaryna úndeýi

Búgin Qazaqstan, Qyrǵyzstan, Qaraqalpaqstan, О́zbekstan, Túrkmenstan, Tájikstan dep jas úkimet kúshin alty jumhurııatqa bólip turǵan Túrkistan bólinbes aırylmas bir ólke.

Halqynyń qany bir, tili bir, dini bir, maksaty bir. Túrkistannyń maqsaty: óziniń kutylýy, ulttyq úkimetin quryp táýelsiz bolyp óz aldyna bir úkimet bolyp turýy. Halqy kópten bul jumysqa jantalasyp jumys istep, qan tógip soǵysyp keledi. Úmitimiz zor, memleketimizdiń keleshegine senemiz.

Túrkistan jastary ásirese bul maqsatymyzǵa jetkizýge talasyp tyrmysyp jatyr. Bizdiń maqsatymyz tek Túrkistannyń ǵana emes, búkil túrik ólkeleriniń, búkil túrik halyqtarynyń dos bolyp ózara birlik baýyrlastyqpen jasap syrtqy dushpandarǵa qarsy óziniń kúshin, úkimetiniń kúshin bildirip koıý. Oıymyzǵa jetemiz, talabymyzdy orynyna keltiremiz degen ımanymyz zor jáne kúshti.

Halqymyz ben jas úkimettiń júgi qansha aýyr bolsa, bizdin shyǵysymyz sonsha qatty, sonsha kúshti bolmaq. Alysta júrip el qaıǵysyn oılap, alysta júrip el qamyn oılap Eýropanyń ár tarapynda júrgen, búgingi Túrkııada turǵan Túrkistan jastary birlesinder!

Senderdiń birlikteriń, senderdiń bir-birlerińe kúsh qosýlaryń, elimizdiń baqytyna qyzmet etpek. Muny umytpańdar! Bárimizdin qubylamyz ózimizdiń atajurtymyz, ólkemiz Túrkistan bolmaq. Túrkistan úshin ólý, Túrkistan úshin jan berý bárimizge bir maqsat, bir kıeli mindet bolmaq. Muny umytpaý kerek.

Túrik halqy batyr halyk, túrik halqy arystan, er halyq.

Kimnen taıaq jegendeı, bizdiń túriktiń balasy,

Aldyryp júrgen dushpanǵa aýzynyń alasy.

Bul naqyl sózdi umytpaýymyz kerek. Bárimiz bir bolsaq, bizdiń jeńbeıtin jaýymyz bolmaıdy.

Maqsatymyzǵa jetemiz, onsyz bizdiń kúnimiz joq. Quryp ketemiz. Bosyp ketemiz. Qurymas úshin, bospas úshin, kúshimizdi biriktirip ıin tirestirip bir-birimizge járdem berip júrýimiz kerek. Onsyz bizdiń kúnimiz karań. Muny umytpaý kerek.

Ázirlegen: Ábdýaqap Qara