Elbasy kimdi shaqyrdy? Qytaıdan kimder kelip jatyr?(vıdeo)

QR Úkimet basshysy Kárim Másimovtiń,

UQK basshysy Nurtaı Ábiqaevtyń,

Syrtqy ister mınıstri Erlan Ydyrysovtyń,

Memlekettik hatshy Ádilbek Jaqsybekovtiń nazaryna

   Eki jyldan beri toqyrap qalǵan «Qazaq kóshine» Elbasy Nursultan Nazarbaev qaıta qamshy saldy. «Atajurtyna kelem degen qazaqqa barlyq jaǵdaıdy jasańdar» dep Mınıstrlerine tapsyrma berdi Memleket basshysy. Degenmen osy iske dál qazir bel sheship kirisken sheneýnikti kórmedik. Kóshtiń basy sheteldegi qazaqtarǵa vıza berýden bastalatynyn eskersek, onyń ózi qııamet qaıym bolyp tur. Aıtalyq, myna turǵan Qytaıdaǵy qazaqtar týysshalý vızasyn alýǵa zar bolyp júr...

 Qazaqstannyń Úrimjidegi vıza berý qyzmeti sońǵy jyldarǵa deıin naǵyz bylyq-shylyqtyń ortasy bolyp kelgen. Osydan úsh jyl buryn sol tártipsizdikterdi Qaıyrjan Sársebaev degen azamat durys jolǵa salyp edi. Qaıyrjan myrza uzaq ótpeı qyzmetinen ketken. Múmkin onyń «Qazaq kóshine» dańǵyl jol ashqany áldekimderge unamaǵan syńaıly. Qazir sol jaqsy úrdiske qaıtadan qara kóleńke tústi.

Bıylǵy jazda Qytaıdan Atajurtyna kelgisi kelgen aǵaıynnyń Úrimjidegi vızalyq qyzmetten ábden kóńili qaldy. Ol týraly bizdiń redaksııamyzǵa birneshe adam habarlasyp, nazarylyqtaryn bildirdi. Olardyń aıtýynsha, úsh aımaqty mekendep jatqan qazaqtardyń shalǵaıdaǵy Úrimji qalasyna qaıta-qaıta barýǵa múmkindikteri joq. Tek jazǵy, qysqy demalystardy paıdalanyp, vıza alyp, Qazaqstanǵa alǵashqy saparyn nemese kezekti qadamyn jasaǵysy keledi. Sol nıetpen alyp ushyp Úrimji qalasyna jetken qandastarymyz Qazaqstannyń vızalyq qyzmetine barǵanda, kóńilderi sý sepkendeı basylǵan. Sóıtsek, báriniń estıtini «vıza kezegińiz qazan nemese qarasha aıynda» keledi deıtin sýyq sóz kórinedi.

Al sonda vızany kimder alyp jatyr desek, erte qamdanǵan keıibr aǵaıyndar men ózge ult ókilderiniń qarasy qalyń kórinedi. Ony myna vıdeodan kóre alasyzdar. Qazaqstanǵa vıza surap kezekte turǵandardyń kóp sandysy uıǵyr ultynyń ókilderi ekeni anyq. Sonda, Elbasy kimdi shaqyrdy? Qazaqstanǵa kelip jatqandar kimder? Qazaqtar ne úshin Atajurtyna jete almaı zar eńirep júr? Bul suraqtardyń jaýabyn eń aldymen sol Úrimjidegi vızalyq qyzmette otyrǵan myrzalardan suraǵanymyz jón shyǵar... Tipti, sońǵy kezderi ultyn «qazaq» dep ózgertip, esh qıyndyqsyz Qazaqstanǵa kelip jatqan «uıǵyrlar» týraly da aqparattar jeldeı esýde.

Estýimizshe, sońǵy birer jylda vıza berý qyzmetiniń tizginin ustaǵan Erlan Ibraım myrza qazir ýaqytsha demalysta ma, álde qyzmetinen bosady ma? Áıteýir, Baýyrjan esimdi qyzmetker men Yrymbek deıtin azamattyń esimi jıi atalýda.

Nede bolsa, myna vıdeo kóńilge kúdik uıalatatyny sózsiz. Siz ne deısiz?

Nurǵalı Nurtaı