Qaıda, sol kósem Nyǵmatýllın?

Jırınovskııdiń sózi qazaq qoǵamyn týra taýyq qoraǵa túlki kirip ketkendeı etip dúrliktirip jiberdi. Dúrligip jatqandar árıne, «elıtaǵa jatpaıtyndar». Elıtaǵa jatatyndar she? Jırınovskıı olardyń jeti atasyn kórden shyǵaryp alyp tepkilese de kónedi. «Kónedi» degendi de barynsha jumsartyp aıtyp otyrmyz, durysy qýanady. Jalpy, Pýtınniń oıyndaǵy nárse Jırınovskııdiń tilinde júredi. Álgi sózdi Jırınovskıı aıtty deıtinder qatelesedi. Ol sózdiń avtory – orys bıligi. Qazaq bıligi osyndaı sátterde nege erýlige qarýly kórsete almaıdy? Siz qazir Syrtqy ister mınıstrligi qarap qalǵan joq qoı dersiz. О́ıtip qarap qalmaǵanyna... Bizdiń mınıstrliktiń talaby «toqtat!» dep qatań estilgennen góri «qoısańdarshy» deıtin maıda ótinishke uqsap ketedi. Qaıta Jırınovskııge «persona non grata» jarııalaǵan qyrǵyz bıliginiń áreketi naǵyz erkektiń áreketi eken! Jırınovskıı ánsheıin aýzy kópirip júrgen bireý emes. Memlekettik Dýma tóraǵasynyń orynbasary. Halyq qalaýlysy. Osyndaıda bizdegi «halyq qalaýlylary» týraly oılanasyń. Jırınovskıı spıkerdiń orynbasary bolsa, jaıshylyqta «Máke, Sáke degendi qoıyńdar, Palenshe Týgensheevıch deńder» dep kósemsıtin Nurlan Nyǵmatýllın spıkerdiń ózi! Táýelsiz el Parlamentiniń spıkeri! Qaıda, sol kósem Nyǵmatýllın? Qaıda «qurmetti depýtattar» degenniń ózin nazyrqanyp, «nege depýtat myrzalar!» dep aıtpaısyńdar?» dep shatqaıaqtaıtyn halyq qalaýlylary? Jırınovskııdiń álgi málimdemesine olar nege úndemeıdi? Sonda bular kimge qalaýly bolyp júr? Osyndaıda «qazaq jýas qoı» degendi maqtanyshpen aıtatyndardy ıttiń etinen jek kórip ketedi ekensiń. Osydan 23 jyl buryn «jýas degen jamannyń sypaıy aty» dep kúıinip jazǵanymyz bar edi. Myna túrimizben 23 jyl emes, 50 jyl ótse de sol kúıigimizdiń jazylmaıtyn túri bar-aý. Sonymen, qazaqtyń namysy qazaqtyń depýtattaryna kerek emes sııaqty. Qazaqtyń namysy kerek emes depýtattar qazaqqa kerek pe, ózi? Oılanyp kóretin másele eken...

Abaı Balajan