Májiliste qyz alyp qashý máselesi kóterildi

Otyrys barysynda Murat Ábenov aıdyń-kúnniń amanynda qyz alyp qashýdyń beleń alyp jatqanyn aıta kelip, bul máselege Mádenıet jáne aqparat mınıstrligi nazar aýdarmaı otyrǵanyn basa aıtty.

-Astanadaǵy ýnıversıtetterdiń stýdentteri maǵan bir beınerolıkti kórsetti. Ol jerde alyp qashqan qyzǵa májbúrlep "óz erkimmen" keldim degen qolhat jazdyryp jatty. Bul baryp turǵan quqyq buzýshylyq. Jáne bir ókinishtisi mádenıet salasy muny dáriptep otyr. Máselen, ánshiler "Alyp qasham meıli olaı qalama, kelin qylam seni qalaı da anama", dep, endi bir ánshi "Kóresiń meniń úıime barasyń, basyńa appaq oramal taǵasyń! Kóndirem, kónesiń, qyz bolyp kelesiń — kelin bolyp qalasyń", dep án shyrqap júr. Osylaısha, mádenıet salasynyń qyzmetkerleri bul qylmysty nasıhattaýda. Menińshe, mundaı dáripteýlerge zańmen tyıym salý kerek", - deıdi depýtat.

Odan bólek, Murat Ábenov pen Edil Jańbyrshın osy másele boıynsha Memleket basshysynyń Ulttyq quryltaıda aıtqan sózin eske alyp, tapsyrmanyń áli kúnge oryndalmaı jatqanyn alǵa tartty.

"Prezıdent "elimizde qyz alyp qashýdy ulttyq dástúr sanap, el ishinde dáriptegisi keletinder bar, bul – múldem aqtaýǵa bolmaıtyn zańsyzdyq, qarańǵylyq, tipti, masqara tirlik…Sondyqtan, mundaı aqylǵa syımaıtyn áreketterdi qatań synǵa alý kerek jáne ony tek synaý jetkiliksiz, oǵan biirjola tosqaýyl kerek", dep tapsyrma bergen bolatyn. Bul tapsyrma áli kúnge deıin oryndalmady",- dedi Murat Ábenov.

Eki depýtat ta máseleni kún tártibine engizip, zańnamalyq turǵyda qarastyrýdy usyndy. Bul rette, Májilis tóraǵasy Erlan Qoshanov problema aldaǵy otyrystarda bólek taqyryp retinde qarastyrylatynyn aıtty.